አርብ፡- ህዳር 14 ቀን 2016 ዓ.ም

የፀረ ሙስና ቀን በኮሌጁ ተከበረ!!

ዓለም አቀፍ የፀረ ሙስና ቀንን ምክኒያት በማድረግ እንደ ተቋም ዛሬ ህዳር 14 ቀን 2016 ዓ.ም በኮሌጁ የፀረ ሙስና ቀን ተከበረ፡፡

በዓለም ለ20ኛ በኢትዮጵያ ደግሞ ለ19ኛ ጊዜ እየተከበረ የሚገኘውን የፀረ ሙስና ቀን በኮሌጁ የስነምግባር እና ፀረ ሙስና መከታተያ ዳይሬክቶሬት አስተባባሪነት " ሙስና የጋራ ጠላታችን ነው፤ በህብረት እንታገል" በሚል መሪ ቃል የኮሌጁ ሰራተኞች በተገኙበት ተከብሯል።

በዓሉ በፀረ ሙስና ትግሉ እየተሰሩ ያሉ ተግባራትን ለማስቀጠል፣ የትውልድ ስነ ምግባር ግንባታን ለማጠናከር፣ የፀረ ሙስና ትግሉን ህዝባዊ መሰረት በማስያዝ የጋራ ግንዛቤ ለመፍጠር እና መልካም አስተዳደርን ለማስፈን ታቅዶ መሆኑ ተገልጿል፡፡

ሙስና በስነ ምግባር ውድቀት፣ በቢሮክራሲ መብዛት፣ በተጠያቂነት መጓደል፣ በዜጎች ሁለንተናዊ ተሳትፎ ማነስ፣ ባልተማከለ የአሰራር ስርዓት እና መሰል መንስኤዎች የሚከሰት ሲሆን አፈፃፀሙ በጊዜ ሂደት እየሰፋ እና እየረቀቀ በመምጣቱ የሀገርን ሀብት ከዚህ እኩይ ብዝበዛ ለመታደግ መንግስት፣ ቤተሰብ፣ ሲቪክ ማህበራት፣ ሚዲያዎች፣ የትምህርት ተቋማት እና ቤተ እምነቶች ከፍተኛ ሚናቸውን ሊወጡ ይገባል ተብሏል፡፡

በተያያዘ ዜና እንደ ሀገር ለ18ኛ ጊዜ የሚከበረው የብሔር ብሔረሰቦች እና ህዝቦች በዓል በተመሳሳይ አብሮ ተከብሯል።

"በላቀ አግልግሎት የመረጃ ተደራሽነት"

እሁድ:- ህዳር 16 ቀን 2016 ዓ∙ም

ቢሮው በአዲስ ስያሜና በአዲስ አደረጃጀት መቀየሩ ተገለፀ!!

የአዲስ አበባ ከተማ አስተዳደር ቴክኒክና ሙያ ትምህርትና ስልጠና ቢሮ የአዲስ አበባ ሥራና ክህሎት ቢሮ በሚል ስያሜ እንደ አዲስ መደራጀቱ ተገለፀ።

የአዲስ አበባ ከተማ አስተዳደር የህዝብ እንደራሲዎች ምክር ቤት  ባካሄደው ሦስተኛ የሥራ ዘመን 1ኛ መደበኛ ጉባኤ ላይ  የአዲስ አበባ ከተማ አስተዳደር ቴክኒክና ሙያ ትምህርትና ስልጠና ቢሮ ከስራ ኢንተርፕራይዝ እና ኢንዱስትሪ ልማት ቢሮ የስራ እድል ፈጠራ እና የስራ ስምሪት ዘርፍን አካቶ በመያዝ የሥራ እና ክህሎት ቢሮ በሚል ስያሜ እንዲደራጅ የቀረበለትን አዋጅ ማፅደቁ ተሰምቷል።

ቢሮውንም እንዲመሩ ምክትል ከንቲባ አቶ ጥራቱ በየነ የተመደቡ ሲሆን በሌላ በኩል ቢሮውን ሲመሩ የነበሩት ክብርት ወ/ሮ ሀቢባ ሲራጅ የአዲስ አበባ ከተማ አስተዳደር የመንግስት የልማት ድርጅቶች ቁጥጥር ባለሥልጣን ኃላፊ ሆነው መሾማቸው ታውቋል። 

አዲሱ ቢሮ የሰለጠነ የሰው ሀብት ከማቅረብ ባሻገር የስራ ዕድል ፈጠራ እና የስራ ስምሪት ኃላፊነት ተደርቦበታል።

         "በላቀ አግልግሎት የመረጃ ተደራሽነት"