የአፍሪካ አመራር ልህቀት አካዳሚ እና ባህልና ስፖርት ሚኒስቴር በጋራ ለመሥራት የሚያስችላቸውን ስምምነት ተፈራረሙ፡፡
ታህሳስ 24/2017 (አፍሌክስ- ሱሉልታ) የአፍሪካ አመራር ልህቀት አካዳሚ እና ባህልና ስፖርት ሚኒስቴር በአመራር አቅም ግንባታ ላይ በጋራ ለመሥራት የሚያስችላቸውን ስምምነት ተፈራርመዋል፡፡
ስምምነቱን የአፍሪካ አመራር ልህቀት አካዳሚ ፕሬዝዳንት አቶ ዛዲግ አብርሃ እና የባህልና ስፖርት ሚኒስትሯ ክብርት ሸዊት ሻንካ ሱሉልታ በሚገኘው የአፍሪካ አመራር ልህቀት አካዳሚ ተገኝተው ተፈራርመዋል፡፡
ስምምነቱ የባህል እና ስፖርት ሚኒስቴር እና አፍሌክስ የአመራር ዕውቀትና ክህሎትን በማስፋት ላይ ያተኮሩ የጋራ የሥልጠና፣ የምርምር እና የማማከር ሥራዎችን ወደ ፊት የሚያሳድጉበት እና በአመራር አቅም ግንባታ ላይ በጋራ ለመሥራት የሚያስችላቸው መሆኑ ተገልጿል፡፡
የአፍሪካ አመራር ልህቀት አካዳሚ ፕሬዝዳንት አቶ ዛዲግ አብርሃ በስምምነት ፊርማው ወቅት እንደገለጹት፥ ባህል እና ስፖርት ለሀገር ያለውን ጉልህ ማህበራዊ እና ኢኮኖሚያዊ ሚና ጠቅሰው ስምምነቱ በኢትዮጵያ ባህል እና ስፖርት ላይ ጉልህ የአመራር ለውጥ እንደሚያመጣ እና ዘርፉ ብቃት ባላቸው አመራሮች እንዲመራ አቅም የሚፈጥር መሆኑን ተናግረዋል፡፡
የባህልና ስፖርት ሚኒስትሯ ክብርት ሸዊት ሻንካ በበኩላቸው፤ ስምምነቱ በዋናነት የሴክተሩን የማስፈፀም አቅም ለማሳደግና፣ የተሻለ ስልጠና ለመስጠት እና የሰለጠነ የሰው ሃይል ለማፍራት የሚያግዝ ነው፡፡

የኢ.ፌ.ዴ.ሪ መከላከያ ዋር ኮሌጅ ልዑክ አፍሌክስን ጎበኘ
ታህሳስ 25/2017 ዓ.ም (አፍሌክስ- ሱሉልታ) - የኢ.ፌ.ዴ.ሪ መከላከያ ዋር ኮሌጅ ሰራተኞችን እና ተማሪዎችን ያካተተ ልዑክ ዛሬ ሱሉልታ በሚገኘው የአፍሌክስ የአመራር ልማት ማዕከል ተገኝቶ ጉብኝት አድርጓል።
ጉብኝቱ ለሰራዊቱ አመራሮች ስልጠና መስጠት ላይ ትኩረት አድርጎ የሚሰራው የመከላከያ ዋር ኮሌጅ ከአፍሌክስ ጋር የልምድ ልውውጥ ለማድረግ እና ትብብር ለማጠናከር ያለመ ነው።
አፍሌክስ በሃገራችን ብሎም በአፍሪካ የአመራር ልህቀት ማእከል ሆኖ ለሚሰራው ስራ የአመራር ልማት እና የስልጠና ማእከሉ ወሳኝ መሆኑ በጉብኝቱ ላይ ተገልጿል።
የመከላከያ ዋር ኮሌጅ ልዑክ በሃገራችን እንዲህ ያለ የአመራር ልማት ማዕከል መኖሩ የሚያኮራ እና ይበል የሚይሰኝ ነው ብለዋል።
በጉብኝቱ ላይ ስለአፍሌክስ፣ እየሰራ ስላለው ስራ እና የወደፊት እቅዶች ገለጻ ተደርጓል።
በተቋማቱ መካከል ያለውን ትብብር ማጠናከር ስለሚቻልባቸው ሁኔታዎችም ውይይት ተካሂዷል።
የዋር ኮሌጅ ልዑክ አፍሌክስ እና አመራሮቹ ከኮሌጃቸው ጎን በመቆም አጋርነታቸውን ስላረጋገጡ አመስግነው፣ አፍሌክስ ቀዳሚ የአመራር ልህቀት ማዕከል ለመሆን ራሱን የማስተዋወቅ ስራ በሰፊው ሊሰራ እንደሚገባ ጠቁመዋል።
አፍሌክስ እና የመከላከያ ዋር ኮሌጅ በዋናነት በሰላም እና ደህንነት ዙሪያ ለመተባበር ተስማምተው በጋራ እየተንቀሳቀሱ ይገኛሉ።