የአፍሪካ አመራር ለህቀት አካዳሚ እና ማስተር ካርድ ፋውንዴሽን-ኢትዮጵያ በጋራ ሊሰሩ በሚችሉባቸው መስኮች ዙሪያ ተወያዩ።
የአፍሌክስ ርዕሰ አካዳሚ አቶ ዛዲግ አብርሃ ለማስተር ካርድ ፋውንዴሽን-ኢትዮጵያ ካንትሪ ዳይሬክተር አቶ ሳሙኤል ያለው የአፍሌክስን የአመራር ልማት ፕሮግራሞች እና የሶስት ዓመት ስትራቴጂ ሰፊ ገለጻ ያቀረቡ ሲሆን የአካዳሚውን የሪፎርም (Reform)፤ የማስፋት (Scaling Up) እና የሽግግር (Transformation) ስራዎችም አብራርተዋል።
ማስተር ካርድ ፋውንዴሽን-ኢትዮጵያ በወጣቶች ልማት እና ስራ ፈጠራ ዙሪያ በርካታ ስራዎችን እየሰራ እንደሚገኝ የገለጹት አቶ ዛዲግ በአፍሌክስ ጠቅላላ እና ልዩ የአመራር ልማት ፕሮግራሞች ላይ ተተኪ እና ሴት አመራሮችን አቅም ለመገንባት በተያዘው ዕቅድ ውስጥ ፋውንዴሽኑ በፕሮግራም ቀረጻ እና በቴክኒክ ድጋፍ እንዲያደርግ ጠይቀዋል።
የአፍሪካ አመራር ልህቀት አካዳሚ እንደ ስሙ አፍሪካዊ ቅርጽ እና ይዘት እንዲኖረው በተሰራው ሪፎርም ውስጥም አፍሪካውያን ወጣቶች የሚገናኙበት እና ስለ አህጉሪቱ ልማት በሰፊው ተወያይተው የስራ ፈጠራ ችሎታቸውን የሚያዳብሩበት ተቋም እንዲሆን ፋውንዴሽኑ የመሰረተ ልማት፤ የማስተርስ ትምህርት እና የአመራር ልማት ፕሮግራም ዲዛይን ላይ ከአፍሌክስ ጋር ሊሰራ የሚችልበት መንገድ እንዳለ የጠቆሙት አቶ ዛዲግ የፋውንዴሽኑ ጉባኤዎችም በአፍሌክስ ማዕከል ውስጥ በሚደረጉበት ሁኔታ ላይ ሀሳብ አቅርበዋል።

የአፍሪካ አመራር ልህቀት አካዳሚ አመራር እና ሰራተኞች በውጭ ጉዳይ ሚኒስቴር የተዘጋጀውን የኢትዮጵያ ዲፕሎማሲ ኤግዚቢሽን ጎበኙ።
በኦፕሬሽን ዘርፍ ምክትል ርዕሰ አካዳሚ ወንድዬ ለገሰ (ዶ/ር) የተመራው ቡድን በሳይንስ ሙዚየም የተዘጋጀውን የኢትዮጵያ ዲፕሎማሲ ኤግዚቢሽን ጎብኝቷል።
ምክትል ርዕሰ አካዳሚ ወንድዬ ለገሰ (ዶ/ር) በጉብኝቱ ላይ እንደተናገሩት ኤግዚቢሽኑ ኢትዮጵያ ለአፍሪካ እና ለዓለም ሰላም ያበረከተቸውን አስተዋጽኦ በግልጽ የሚያሳይ እንደሆነ ጠቁመው፤ የአሁኑ ትውልድም ቀደምት አባቶቹ በዓለም ዲፕሎማሲ መስክ ያስመዘገቡትን ድል እያስቀጠለ እንደሚገኝ ተመልክተናል ብለዋል።
ምክትል ርዕሰ አካዳሚ ወንድዬ ለገሰ (ዶ/ር) አያይዘውም የአፍሪካ አመራር ልህቀት አካዳሚ አመራርና ሰራተኞች ለሀገር ልማት እና ብልጽግና የሚያበረክቱትን ድርሻ በጉልህ እንዲወጡ ጉብኝቱ የራሱን በጎ ሚና እንደሚጫወት ተናግረዋል።
በጉብኝቱ ላይ የተሳተፉ አመራሮች እና ሰራተኞች በበኩላቸው የውጭ ጉዳይ ሚኒስቴር የሀገራችንን የዲፕሎማሲ ታሪክ ሌሎች እንዲያውቁ ማድረጉ ትላንት የት እንደነበር እና ወደፊት የምንደርስበትን መንገድ ያመላከተ በመሆኑ ለአካዳሚው ተልዕኮ ስኬታማነት የስራ መነሳሳትን እንደሚፈጥር ገልጸዋል።

