የአፍሪካ አመርር ልህቀት አካዳሚ ከኮሪያ ዓለም አቀፍ የትብብር ኤጀንሲ (Korean International Cooperation Agency /KOICA) ጋር በመተባበር የእውቀት ሽግግር ሴሚናር እያካሄደ ነው፡፡
ሴሚናሩን በንግግር የከፈቱት የአካዳሚው የስልጠና ዘርፍ ምክትል ፕሬዝዳንት አቶ ስዩም መኮንን አካዳሚው በ2013 ዓ.ም የተለያዩ የሪፎርም ስራዎችን ማከናወኑን በማስታወስ ይህ ሴሚናር ብቃትን መሠረት ያደረገ የአመራር ስልጠናና ምዘና ስርዓትን በሃገራችን ለመትከል ከኮሪያ ዓለም አቀፍ የትብብር ኤጀንሲ ተሞክሮ የሚቀሰምበት ከመሆኑም በተጨማሪ ከተቋሙ ጋር ግንኙነት በማጠናከር አብሮ ለመስራት የሚያስችል ሁኔታን ለመፍጠር የሚረዳ መሆኑን ተናግረዋል፡፡
ኮይካን በመወከል በሴሚናሩ ላይ ንግግር ያደረጉት በኢትዮጵያ የኮሪያ ዓለም አቀፍ የትብብር ኤጀንሲ ምክትል ዳይሬክተር ሊ ሱንጆ ተቋሙ ወደ አፍሪካ አመራር ልህቀት አካዳሚ መቀየሩን አድንቀው የኮሪያ ዓለም አቀፍ የትብብር ኤጀንሲ ስልጠና የአካዳሚውን የለውጥ ጉዞ የሚያግዝ መሆኑን ተናግረዋል፡፡ ‹‹ይህ ሴሚናር የእውቀት ሽግግርን በማስፋት የተሳካ እንደሚሆን አምናለሁ፡፡›› ሲሉም አክለዋል፡፡
በሴሚናሩ ላይ በአቶ ጥላሁን አረጋና በእሸቴ አበበ (ዶ/ር) ሁለት ጽሁፎች የቀረቡ ሲሆን በቀረቡት ላይ ውይይት በመካሄድ ላይ ይገኛል፡፡

የአፍሪካ አመራር ልህቀት አካዳሚ አመራሮችና ሰራተኞች “የነጩ ፖስታ ጎርፍ ወደ ነጩ ቤተ-መንግስት” ሃገራዊ ዘመቻ መርሃ ግብርን አከናወኑ፡፡
አሸባሪው የህወሀት ቡድን በሀገራችን ላይ እያደረሰ ያለውን ሰብዓዊና ቁሳዊ ውድመት ለአሜሪካ መንግስትና ለመላው አለም አቀፍ ማህበረሰብ ለማድረስ ያለመውን ዘመቻ የአካዳሚው አመራርና ሰራተኞች የነጩ ፖስታ ጎርፍ ወደ ነጩ ቤተ-መንግስት ” መርሀ ግብርን አከናውነዋል፡፡
የአሜሪካ መንግስት በሃገራችን ላይ እያደረገ ያለውን ጫና በመቃወም እውነታውን ለአለም አቀፉ ማህበረሰብ ለማሳወቅ የአካዳሚው አመራሮችና ሰራተኞች በሀገር አቀፍ ደረጃ የተጀመረውን “የነጩ ፖስታ ጎርፍ ወደ ነጩ ቤተ-መንግስት” ሃገራዊ ዘመቻ መርሃ ግብርን ሲያከናውኑ እንደተገለፀው 128 የሚሆኑ የአካዳሚው አመራሮችና ሰራተኞች “የነጩ ፖስታ ጎርፍ ወደ ነጩ ቤተ- መንግስት” ዘመቻን ተቀላቅለው ሀገራዊ ሀላፊነታቸውን ተወጥተዋል፡፡
በመርሀ ግብሩ ላይ የአሜሪካ መንግሰት በአሸባሪው ህወሃት ቡድን የተጋረጠብንን አደጋ ለመመከት የሚደረገውን ትግል ለማደናቀፍና በውስጥ ጉዳያችን ጣልቃ ለመግባት የሚያደርገውን ሙከራ እንዲያቆም ተጠይቋል። የተፈረመው ፖስታም ለአሜሪካ መንግሰት ተልኳል፡፡