ብልጽግና ፓርቲ በ2ኛ መደበኛ ጉባኤው ባሳለፋቸው ውሳኔዎችና አቅጣጫዎች ዙሪያ
የአፍሌክስ አመራር እና ሰራተኞች ውይይት አደረጉ::

አዲስ አበባ፣ የካቲት 18፣ 2017 (አፍሌክስ) ብልጽግና ፓርቲ በ2ኛ መደበኛ ጉባኤው ባሳለፋቸው ውሳኔዎችና አቅጣጫዎች የአፍሌክስ አመራር እና ሰራተኞች ውይይት አድርገዋል::

አቶ ማቴዎስ ዳንኤል ባቀረቡት ገለፃ ላይ እንደጠቀሱት ፓርቲው በ2ኛ ጉባኤው የዜጎችን ተጠቃሚነት ከፍ የሚያደርጉ ውሳኔዎችን አሳልፏል።

የውይይቱም ዓላማ በመንግሥት ውሳኔዎች እና አቅጣጫዎች ላይ ለአካዳሚው ማህብረሰብ ለማስጨበጥ ያለመ ነው ብለዋል።

የአካዳሚው አመራር እና ሰራተኞች የመንግስትን ቁልፍ አጀንዳዎች በመረዳት ለሀገራችን ብልፅግና እንዲተጉ ውይይቱ ትልቅ ሚና እንዳለውም ጠቁመዋል።

ፓርቲው በሰጠው አመራር በየመስኩ ስኬቶችን ማስመዝገቡን የጠቀሱት አቶ ማቴዎስ: አስሩን የውሳኔ አቅጣጫዎች አስታውሰው ዘላቂ ሰላምን ማረጋገጥ፣ የዘርፎች ሪፎርም፣ በምግብ ራስን የመቻል እንዲሁም የትላልቅ ፕሮጀክት ግንባታ አፈጻጸምን በማሳያነት ጠቅሰዋል።

አቶ ማቴዎስ አያይዘውም በቀጣይም ጠንካራ ፓርቲ መገንባት፣ አንድ የሚያደርጉ አሰባሳቢ ትርክቶችን መፍጠር፣ ዘላቂ የሰላም ግንባታ ሥራዎችን ማጠናከር ላይ አቅጣጫ በማስቀመጥ ወደ ሥራ መግባቱንም ተናግረዋል፡፡

በኢኮኖሚው መስክም እስካሁን የተመዘገቡ ስኬቶችን በማስቀጠል ከዚህ ዓመት ጀምሮ በቀጣይ ተከታታይ ዓመታት 8 ነጥብ 4 በመቶ አማካይ እድገት ግብ መያዙን ጠቅሰዋል።

አፍሌክስ የጀመራቸውን የለውጥ የማስፋትና የሽግግር ስራዎች ቀጣይነት ባለው ውጤታማ አፈፃፀም መቀጠል አለበት ተባለ::

የአፍሪካ አመራር ልህቀት አካዳሚ አመራር እና ሰራተኞች የ2017 በጀት አመት የመጀመሪያው ግማሽ አመት እቅድ አፈፃፀም ላይ ተወያይተዋል።

የአካዳሚው ፕሬዝዳንት አቶ ዛዲግ አብርሃ የ2017 ዓ.ም የግማሽ አመት እቅድ አፈጻጸም ውይይት ላይ ተገኝተው እንደተናገሩት: አፍሌክስ የጀመራቸውን የለውጥ የማስፋትና የሽግግር ስራዎች ቀጣይነት ባለው የአፈፃፀም መንገድ መቀጠል እንዳለበት ጠቅሰው: የተቋሙ አመራር እና ሰራተኞች ለዕቅዱ መሳካት ጥረታቸውን አጠናክረው እንዲቀጥሉ የስራ መመሪያ ሰጥተዋል።

በአፍሌክስ የስትራቴጂ ጉዳዮች ስራ አስፈጻሚ አቶ ሲሳይ ዘሪሁን የአካዳሚውን የ2017 ዓ.ም የስድስት ወራት የእቅድ አፈጻጸም ሪፖርት አቅርበዋል።

በተቋማዊ አፈጻጸም እና አቅም ግንባታ ላይ የተመዘገቡ ለውጦችን ያነሱት አቶ ሲሳይ ከ33 በላይ ከሚሆኑ ተቋማት ለተውጣጡ ከ2 ሺህ 900 በላይ ሰልጣኞች የአመራር ልማት ስልጠና እንደተሰጠም ጠቁመዋል።

የፀረ-ሙስና ተግባራትን ከመከወን አኳያ የሥነምግባር እና የሞራል እሴት ግንባታን የማጎልበት ስራ መሰራቱ በተጨማሪም የአመራር ልማት ማዕከሉን ለማዘመንና የአገልግሎት አሰጣጥ ቅልጥፍናን ለማሳደግ የተደረገው ጥረት በገለጻው ዕውቅና የተሰጣቸው ተግባራት ናቸው።

አካዳሚው በኮሙዩኒኬሽን ዘርፍ ጉልህ እድገት ማስመዝገቡ ሲገለጽ ተቋሙን በማህበራዊ ሚዲያ በማስተዋወቅ እንዲሁም በተቋሙ ውስጥ የሚካሄዱ ሁነቶች በመገናኛ ብዙሃን የሚያገኙት የሚዲያ ሽፋን አድጓል ተብሏል።

እነዚህና ሌሎች ክንውኖች በድምር በሃብት አሰባሰብ ረገድ አካዳሚው ካለፉት አመታት የተሻለ አፈጻጸም እንዲያስመዘግብ ማስቻላቸው ተገልጿል።