ឯកឧត្តម នាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា បានជួបសំណះសំណាលជាមួយមន្រ្តី និងក្រុមជម្រើសជាតិកម្ពុជា នៅព្រឹកថ្ងៃសៅរ៍ ទី១៤ ខែធ្នូ ឆ្នាំ២០២៤។ ខ្លឹមសារ ស្មារតីនៃជំនួបសំណះសំណាលមានដូចខាងក្រោម៖

១. ក្រុមជម្រើសជាតិកម្ពុជានៅសល់ពីរប្រកួតទៀតនៅក្នុងពូលរបស់ខ្លួន ក្នុងការប្រកួតពានរង្វាន់ ASEAN Mitsubishi Electric Cup™ 2024។ ហើយឱកាសសម្រាប់ឡើងទៅវគ្គបន្ត គឺយើងនៅមាននៅឡើយ ដូច្នេះឆន្ទៈនៅក្នុងការត្រៀម ហ្វឹកហ្វឺនសម្រាប់ការប្រកួតដណ្តើមយកលទ្ធផលល្អ និងជ័យជម្នះជូនជាតិ ភារកិច្ចនេះក្រុមជម្រើសជាតិកម្ពុជា នៅតែមានឆន្ទៈមុះមុតបន្ត។

២. ជាមួយនឹងការបន្តទៅមុខរបស់ក្រុមជម្រើសជាតិកម្ពុជា ដោយបញ្ហារបួស កីឡាករ ២នាក់នឹងត្រូវអវត្តមាន
- កីឡាករ កាន់​ ម៉ូ ក្រោយពីទទួលបានការព្យាបាល ‌‌ឥឡូវកំពុងស្ថិតនៅក្រោមការតាមដានស្ថានភាពបន្តចំនួន​ ១សប្ដាហ៍ទៀត នៅប្រទេសសិង្ហបុរី។
- កីឡាករ គឹម សុខយុទ្ធ ស្ថានភាពរបួសសរសៃពួរ ត្រូវការពេលសម្រាកព្យាបាលចំនួន ៣ខែ និងត្រូវត្រលប់ទៅក្លិបបាល់ទាត់ខ្លួនវិញសម្រាប់ការព្យាបាលបន្ត។

៣. ចំពោះករណីដែលបានកើតឡើង ហើយមើលទៅមានភាពមិនប្រក្រតីខុសពីធម្មតា សម្រាប់ការប្រកួតកន្លងមក សហព័ន្ធកីឡាបាល់ទាត់កម្ពុជា​បានសហការជាមួយអាជ្ញាធរមានសមត្ថកិច្ច បានបើកការស៊ើបអង្កេតអំពីករណីនោះហើយ ដើម្បីជម្រះនូវមន្ទិលសង្ស័យដែលមាន។ ចំពោះមន្រ្តី និងកីឡាករទាំងអស់ ដែលស្មោះត្រង់ និងមិនពាក់ព័ន្ធ គឺគ្មានអ្វីត្រូវព្រួយបារម្ភចំពោះសុច្ចរិតភាពរបស់ខ្លួនឡើយ។

៤. ដើម្បីប្រមូលផ្ដុំ និងប្រមូលអារម្មណ៍ឡើងវិញជាធ្លុងមួយ ដោយមិនមានការរំខានពីកត្តាខាងក្រៅ​ ក្រុមជម្រើសជាតិកម្ពុជានឹងបន្តហ្វឹកហាត់ដោយបិទទ្វារ រហូតដល់ការហ្វឹកហាត់ផ្លូវការ និងការប្រកួតតែម្ដង។

"ទាំងអស់គ្នាដើម្បីកម្ពុជា"

Credit: FFC 🇰🇭

#FootballFederationofCambodia #FFC
#TogetherforCambodia #Camfootball1933 #Cambodia #meeting #ffcpresident

ឯកឧត្តម នាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា បានជួបសំណះសំណាលជាមួយមន្រ្តី និងក្រុមជម្រើសជាតិកម្ពុជា នៅព្រឹកថ្ងៃអាទិត្យ ទី២២ ខែធ្នូ ឆ្នាំ២០២៤ ក្រោយបញ្ចប់ភារកិច្ចក្នុងព្រឹត្តការណ៍ ASEAN Mitsubishi Electric Cup™ 2024។ ដោយមើលពីការខិតខំប្រឹងប្រែង និងកម្រិតនៃការលេងរបស់ក្រុមជម្រើសជាតិកម្ពុជាប្រសើរជាងមុន សហព័ន្ធកីឡាបាល់ទាត់កម្ពុជា ក្រុមហ៊ុន វឌ្ឍនៈ ប្រ៊ូវើរី និងសប្បុរសជន បានឧបត្ថម្ភដល់ក្រុមជម្រើសជាតិកម្ពុជា​ ជាទឹកប្រាក់ក្នុងម្នាក់ចំនួន ១,០០០ដុល្លារ ដើម្បីលើកទឹកចិត្ត ទោះបីជាមិនបានឡើងទៅវគ្គបន្ទាប់ក៏ដោយ។ បន្ថែមពីនេះ ដោយបានពិនិត្យមើលនៅក្នុងការពង្រឹងក្រុមជម្រើសជាតិកម្ពុជា​នៅពេលអនាគត ក៏បានលើកឡើងនូវគោលបំណងដែលនឹងត្រូវអនុម័តក្នុងមហាសន្និបាតសហព័ន្ធកីឡាបាល់ទាត់កម្ពុជានៅដើមឆ្នាំ ២០២៥ គឺការបែងចែកចំណូលពីការលក់សំបុត្រនៃការប្រកួតក្នុងទឹកដីទាំងអស់ បន្ទាប់ពីទូទាត់ចំនាយនៃការរៀបចំការប្រកួត និងបង់ពន្ធជូនរាជរដ្ឋាភិបាលរួច ទឹកប្រាក់សល់ពីនោះនឹងធ្វើការបែងចែកជា ៤ផ្នែកដូចខាងក្រោម៖

១. ចំណូល ២៥% ផ្ដល់ជូនកីឡាករ និងក្រុមការងារគ្រូបង្វឹកនៃក្រុមជម្រើសជាតិកម្ពុជា
២. ចំណូល ២៥% ផ្ដល់ជូនក្លិបបាល់ទាត់ដែលមានកីឡាករជាប់ជម្រើសជាតិក្នុងព្រឹត្តិការណ៍
៣. ចំណូល ២៥% សម្រាប់ការថែទាំសុខភាព និងសុខុមាលភាពរបស់កីឡាករ
៤. ចំណូល ២៥% សម្រាប់សហព័ន្ធកីឡាបាល់ទាត់កម្ពុជា ចំនាយទៅលើការអភិវឌ្ឍបាល់ទាត់។

"ទាំងអស់គ្នាដើម្បីកម្ពុជា"

Credit: FFC 🇰🇭

#FootballFederationofCambodia #FFC
#TogetherforCambodia #Camfootball1933 #Cambodia #meeting #ffcpresident