ЗУЛҲИЖЖА ОЙИНИНГ ФАЗИЛАТИ

Баъзи уламолар айтади: "Ким бу зулҳижжа ойининг ўн кунлигида рўза тутса, Аллоҳ таоло у бандасини ўн нарса билан ҳурматлайди:

1. Умрига барака бўлади;
2. Мол-мулки зиёда бўлади;
3. Оиласи Аллоҳнинг ҳимоясида бўлади;
4. Гуноҳларига каффорат бўлади;
5. Савобли амаллари кўпаяди;
6. Жон бериши осон бўлади;
7. Қабр қоронғилиги учун нур бўлади;
8. Тарозида савоблари оғир бўлади;
9. Дўзах қаърларига тушишдан омонда бўлади;
10. Жаннатдаги даражаси кўтарилади.

😌 Аллоҳ таоло барчамизга шу фазилатли амалларни қилиб, савоб-у мукофотларга эга бўлишимизни насиб этсин. Омин!

❓САВОЛ: ҚУРБОНЛИК ҚИЛИНАДИГАН ҲАЙВОН НЕЧА ЁШДА БЎЛИШИ КЕРАК?

➤ ЖАВОБ: Бисмиллаҳир Роҳманир Роҳийм. Қурбонлик қилинадиган ҳайвон агар қўй бўлса, энг камида бир ёш, мол бўлса, энг камида икки ёш, туя бўлса, энг камида беш ёш бўлиши лозим. Фақат қўй олти ойлик бўлиб танаси бир ёш қўйнинг танаси каби катта бўлса, ўша олти ойлик қўйни ҳам қурбонлик қилиш мумкин. Ўша ҳайвонларнинг эркагини ҳам, урғочисини ҳам қурбонлик қилиш мумкин (Ал-Фатово ал-Ҳиндия). Валлоҳу аълам.

Ўзбекистон мусулмонлари идораси Фатво кенгаши.

Ҳаж ибодатининг фарзлари

Ҳаж ибодатининг фарзлари учта:

1. Эҳром боғлаш;
2. Арафотда туриш;
3. Тавофул ифоза (ифоза тавобин) қилиш.
Бу амаллардан бири бажарилмай қолса, ҳаж ва умра ибодати бузилади. Яна бу фарзларга боғлиқ бўлган шартлар ҳам бор:

1. Ҳаж ният қилиш;
2. Талбия айтиш.
3. Зиёрат тавофининг кўпини адо этиш. Тавоф етти марта айланиш бўлса, тўрт айланиш фарз. Уч марта айланса тавоф ҳисобланмайди.
4. Тавоф қилишни ният қилиш. Бу фарзлар тавофнинг тўғри бўлиш шартлари ҳисобланади.
5. Ҳажнинг фарз амалларининг орасини тартиб билан қилиш. Аввал эҳромга кириш, кейин Арафотда туриш ва зиёрат тавофини адо этиш;
6. Ҳаждаги ҳар бир фарз амални ўз вақтида адо этиш;
7. Ҳажнинг ҳар бир амалини ўз ўрнида адо этиш;
8. Арафотда туришдан олдин жинсий яқинликдан сақланиш;
9. Бир ривоятга кўра тавофни ҳажарул асваддан бошлаш. Сабаби, Пайғамбар алайҳиссалом доимо уни қилгани учун вожиб.

✓ Зулҳижжа ойининг ўн кунида бажариладиган энг афзал амаллар:

- Ҳаж ва умрани адо этиш;

- Рўза тутиш;

- Кўп намоз ўқиш;

- Такбир ("Аллоҳу акбар"), таҳмид ("Алҳамду лиллаҳ"), таҳлил ("Ла илаҳа иллаллоҳ") ва бошқа зикрларни айтиш;

- Садақа;

- Қуръон тиловати;

- Ота-онага яхшилик қилиш;

Силаи раҳм (қариндош-уруғчилик алоқаларини мустаҳкамлаш).

Шаъбий роҳимаҳуллоҳ айтадилар: «Уламолар билан бирга ўтиринглар, чунки:
Ҳолингиз яхши бўлса, сизларни мақташади.
Ҳолингиз ёмон бўлса, уни изоҳлаб, хатоингизни кечиришади.
Хато қилсангиз, қўполлик қилишмайди.
Тушунмасангиз, ўргатишади.
Уларнинг ҳузурида бўлсангиз, сизга манфаат беришади».

СЎНГГИ НАФАС АМАЛИ

Хожа Убайдуллоҳ ҳазратлари Самарқандга зиёратигa келганларга дейдилар: «Бир азиз Хожа Баҳоуддин Нақшбанд ҳазратлари вафот этгач, тушларида кўриб сўрайдилар: «Нажот қай амалда?». Жавоб бериб: «Сўнгги нафасда қайси яхши амал устида бўлгинг келса, ўшанга доимо амал қилиб юришинг керак! Яъни, Парвардигорингни сўнгги нафасингда қандай эслашинг кераклигини билишинг лозим. Зеро, сўнгги нафас умр ипи узиладиган, ҳамма эшиклар ёпиладиган, барча борлигинг қўлингдан кетадиган, Оллоҳ таолодан бошқа мадад берадиган қолмайдиган бир дамдир. Ўша дамда инсон Оллоҳга қандай илтижо этадиган бўлса, умри давомида ҳам ўшандай бўлиши керак. Шу амалда нажот бордир», дедилар.

АЗОННИ АЙТМАЙ, ТАКБИР АЙТИБ НАМОЗ ЎҚИЙМАН

❓CАВОЛ: Мен эрталаб турганимда азонни эшитмайман яъни азон айтиб бўлингандан кейин тураман. Шунда мен азонни айтмай, такбир айтиб намоз ўқийман. Шу ишим тўғрими?

💬 ЖАВОБ: Бисмиллаҳир Роҳманир Роҳим.
Албатта маҳаллангиз масжидида айтилган азон кифоя қилади. Уни эшитган бўлишингиз шарт қилинмайди. Такбир айтиб намоз ўқишингиз жоиз. Валлоҳу аълам.

Ўзбекистон мусулмонлари идораси
Фатво маркази.

Субҳаналлоҳ – Жаннатда боғ бўлувчи калима. Жобир розияллоҳу анҳудан ривоят қилинади. Расулуллоҳ соллаллоҳу алайҳи васаллам: "Кимки: “Субҳаналлоҳи ва биҳамдиҳи” деса, у учун жаннатда бир хурмо экилади", дедилар (Имом Термизий ривояти).