Masalan, Tarbiya fani o'qituvchilari uchun test spetsifikatsiyasiga, aniqrog'i, mavzular ro'yxatiga e'tibor bering:

1.1.1. Rostgo‘ylik va burchni his etib yashash.
1.1.2. Inson ezgulik ijodkori.

va hokazo ...

O'qituvchilarning malaka sinovlari uchun test tuzishga mas'uliyatni bo'yniga olgan Pedagogik mahorat va xalqaro baholash ilmiy-amaliy markazi bunday mavzularda qanday test savollari tuzmoqchi?

"Novda"ning matematika darsliklaridagi misol va masalalarni ota-onalar ijtimoiy tarmoqlar yordamida yechmoqda.

Menga esa bir narsa qiziq. Rossiyada nashr qilingan Petersson oʻquv qoʻllanmasidan andaza olingan va deyarli har bir mavzuga (aloqasi boʻlsa-boʻlmasa) kiritib tashlangan bunday topshiriqlardan - matematik amallarni bajarib, soʻz chiqarish topshiriqlaridan qanday taʼlimiy maqsad koʻzlangan? Shaxsiy tajribamdan - bunday topshiriqlar oʻquvchini matematikadan bezdirishga xizmat qilyapti, qiziqtirishga emas.

Pedagog, ona tili boʻyicha Milliy oʻquv dasturi va darsliklar mualliflaridan biri Shokir Tursun attestatsiya uchun test topshiriqlari spetsifikatsiyasi haqida.

"Har doim qilgan ishingizni qilsangiz, har doim olgan natijangizni olasiz".

Albert Eynshteynga nisbat beriladigan bu iqtibos haqiqatda unga tegishlimi yoki yo'q, bilmayman, lekin to'g'ri gaplar. Ta'limdagi yondashuvlarimiz hozirgi holatga olib keldi. Masalan, baholashda - xoh u o'quvchini baholash bo'lsin, xoh o'qituvchini - baholashda uning darslikni qay darajada yodlaganligini tekshirib kelganmiz: o'qituvchilar attestatsiyasi vakolatlari Davlat test markazida bo'lganda ham shu edi, Ta'lim sifatini nazorat qilish inspeksiyasida ham va mana endi vazirlik huzuridagi agentlik huzuridagi Pedagogik mahorat va xalqaro baholash ilmiy-amaliy markazi ham. Shu holatga olib kelgan yondashuvlarimizni o'zgartirmas ekanmiz, ta'limning maqsadi haqida o'zimiz aniq bir to'xtamga kelmas ekanmiz, xalqaro tadqiqotlar natijalaridan xulosalar chiqarmas ekanmiz, yangi-yangi ilmiy-amaliy, ilmiy-metodik va hokazo va hokazo markazlar, loyiha ofislari tashkil qilishimiz, "chora-tadbirlar rejalari" va "yo'l xaritalari" tuzishimiz, vakolatlarni bir idoradan olib boshqasiga berishimiz hech qanday samara keltirmaydi.

Oʻqituvchini himoya qila olmayotgan qonun. "Tirilayotgan" kollejlar. "Tish ogʻrigʻi" boʻlgan darsliklar. Maqsadini bilolmay sarson taʼlim.

Taʼlimga oid soʻnggi yangiliklarni jurnalist Sarvar Usmon va oʻqituvchi Shohroʻz Umarjon bilan muhokama qildik.

Ijtimoiy tarmoqlardagi suratlarga qaraganda, "Zakovat" rebrending qilib, yangi logo tanlaganga oʻzshaydi. Qizil Z.

Yoniga V qoʻshib qoʻyaverishmabdi ....

Umuman olganda, oʻtgan yilgi ayrim voqealardan keyin "Zakovat" men uchun qiymatini yoʻqotgan - loyiha shaxsan men uchun intellekt, topqirlik bilan emas, boshqa narsa bilan assotsiatsiya uygʻotadi. Xuddi "Zakovat"ning "parent" loyihasi ikki yil oldin qiymatini yoʻqotgandek. Bu rasmni esa ijtimoiy tarmoqlarda tasodifan koʻrib qoldim. Albatta, bu loyiha ijodkorlarining erkin tanlovi - qanday xohlasa, shunday logo tanlash. Qizil Z fonida xursandchilik qilgisi kelsa - ixtiyor oʻzlarida...

