ማክሰኞ:- ግንቦት 19 ቀን 2017 ዓ.ም

በዲጂታላዜሽንና በኢትዮ ኢንኮዲስ ስልጠና ዙሪያ የግንዛቤ ማስጨበጫ መድረክ ተደረገ!!

በተቋሙ እየተከናወነ ያለውን የዲጂታላዜሽን የትግበራ ጉዞ እና በኢትዮ ኢንኮዲስ ስልጠና ሂደት ዙሪያ ለኮሌጁ ሰራተኞች የግንዛቤ ማስጨበጫ መድረክ ተዘጋጀ።

በመድረኩ ላይ ተቋሙን ለማዘመን የተተገበሩ የዲጂታላይዜሽን ስራዎች ተነስተዋል።

ከዚህ ባሻገር ከአይ ሲ ቲ የሙያ ዘርፎች ጋር የተያያዙ እና እንደ ሀገር ለ5 ሚሊዮን ዜጎች የስልጠና ዕድል የተመቻቹ 4 ሙያዎች ላይ ሁሉም ሰራተኞችና ሰልጣኞች ተጠቃሚ የሚሆኑበትን ምቹ ሁኔታ በማመቻቸት ዙሪያ ውይይት ተደርጓል።

ስልጠናዎቹ በበየነ መረብ እየተሰጡ ሲሆን ሙያዎቹም ዳታ ሳይንስ ፋንዳሜንታል፣ አንድሮይድ ደቨሎፐር ፋንዳሜንታል፣ ፕሮግራሚንግ ፋንዳሜንታል እና አርቲፊሻል ኢንቴሌጀንት ፋንዳሜንታል ናቸው።

‹‹በላቀ አገልግሎት የመረጃ ተደራሽነት››

ማክሰኞ:- ግንቦት 19 ቀን 2017 ዓ∙ም

ፋዊ ስለስልጠና ድጋፍ ፕሮግራሙ ከባለድርሻ አካላት ጋር ውይይት አካሄደ!!

የአፍሪካ ሴት የትምህርት ባለሙያዎች ፎረም /FAWE/ ከማስተር ካርድ ፋውንደሽን ጋር በመተባበር ስለሚያደርገው የትምህርትና ስልጠና ድጋፍ ፕሮግራም ይዘት ዙሪያ በዛሬ ዕለት ከባለ ድርሻ አካላት በኮሌጁ ውይይት አካሂዷል።

በዕለቱ የፋዊ ኢትዮጵያ ስራ አስኪያጅና የድርጅቱ ሰራተኞች፣ የስራና ክህሎት ሚኒስቴር ተወካዮች፣ የትምህርት ቢሮ ተሳታፊዎች፣ በአዲስ ከተማና በልደታ ክፍለ ከተሞች የሚገኙ 2ኛ ደረጃ ት/ቤቶች ርዕሳነ መምህራንና ተማሪዎች እንዲሁም ከልዩ ልዩ ድርጅቶች ጥሪ የተደረገላቸው ተሳታፊዎች ተገኝተዋል።

ፋዌ ኢትዮጵያ ቻፕተር እና ፋዌ አፍሪካ ከማስተር ካርድ ፋውንደሽን ጋር በመተባበር የሃርድ ስኪል ስልጠና ለሚከታተሉ ሰልጣኞች የትምህርትና ስልጠና ድጋፍ ፕሮግራም ተጠቃሚ እንዲትሆኑ እያደረገ ይገኛል፡፡

እንደ አዲስ አበባ ከተማ አስተዳደር ፕሮጀክቱ የተተገበርባቸው ጀነራል ዊንጌት እና አዲስ አበባ ተግባረ ዕድ ፓሊ ቴክኒክ ኮሌጆች ሲሆኑ በሁለቱ ተቋማት እየሰለጠኑ ለሚገኙ ሰልጣኞች የተለያዩ ድጋፎችን እየሰጠ መሆኑ ተገልጿል።

የዛሬው መድረክ ዓላማ ባለ ድርሻ አካላቱ ስለቴክኒክና ሙያ ስልጠና በቂ ግንዛቤ ኖሯው ወደ ዘርፉ ለሚቀላቀሉ ሰልጣኞች የማስተዋወቅ ስራ እንዲያካሂዱ ለማድረግ ነው ተብሏል።

ፕሮግራሙ 80 ከመቶ ሴቶችን ተጠቃሚ ያደረገ ሲሆን ከእነዚህ ውስጥ ከ5 እስከ 10 ፐርሰንት ለአካል ጉዳተኛ ከ10 እስከ 15 ፐርሰንቱ ደግሞ ለሀገር ውስጥ ተፈናቃይ ዜጎች ዕድል መስጠቱ ታውቋል፡፡

የፕሮጀክቱ ትግበራ ሰባት ዓመት ቆይታ ሲኖረው የመጀመሪያው ዓመት በመጠናቀቅ ላይ ይገኛል።

"በላቀ አገልግሎት የመረጃ ተደራሽነት"

ረቡዕ:- ግንቦት 20 ቀን 2017 ዓ.ም

ለአሰልጣኞችና ለኢንዱስትሪ ባለሙያዎች ሲሰጥ የቆየው የሶላር ክህሎት ስልጠና ተጠናቀቀ!!

