#በአፋር ክልል የሚገኙ የፖለቲካ ፓርቲዎች የሕወሓት ቡድን በመከላከያ ላይ የፈጸመውን ጥቃት አወገዙ

አፋር ብዙሃን መገናኛ ድርጅት- ጥቅምት 28, 2013

በአፋር ክልል የሚገኙ የፖለቲካ ፓርቲዎች የሕወሓት ቡድን በመከላከያ ላይ የፈጸመውን ጥቃት አወገዙ

በአፋር ክልል የሚንቀሳቀሱ የፖለቲካ ፓርቲዎች የሕወሓት ቡድን በሀገር መከላከያ ሠራዊት ላይ የፈጸመው ጥቃት አጥብቀው እንደሚያወግዙ ገለጹ።

ፓርቲዎቹ በወቅታዊ ሀገራዊ ጉዳዮች ላይ በሠመራ ከተማ ዛሬ ባካሄዱት የምክክር መድረክ፣ መንግሥት የሕግ የበላይነትን ለማረጋገጥ እየወሰደ ያለው እርምጃ ሁሉም ዜጋ ሊደግፈው ይገባል በማለት ተናግረዋል።

ከመድረኩ ተሳታፊዎች መካከል የአፋር ብልጽግና ፓርቲ ጽ/ቤት ሓላፊ አቶ ኢሴ አደን “የሕወሓት ቡድን በሀገር መከላከያ ሠራዊት ላይ የፈጸመው የእብሪት ጥቃት ዛሬም እንደ ትናንቱ ሁሉን በበላይነት ለመምራት ያለውን ፍላጎት በሕዝብ ላይ ለመጫን የተደረገ ሙከራ ነው” ብለዋል።

ድርጊቱ የሀገርን ህልውና እና የሕዝብን ሰላም አደጋ ላይ ለመጣል የተቃጣ ነው ማለታቸውን ኢዜአ ዘግቧል።

#ምንጭ: ብልጽግና ፓርት, አፋር ቅርንጫፍ

#የህወሃት ጁንታ አስቦት የነበረው ሀገር የማፍረስ ህልም ከሽፏል- የብሔራዊ መረጃና ደህንነት አገልግሎት::

ሰመራ-አፋር ብዙሃን መገናኛ ድርጅት፣ህዳር 20 ፣ 2013

የህወሃት ጁንታ አስቦት የነበረው ሀገር የማፍረስ ህልም ከሽፏል- የብሔራዊ መረጃና ደህንነት አገልግሎት::
የህወሃት ጁንታ አስቦት የነበረው ሀገር የማፍረስ ህልም መክሸፉን የብሔራዊ መረጃና ደህንነት አገልግሎት ገለጸ።

የህወሓት ጁንታ ለመቆጣጠር እስካሁን በተመዘገበው ድልም ለመላው የኢትዮጵያ ህዝብ የእንኳን ደስ ያላችሁ መልዕክት አስተላልፏል።

ከሌሎች የመረጃና ፀጥታ አካላት ጋር በመቀናጀት የጁንታውን ድብቅ ሴራ በማጋለጥ ለህግ ለማቅረብ በሚደረገው ጥረትም ኃላፊነቱን ለመወጣት እየሰራ መሆኑን በመግለጫው አመልክቷል።

በስግብግቡ የጁንታ ላይ የተገኘው አኩሪ ድል የመላው የአገራችን ህዝቦች በተለይም ደግሞ የትግራይ ህዝብ አኩሪ የትግል ውጤት በመሆኑ ተቋሙ የተሰማውን ደስታ ገልጿል።

የህወሓት ስግብግብ ጁንታ በፖለቲካው አውድ የደረሰበትን ሽንፈት ተከትሎ ትግራይ ክልል በመመሸግ ህገወጥ ተግባራትን ሲፈፅም ቆይቷልም ብሏል የብሔራዊ መረጃና ደህንነት አገልግሎት በመግለጫው።

ጁንታው የሰሜን ዕዝ የሰራዊቱ አባላትና የፌዴራል ፖሊስ አባላት ላይ ጥቃት በመፈጸም እንዲሁም በአማራ ክልል ህዝቦች ላይ ግልፅ ጦርነት በማወጅ የአገርን ብሄራዊ ደህንነትና ጥቅም በሚጻረር ከፍተኛ ክህደት መፈፀሙንም በመግለጫው አመልክቷል።

ቡድኑ ጦርነቱን የጀመረው በግልፅ፣ በተደራጀ እና በከዳተኛ አባሎቹ ጭምር ተገቢ ጥናት ፈፅሞ የሰራዊቱን ቁልፍ ትጥቆች፣ ስንቆች፣ የማዘዣ ጣቢያዎችና የዕዝ ሰንሰለቶች ለመቆጣጠርና ለመበጣጠስም በማለም መሆኑን ጠቅሷል።

ይሁን እንጂ ህልሙ ሙሉ በሙሉ ባሰበው ልክ አልተሳካለትም፣ ከሽፏል፣ ያሳካው ነገር ቢኖር ትውልድ ይቅር የማይለው አሳፋሪ እና አስነዋሪ ታሪክ ማስመዝገብ ነው ብሏል።