P.S. Bu gʻirt shaxsiy fikr va har kim bu fikrga qoʻshilish va yoki qoʻshilmaslik huquqiga ega.

"Nima? Qachon? Qayerda?"("Что? Где? Когда?")ning intellektual oʻyindan propaganda quroliga aylanib borayotgani haqida. Koʻp mashhur bilimdonlar, (masalan, Denis Aliakberov, Rovshan Askerov, Ilya Novikov) klubni tark etishdi, ayrimlariga Rossiyada jinoiy ish ochildi, ayrimlari (masalan, Ilya Novikov) Ukraina manfaatlarini himoya qilmoqda.

"Nima? Qachon? Qayerda?" "Zakovat"ga andoza boʻlib xizmat qilgan. Shuningdek, "Zakovat" "Nima? Qachon? Qayerda?" assotsiatsiyasining aʼzosi hisoblanadi.

Qoʻrqamanki, taʼlimga kuch ishlatar tuzilmalarni jalb qilish yaxshi oqibatlarga olib kelmaydi.

Oʻquvchining maktabga kelmasligi - jinoyat emas, terrorizm emas. Bu - muammo. Muammoning ildizi aksar hollarda yoki maktabdagi taʼlim sifati bilan bogʻliq boʻladi (masalan, oʻquvchi bu paytda repetitorda boʻladi), yoki oiladagi iqtisodiy, ijtimoiy sabablar tufayli boʻladi. Demak, muammoning ildiziga yetish, oqibat emas, sababni hal qilish kerak - bu zinhor Milliy gvardiyaning (yoki boshqa harbiy, yarim harbiy) strukturaning ishi emas, Maktabgacha va maktab taʼlimi vazirligining ishi, agar oʻquvchining maktabga kelmayotgani ortida oila bilan bogʻliq vaziyat boʻlsa, ijtimoiy himoya organlarining ishi.

Biratoʻla DXXni jalb qilib qoʻya qolmabsizlar-da. Davomat 100% boʻlardi ...

Mavzuga doir video.

"Oʻquvchi darsga ikkinchi soatga kelsa, oʻqituvchi jazolanadi".

Milliy gvardiyada (yoki boshqa kuch ishlatar tuzilmada) taʼlim jarayoniga aralashish, oʻqituvchiga chora koʻrish vakolati bormi? Yaqinda qabul qilingani bilan vazirlik tabriklagan "Pedagogning maqomi toʻgʻrisida"gi qonun nima boʻldi shunda? Unda "pedagogning kasbiy faoliyatiga aralashish taqiqlanadi" deyilmaganmidi?

Keyin, maktab oʻquvchisiga - u dars qoldirgan, telefon oʻynagan yoki boshqa "qilmish" sodir etganidan qatʼiy nazar - kuch ishlatar tizim xodimining jinoyatchiga muomala qilganday muomala qilishi - bola psixologiyasiga qanday taʼsir qiladi? Maktabga, oʻqishga muhabbat shakllantirishga yordam beradimi?

Muammo bilan emas, muammoni aytganlar bilan shug'ullanish

Maktabgacha va maktab ta'limi vazirligi axborot xizmati rahbari Dilfuza Sobirova Milliy gvardiya xodimlari, vazirlik xodimlari bilan birgalikda ishchi guruh tarkibida "umumta’lim muassasalarida o‘quvchilarning darslardagi ishtirokini ta’minlash, ularning ta’lim-tarbiyasini ota-onalar va mahalla faollari bilan hamkorlikda tashkil etish bo‘yicha o‘rganish ishlari olib bormoqda", mazmunida bayonot bilan chiqibdilar. Dilfuza Sobirovaning aytishlaricha, maktablardagi inspektor-psixologlar shtati Ichki ishlar vazirligidan Milliy gvardiya tizimiga o‘tkazildi.

Men o'zimning fikrimda qolaman: o'quvchining maktabgacha kelmaslikgi jinoyat emas, muammo va bu muammo bilan vazirlik (kerak bo'lsa, ijtimoiy himoya xodimlari bilan birga) shug'ullanishi kerak, kuch ishlatar tuzilmalar vakillari emas. Ota-onaga qo'rqinchli ogohlantirish xatlari berish orqali, o'quvchilarni va o'qituvchilarni formali xodim bilan qo'rqitish orqali muammoni hal qilib bo'lmaydi. Maktab - bolani qo'rqitib, tahdid bilan olib keladigan katorga emas, o'quvchi uchun xavfsiz, do'stona muhit bo'lishi kerak. Shundagina o'rganish jarayoni ro'y beradi. Maktabga kelmayotgan o'quvchilar bilan bola psixologiyasini, bola tilini tushunadigan, bola ishonadigan mutaxassis shug'ullanishi kerak, jinoyatchilar bilan ishlaydigan psixolog emas.

