የፌዴሬሽን ምክር ቤት የአሠሪና ሠራተኛ አዋጅ በዓለም ዓቀፍ ድርጅቶች ላይ ስላለው ተፈጻሚነት የሰጠው የህገ-መንግስት ትርጉም
በአሠሪና ሠራተኛ ህግ አፈጻጸም አስቸጋሪ ሆነው ከቆዩት ጉዳዮች አንዱ አዋጁ በዓለም ዓቀፍ ድርጅቶችና ዲፕሎማቲክ ሚሲዮኖች ላይ ያለውን ተፈጻሚነት ይመለከራል። በእርግጥ በዚህ ጉዳይ ላይ አዋጁ ግልጽ ነው።
ኢትዮጵያ በፈረመቻቸው ዓለም ዓቀፍ ስምምነቶች አዋጁ ተፈጻሚ እንዳይሆን ካልተደረገ በቀር የአዋጁ ተፈጻሚነት ጥያቄ ውስጥ አይገባም
ሆኖም ትልቁ ችግር የአዋጁ የተፈጻሚነት ወሰን ሳይሆን እነዚህ ድርጅቶች ከዓለም ዓቀፍ ስምምነቶች ወይም ከኢትዮጵያ መንግስት ጋር ከሚያደርጉት ስምምነት የመነጨ ያለ መከሰስ መብት ስለሚኖራቸው የስራ ክርክር ጉዳይ ሳይታይ ክሱ ወዲያው ውድቅ ይደረጋል።
በ ሰ/መ/ቁ 98541 ቅጽ 17 (አመልካች አቶ አለማየሁ ኦላና እና ተጠሪ የተባበሩት መንግስታት የልማት ድርጅት (UNDP) ህዳር 10 ቀን 2007 ዓ.ም.) ተጠሪ በዋናው ክርክር ሳይከራከር መዝገቡ አፈጻጸም ደረጃ ላይ እያለ ያለ መከሰስ መብቱ በምክንያትነት ተጠቅሶ አመልካች በፍርድ ያገኙትን መብት ተነጥቀዋል።

የፌዴሬሽን ምክር ቤት የሰጠው የህገ-መንግስት ትርጉም በተወሰነ መልኩ ይህንን ኢ-ፍትሐዊ የመብት መጣስ የሚያስቀር ይመስላል።
ምክር ቤቱ በውሳኔው ላይ ለሁለት መሰረታዊ ነጥቦች እልባት ሰጥቷል። ይኸውም

1. ያለ መከሰስ መብት ተፈጻሚነቱ ከዲፕሎማቲክ መብትና ድርጊት ጋር በተያያዘ እንጂ በአሠሪና ሠራተኛ ጉዳይ ጋር የሚያያዝ አይደለም።

2. ዓለም ዓቀፍ ድርጅቶች ከኢትዮጵያ መንግስት ጋር በገቡት ውል መሰረት ያለ መከሰስ መብት ሲያገኙ በውሉ የተመለከተው የአለመግባባት መፍቻ መንገድ ተግባራዊ መሆን ካልቻለ የኢትዮጵያ ፍርድ ቤቶች ጉዳዩን አይቶ የመዳኘት ስልጣን አላቸው። @Lawsocieties