ለኮሌጁ ኤሌክትሪካል ኤሌክትሮኒክ አሰልጣኞችና ከኢንዱስትሪዎች ለተውጣጡ የዘርፉ ባለሙያዎች ለ7 ቀናት በተግባር ሲሰጥ የነበረው የሶላር ክህሎት ስልጠና በዛሬው ዕለት ተጠናቋል።

ኮሌጁ በኔዘርላንድ ከሚገኘውና የሶላር ክህሎት ስልጠናን በበጎ ፈቃደኝነት ከሚሰጠው PUM ከሚባለው ድርጅትጋር በመተባበር ለ8 የኢንዱስትሪ ባለሙያዎች እና ለ11 የተቋሙ አሰልጣኞች በሶላር ኃይል አጠቃቀምና ዝርጋታ ዙሪያ ላይ አቅም ለማሳደግ የሚያስችል ተግባራዊ ስልጠና ሲሰጥ መቆየቱ ይታወቃል፡፡

የፅንሰ ሀሳብ ትምህርቱ በበየነ መረብ እንዲሁም የተግባር ስልጠናው ደግሞ በአካል ሲሰጥ ቆይቶ በዛሬው ዕለት ለሰልጣኞች የምስክር ወረቀትና ከPUM ድርጅት ስልጠናውን ሲሰጡ ለነበሩት ኔዘርላንዳዊ ኤክስፐርት ሚስተር ፒተር አልቤዳ ደግሞ የሀገር ባህል ልብስ ስጦታ ተበርክቶላቸዋል፡፡

በሌላ በኩል ሚስተር ፒተር ስልጠና ከመስጠት ባሻገር ለሶላር ዘርፍ ስልጠና መስጫነት የሚያገለግሉ ልዩ ልዩ ግብዓቶችን ለዲፓርትመንቱ በግላቸው አበርክተዋል፡፡

‹‹በላቀ አገልግሎት የመረጃ ተደራሽነት››

አርብ:- ግንቦት 22 ቀን 2017 ዓ∙ም

የኮሌጁ ዲኖች እና ከተለያዩ ዲፓርትመንቶች የተውጣጡ አሰልጣኞች በከተማዋ የተሰሩ ልማቶችን ጎበኙ!!

ወደ 60 የሚሆኑ የኮሌጁ አመራር እና ከተለያዩ ዲፓርትመንቶች የተውጣጡ አሰልጣኞች በዛሬው ዕለት በተለያዩ የከተማይቱ ክፍል በመዘዋወር የተከናወኑ የልማት ስራዎችን ጎብኝተዋል።

ጉብኝት ካደረጉባቸው መካከል ለመዝናኛው ኢንዱስትሪ ቅንጡ ሆኖ የተሰራው የቦሌ ቡልቡላ ፓርክ፣ ግዙፉና ተጠቃሚው ማኅበረሰብ በቀጥታ ከአምራቹ ሸመታ የሚያደርግበት የለሚ ኩራ ገበያ ማዕከል፣ ዘመናዊው አዲስ ዓለም አቀፍ ኮንቬክሽን ማዕከል እና በዲጂታላይዜሽን ስርዓት ዘምኖ የተቀላጠፈ አገልግሎት የሚሰጥበት የአዲስ አበባ ከተማ አስተዳደር ሲቪል ምዝገባና ነዋሪዎች አገልግሎት ኤጀንሲ ይገኙበታል።

"በላቀ አገልግሎት የመረጃ ተደራሽነት"

ሰኞ:- ግንቦት 25 ቀን 2017 ዓ.ም

ለኢንተርፕራይዝ አንቀሳቃሾች ተሞክሮ የማስፋት መድረክ ተካሄደ!!

በኮሌጁ የቴክኖሎጂ ልማት እና ኢንዱስትሪ ኤክስቴንሽን አገልግሎት ምክትል ዲን ቢሮ ለኢንተርፕራይዝ አንቀሳቃሾች ተሞክሮ የማስፋት መድረክ ተካሄደ፡፡

በቴክኖሎጂ ልማት እና ኢንዱስትሪ ኤክስቴንሽን አገልግሎት ምክትል ዲን ቢሮ የኢንዱስትሪ ኤክስቴንሽን አገልግሎት ዘርፍ በ4ቱ የድጋፍ አግባቦች ተጠቅመው ውጤታማ የሆኑ 2 ኢንተርፕራይዞች ላይ ተሞክሮ በመቀመር ሌሎች አንቀሳቃሾችም ልምዱን ተጋርተው ስኬታማ ይሆኑ ዘንድ ዛሬ ግንቦት 25 ቀን 2017 ዓ.ም ከበርካታ ኢንተርፕራይዞች ለመጡ አንቀሳቃሾች ተሞክሮውን የማስፋት ስራ ተሰርቷል፡፡

ተሞክሮ የተቀመረባቸው 2ቱ ኢንተርፕራይዞች እስጢፋኖስ፣ ብሩና ጓደኞቹ እጨት ስራ እንዲሁም በጌታ ፍቃድ ልብስ ስፌት የሚባሉ መሆናቸው ተገልጿል፡፡

በዚህ መድረክ ላይ 84 የሚሆኑ የኢንተርፕራይዝ አንቀሳቃሾች እንዲሁም የክፍለ ከተማና የወረዳዎች ባለ ድርሻ አካላት ተገኝተዋል፡፡

በዚህ መድረክ ላይ የተገኙ አንቀሳቃሾችም በቀረበው ሰነድ እጅግ ተደስተው ቀጣይ እንደየ ስራ ዘርፋቸው ባህርይ በማጣጣም ይህንን ልምድ ለኢንተርፕራይዞቻቸው ለውጥ እንደሚጠቀሙበት ተናግረዋል፡፡

"በላቀ አገልግሎት የመረጃ ተደራሽነት"