Maktabgacha va maktab ta'limi vazirligi axborot xizmati rahbari bayonotida yana bir yangi (har qalay, ilgari men sezmagan) jihat e'tiborimni tortdi: "Shu o‘rinda, yolg‘on va asossiz mazmundagi xabarlarni tarqatganlik uchun mamlakatimiz qonunchiligiga muvofiq tegishli jazo choralari qo‘llanishini eslatib o‘tamiz", deyiladi bayonot oxirida. Bayonotda bu po'pisa kimga qaratilgani, kim(lar) yolg'on axborot tarqatganligi ochiqlanmagan. Bayonotda faqat "pedagoglar faoliyati boshka tashkilotlar tomonidan nazorat qilinadi, degan mazmunda tarqatilayotgan xabarlar asossiz ekani" ma’lum qilingan.

Ijtimoiy tarmoqlarda tarqalgan va kecha men ham postimda havola bergan videoda formali xodimning, shu jumladan, quyidagi gaplarini eshitish mumkin: "... Bugundan boshlab sinfga umuman telefon olib kirilmaydi. Hamma telefon mana bu yerda, o'qituvchilarda qoladi, quti qilib qo'yasizlar. ... Har kuni davomat. Soat 8-00da kirish to'xtaladi. ... Ikkinchi soatga keldimi, o'qituvchi jazolanadi".

Dilfuza Sobirovaga savollar: Opa, darsga telefon olib kirilishi yoki kirilmasligi, o'quvchi va xodimlarning maktabga soat nechida kirishi yoki kirmasligi, o'quvchi darsga kechiksa yoki kelmasa o'qituvchiga jazo berish - bular ta'lim jarayoniga aralashishmi? Milliy gvardiyaga ta'lim jarayoniga aralashish vakolati berildimi? Agar "ha" bo'lsa", "Pedagogning maqomi toʻgʻrisida"gi qonun nima boʻldi? Agar "yo'q" bo'lsa, "yolg‘on va asossiz mazmundagi xabarlarni" kim tarqatyapti? Videodagi formali xodimmi? Yoki video feykmi?

Qachon muammo haqida gapirganlar bilan emas, muammoning ildizi, sabablari bilan qiziqishni boshlaymiz?

Maktabgacha va maktab taʼlimi vazirligi axborot xizmati rahbari Dilfuza Sobirova "yolgʻon va asossiz mazmundagi xabarlarni tarqatganlik uchun tegishli jazo qoʻllanilishi" bilan pisanda qilayotgan bir paytda, Milliy gvardiyaning taʼlim jarayoniga aralashuvi haqida ijtimoiy tarmoqlarda xabarlar tarqalishda davom etmoqda.

Oʻsha gap: taʼlim, xususan, davomat - kuch ishlatar, harbiy yoki yarim harbiy strukturalarning ishi emas. Maktabdan "rejimli muassasa" yasash urinishlari taʼlim uchun xayrli oqibatlarga olib kelmaydi.

Umuman, taʼlimga masʼul tashkilotlar haddan tashqari koʻpayib ketmadimi?

- Administratsiyadagi ijtimoiy rivojlanish departamenti

- Administratsiyaga boʻysunadigan Taʼlim sohasidagi loyihalar markazi (Loyiha ofisi)

- Administratsiyaga boʻysunadigan Taʼlimni rivojlantirish respublika ilmiy-metodik markazi

Mana endi, bular qatoriga Milliy gvardiya ham qoʻshilganga oʻxshaydi.

Bularning ichida Maktabgacha va maktab taʼlimi vazirligining oʻrni qayerda? Qaysi bir tashkilotning vakolati qayerda boshlanib, qayerda tugaydi? Taʼlim uchun masʼul idoralarni koʻpaytirib tashlash - vazirlik oʻz ishini eplay olmayotganidan darak beradi, deyish mumkinmi? Agar shunday boʻlsa, taʼlimga aralashish vakolatiga ega idoralar sonini koʻpaytirib tashlash - muammoning samarali yechimimi?