የስግብግብ ጁንታ ህልም እንዳይሳካ በራሱ የግንኙነት ኔትወርክ ውስጥ ሰርጎ በመግባት፣ ተባባሪ አካላትና አባላትን፣ የወገንን ኃይል እንዲሁም ሰላም ወዳዱን የትግራይ ህዝብ በመጠቀም መረጃ በመሰብሰብና በመተንተን ለተመዘገበው ድል ድጋፍ ማድረጉንም አመልክቷል።

የብሔራዊ መረጃና ደህንነት አገልግሎት ከሌሎች የመረጃና የፀጥታ ተቋማት ጋር በመቀናጀት የጁንታው ድብቅ ሴራ እንዳይሳካ ማክሸፉንም ገልጿል።

#ምንጭ: OBN

#ሠመራ ዩኒቨርሲቲ እና አዋሽ ባንክ በጋራ ለመስራት የሚያስችል ስምምነት ተፈራረሙ፣፣

ሰመራ-ግንቦት 09/2014 (አፋ.ብ.መ.ድ)

ሠመራ ዩኒቨርሲቲ እና አዋሽ ባንክ በጋራ ለመስራት የሚያስችል ስምምነት ተፈራረሙ፣፣

ሠመራ ዩኒቨርሲቲ ለምምህራን ለቤት ግንባታ፣ ለመኪና እና ለቤት እቃዎች ግዥ የሚሆን ብድር ለማመቻቸት የሚያስችል ስምምነት ግንቦት 10/2014 ከአዋሽ ባንክ ጋር ተፈራርሟል፡፡

የጋራ ስምምነቱ የዩኒቨርሲቲውን መምህራን የቤት እና የተሽከርካሪ ባለቤት የሚያደርግ ብድር የሚያመቻች እና ዩኒቨርሲቲው ለሚሰራቸው ሰፋፊ የገቢ ማመጫ ስራዎች የሚያግዝ እንደሆነ ታውቋል፡፡

በስምምነቱ ላይ ንግግር ያደረጉት የዩኒቨርሲቲው ፕሬዝዳንት ዶ/ር መሀመድ ኡስማን ስምምነቱ ለረጅም ጊዜ የመምህራን ጥያቄ የነበረውን የመኖሪያ ቤት እና የተሸከርካሪ ፍላጎት ለመፍታት የታለመ መሆኑን ገልፀዋል፡፡

ፕሬዝዳንቱ አያይዘውም መምህራን ትኩረታቸውን በምርምር እና በማስተማር ላይ እንዳደርጉ ለማሽቻል ዩኒቨርሲቲው ካቀዳቸው ምቹ የስራ አካባቢ የመፍጠር እቅዶች አንዱ አካል ነው ብለዋል፡፡ በቀጣይም ለአስተዳደር ሰራተኞች ቤት መስሪያ የሚሆን ቦታ ለማግኘት ከከተማ አስተዳደሩ ጋር እየተነጋገሩ እንደሆነ ገልፀዋል፡፡

የአዋሽ ባንክ የደሴ ሪጅናል ዳይሬክተር አቶ ኤልያስ እሸቱ በበኩላቸው ባንኩ ስምንት ከሚሆኑ ተመመሳሳይ የመንግስት ከፍተኛ ትምህርት ተቋማት ጋር እንደዚሁ አይነት ስራ እየሰራ ስለሆነ ለሠመራ ዩኒቨርሲቲም ከነበረው በተሻለ ለመስራት እንደሚፈልጉ ገልፀዋል፡፡

ስራውን ሲያስተባበሩ የነበሩት አቶ ዳውድ አህመድ በበኩላቸው ይህ ስምምነት ለሠመራ ዩኒቨርሲቲ መምህራን መልካም አጋጣሚ ነው ብለዋል፡፡ ስራውን ለመስራት በተደረገላቸው ግብዣ በርካታ ባንኮች ቢቀርቡም አዋሽ ባንክ በወለድ አልባም በወለድም ያቀረበው አማራጭ የተሻለ ስለነበር አሸናፊ ሆኖ ለስምምነት ተደርሷል ብለዋል፡፡ ይህ ስምምነት ዩኒቨርሲቲው እና ባንኩ ዋናውን ፊርማ ከተፈራረሙ ብኋላ በፍጥነት ወደተግባር ይገባል የሚል ተስፋ እንዳላቸው ተናግረዋል፡፡

የዩኒቨርሲቲ የኢንተርፕራይዝ ዳይሬክተር ዶ/ር አህመድ አብዱለጢፍ በበኩላቸው የዛሬው ፊርማ ዩኒቨርሲቲው ላቀደው ዘርፈብዙ የገቢ ማመንጫ ስራዎች አጋዥ ሃይል የሚሆን እና ሁለቱንም የሚጠቅም ስምምነት ነው ብለዋል፡፡ አያይዘውም የመኖሪያ ቤት እና ተሸከርካሪ ለመምህራኑ መሰረታዊ ፍላጎት በመሆኑ እድሉን መጠቀም አለበት ሲሉ አደራ ብለዋል፡፡

#ምንጭ: በሰመራ ዩኒቨርሲቲ የህዝብና አለም አቀፍ ግንኙት ዳይሬክቶሬት