ቅዳሜ፡- ሰኔ 7 ቀን 2017 ዓ.ም

15ኛው የቴክኒክ እና ሙያ ሳምንት ዐውደ ርዕይ ተጀመረ፡፡

15ኛው የቴክኒክ እና ሙያ ሳምንት ዐውደ ርዕይ ዛሬ ሰኔ 7 ቀን 2017 ዓ.ም በአዲስ አበባ ኤግዚቪሸን ማዕከል ለጎብኝዎች ዕይታ ክፍት ተደረገ፡፡

በመክፈቻ መርሃ ግብሩ ላይ የአዲስ አበባ ከተማ አስተዳደር ከንቲባ ክብርት ወ/ሮ #አዳነች #አቤቤ፣ በምክትል ከንቲባ ማዕረግ የአዲስ አበባ ከተማ አስተዳደር ሥራና ክህሎት ቢሮ ኃላፊ አቶ #ጥራቱ #በየነን ጨምሮ የፌደራል እና የከተማ አስተዳደር የስራ ኃላፊዎች ተገኝተዋል፡፡

በዕለቱ የመዲናይት ከንቲባ በመልዕክታቸው "ችግር ፈቺ ተኪ ምርቶችን በማምረት ሂደት  የቴክኒክና ሙያ ማሰልጠኛ ኮሌጆች እያበረከቱት ያለው አስተዋጽኦ የሚበረታታ ነው" ብለዋል።

ክብርት ከንቲባዋ አያይዘውም በቅርቡ በሀገር አቀፍ ደረጃ በተካሄደው የክህሎት  ውድድር በከተማ አስተዳደሩ  አጠቃላይ አሸናፊነት በመጠናቀቁ የዘርፉን አመራሮችና ባለሙያዎች  አመስግነዋል።

መንግስት ከለውጡ ማግስት ጀምሮ ለዘርፉ ልዪ ትኩረት በመስጠትና በአዳዲስ እሳቤ በመቃኘት ለሀገራዊ ዕድገትና ብልፅግና መረጋገጥ ዋስትና እየሆነ መጥቷል ያሉት ደግሞ በምክትል ከንቲባ ማዕረግ የአዲስ አበባ ሥራና ክህሎት ቢሮ  ኃላፊ ክቡር #አቶ #ጥራቱ #በየነ ናቸው፡፡

በዚህ ኤግዚቪሽን ላይ በ15ቱ የመንግስት ኮሌጆች በሚገኙ አሰልጣኞች፣ ሰልጣኞች እና ኢንተርፕራይዞች  የተሰሩ ከ150 በላይ  ችግር ፈቺ የማምረቻ እና የምርት  ቴክኖሎጂ ውጤቶች በአውደ ርዕዩ ላይ ቀርቧል፡፡

ይህ በእንዲህ እንዳለ በጀነራል ዊንጌት ፖሊ ቴክኒክ የተሰሩ 5 የማምረቻ እና 6 የምርት ውጤቶች ለጎብኝዎች ቀርበዋል፡፡

በተጨማሪም በኮሌጁ የኢንዱስትሪ ኤክስቴንሽን ድጋፍ የሚደረግላቸው 2 ኢንተርፕራይዞች የፈጠራ ምርታቸውን ይዘው ተገኝተዋል፡፡

ኤግዚቪሽኑ ''ብሩህ አዕምሮዎች፤ በክህሎት የበቁ ዜጎች'' በሚል መሪ ሃሳብ እየተካሄደ የሚገኝ ሲሆን ለ5 ተከታታይ ቀናት በልዩ ልዩ ሁነቶች እየተስተናገደ ለጎበኝዎች ክፍት ተደርጎ እንደሚቆይ ተነግሯል።

‹‹በላቀ አገልግሎት የመረጃ ተደራሽነት››

እሁድ፡- ሰኔ 8 ቀን 2017 ዓ.ም

ኮሌጁ የፋሽን ሾው ትርኢቱን በዛሬ ዕለት አቀረበ!!

የ15ኛው ቴክኒክ እና ሙያ ሳምንት ዐውደ ርዕይ አካል የሆነውን የፋሽን ሾው ትርኢት ውድድር የጀነራል ዊንጌት ፓሊ ቴክኒክ ኮሌጅ ዛሬ ሰኔ 8 ቀን 2017 ዓ.ም አቀረበ፡፡

ከትናንት ቅዳሜ ጀምሮ በአዲስ አበባ ኤግዚቪሸን ማዕከል ለጎብኝዎች እይታ ክፍት የተደረገው 15ኛው የቴክኒክና ሙያ ሳምንት ዐውደ ርዕይ የማምረቻ እና የምርት ፈጠራ ስራዎችን ለተመልካቾች ከማቅረብ ባሻገር በልዩ ልዩ ትርኢቶች እና አዝናኝ ውድድሮች እየተከበረ ይገኛል፡፡

በዛሬው ዕለትም በተካሄደው የፋሽን ሾው ትርኢት በኮሌጆች የተሰሩ የፋሽን ዲዛይኖች የተመልካቾችን ቀልብ የሰረቁ አስደማሚ ስራዎች የታዩ ሲሆን የጀነራል ዊንጌት ፖሊ ቴክኒክ ኮሌጅ ቴክስታይ ሌዘር ጋርመንት ዲፓርትመንት አሰልጣኞች እና ሰልጣኞች እጃችሁ ይባረክ ያስባለ ፈጠራዎችን ለመድረክ አብቅተዋል፡፡

ዲፓርትመንቱ በጋርመንት እና በሌዘር ዘርፎች ያዘጋጃቸውን ቅንጡ የወንድ እና የሴት ፋሽን ልብሶችን ለታዳሚዎች እና በመድረኩ ለተሰየሙት ዳኞች በማራኪ አቀራረብ አሳይቷል፡፡

ከዲዛይነሮቹ ፍሸና ጋር የሞደሎቹ ውብ አቀራረብ ተዳምሮ የመድረኩን ታዳሚ ቀልብ በመግዛት እውነትም ዊንጌት የከተማይቱ የቴክኒክና ሙያ ድምቀትና ኩራት አስብሎታል።

በቴክኖሎጂ ረገድ በከተማ ደረጃ በዚህ ዐውደ ርዕይ በተለያዩ የሙያ ዓይነቶች ከ150 የማምረቻ፣ የምርት፣ የሀገር በቀል እና የኢንፎርሜሽን ኮሙዩኒኬሽን ቴክኖሎጂ ፈጠራዎች ተሰርተው ለጎብኝዎች መቅረባቸው ታውቋል፡፡

‹‹በላቀ አገልግሎት የመረጃ ተደራሽነት››