Yoki maqsad, ijtimoiy tarmoqlarda ayrimlar yozishganiday, taʼlim sifati, "tish ogʻrigʻi" boʻlib qolgan darsliklar, taʼlimning aniq maqsadini belgilay olmayotganimiz, taʼlim ustidagi tinimsiz tajribalar singari jiddiyroq muammolardan chalgʻitishmi? Tarmoqlardagi xaloyiq jiddiyroq muammolarni muhokama qilganidan koʻra, Milliy gvardiyaning davomatni taʼminlash borasidagi "saʼy-harakatlari"ni muhokama qilgani maʼqulroqmi?

"Xalq taʼlimi info" kanali taʼlimga masʼul idoralar koʻpaygandan koʻpayib, qaysi birining vakolati qayerda tugashi, qaysi biri nimaga javob berishi mavhum qolayotgan bir paytda, Taʼlimda loyihalar markazi tashkil qilinishi fonida oʻtgan yili tashkil qilingan, katta vakolatlar berilgan va katta oyliklar belgilangan Taʼlimni rivojlantirish ilmiy-metodik markazi nima qildi? degan haqli savolni qoʻymoqda. Kanal administratori "qilingan ishlar tahlili haqida balki keyinroq toʻxtalarmiz" demoqda - uning tahlilini kutib qolaman (shaxsan men uchun qiziq).

TRMning rasmiy kanalidan olingan videoda taqdim qilingan "markazning 2023-yildagi natijalari"ning ayrimlarini tahlil qilamiz.

1. Markaz xodimlari xalqaro va mahalliy ilmiy jurnallarda, konferensiyalarda 50dan ortiq ilmiy maqolalar eʼlon qilishgan ekan. Bu maqolalar bilan markazning rasmiy manbalarida tanishish imkoni bormi? Bu maqolalarda qanday ilmiy xulosalar, takliflar ilgari surilgan?

2. "Oʻquv dasturlari oʻquv natijalarini baholash komponenti loyihasi" ishlab chiqilgan ekan. Oʻsha komponent bilan qaysi manbada tanishsa boʻladi? Markaz baholashga qanday yondashuvni taklif qilmoqda? Masalan, maktablarda tajriba-sinovdan oʻtkazilayotgan va yana 1000ta maktabga joriy qilinadigan "summativ baholash tizimi"ning (ChSB BSBlar) ijobiy va salbiy taʼsirini ilmiy tahlil qildimi? Qanday xulosalarga kelindi?

3. VM qarori loyihasi ishlab chiqilgan ekan. Unga koʻra, bilimga yoʻnaltirilgan taʼlim standartlaridan natijaga yoʻnaltirilgan taʼlim standartlariga oʻtilar ekan, har bir bosqich uchun oʻquvchida shakllantiriladigan kompetensiyalar aniq belgilab berilar ekan. Axir, markaz "Novda" darsliklarini olib kirishidan oldin prezident farmoni asosida joriy qilib kelinayotgan Milliy oʻquv dasturi loyihasida bu narsalar qilib boʻlingan edi-ku: umumiy oʻrta taʼlimning oxirida kutilayotgan natijalar va taʼlimning har bir bosqichi (sinfi) yakunida oʻquvchilar egallashi kerak boʻlgan kompetensiyalar belgilab berilgan edi-ku?

4. Oʻquvchilar natijalarini kodlashtirish strukturasi ishlab chiqilgan ekan. Bu ham Milliy oʻquv dasturi loyihasida bor edi-ku?

5. PISA 2022 natijalari yuzasidan tahlillar va tavsiyalar ishlab chiqilgan ekan. Qani oʻsha tahlillar, tavsiyalar? Masalan, mening tahlil va tavsiyalarim bilan Gazeta.uz da istagan kishi tanishishi mumkin (1-qism, 2-qism). Sizlar ishlab chiqqan tahlil va tavsiyalar bilan qaysi manbada tanishsa boʻladi?

6. PhET simulyatsiyasidan foydalanish boʻyicha memorandum imzolangan ekan. Markaz memorandum imzolab turgan bir paytda Yoshlar ishlari agentligi platformani tarjima qilib, istalgan odam foydalanishi uchun ochiq eʼlon qilib boʻldi shekilli?

Davomi bor...

Oldingi postga qiziq (va qoʻrqinchli) izoh:

Talimga hamma xo'jayin, natijaga hech kim mas'ul emas.