የአፍሌክስ ርዕሰ አካዳሚ አቶ ዛዲግ አብርሃ ከ Global Center for Gender Equality ከመጡ ከፍተኛ የስራ ሀላፊ ጋር ተወያዩ:: Alex Munive በማዕከሉ Feminist Leadership ዳይሬክተር ሲሆኑ ስለ አፍሌክስ ሪፎርም: ሽግግር እና ማስፋት ፕሮግራም ገለፃ ተደርጎላቸዋል:: የአፍሪካ አመራር ልህቀት አካዳሚ በጠቅላላ የአመራር ልማት ፕሮግራሙ ከቀረፃቸው አራት ፕሮግራሞች ውስጥ የሴቶች የአመራር ልማት ፕሮግራም አንዱ በመሆኑ ከማዕከሉ ጋር በትብብር መስራት እንደሚፈልጉ አቶ ዛዲግ ተናግረዋል::
Alex Munive በበኩላቸው ማዕከላቸው የአፍሌክስን የሴቶች የአመራር ልማት ፕሮግራም ለመደገፍ እና አብሮ ለመስራት ዝግጁ መሆኑን ጠቅሰው በፊንላንድ ሄልሲንኪ ከሚገኘው ተቋማቸው ጋር ውይይት በማድረግ ሁለቱ ተቋማት በትብብር የሚሰሩባቸውን መስኮች በመለየት ወደ ስራ እንደሚገቡ ገልጸዋል::

አቶ ዛዲግ አብርሃ ከኮይካ ኢትዮጵያ KOICA- Ethiopia ካንትሪ ዳይሬክተር ቾ ሀን ዴኦግ Cho Han Deog ጋር ተወያዩ።
ካንትሪ ዳይሬክተሩ ስለ አፍሪካ አመራር ልህቀት አካዳሚ ሪፎርም፤ ማስፋትና ሽግግር በርዕሰ አካዳሚው ሰፊ ገለጻ ተደርጎላቸዋል።
አቶ ዛዲግ በገለጻቸው ላይ እንዳብራሩት አካዳሚው አስራ ሶስት ፕሮጀክቶችን ቀርጾ ወደ ስራ እየገባ እንደሆነ እና በሀገራችን የነበረውን የስልጠና ስርአት ወደ አመራር ልማት ፕሮግራም ለማሳደግ ሰፊ ዕቅድ ተይዞ እየተሰራ እንደሆነ ጠቁመው፤ ለዚህም የሚሆን አራት ጠቅላላ እና ሰላሳ ሰባት ልዩ የአመራር ልማት ፕሮግራሞችን ተግባራዊ ለማድረግ እየተሰራ ነው ብለዋል።
አካዳሚው አፍሪካዊ መልክና ይዘት እንዲኖረውም አራት መሰረታዊ ክፍተቶችን ለመሙላት እየተሰራ እንደሆነ ያስታወሱት አቶ ዛዲግ፤ አሁን ያለውን ህንጻ የውስጥ ዲዛይኑ የአፍሪካ ውክልና እንዲኖረው ለማድረግ በቀድሞ የአፍሪካውያን መሪዎች እና ታዋቂ ሰዎች በመሰየም እና የአፍሪካን ታሪካዊ ምስሎችን እና ቅርጻ ቅርጾችን በማስቀመጥ ለመስራት መታቀዱን ገልጸዋል።
በምክትል ፕሬዚደንት ደረጃ ዘርፍ በማቋቋም በአፍሪካውያን የሚመራ ሁለተኛውን ክፍተት ለመሙላት እየተሰራ እንደሆነ እና በሶስተኛ ደረጃም አፍሪካውያን ተማሪዎችን ተቀብሎ በሁለተኛ ዲግሪ የሚያስተምር የትምህርት ፕሮግራም ለመክፈት እየተሰራ ነው ያሉት አቶ ዛዲግ አፍሪካውያንን የሚወክል ራሱን የቻለ ቦርድ በማቋቋም ላይ እንገኛለን ብለዋል።
አፍሌክስን የኮንፈረንስ ማዕከል ለማድረግም ሱሉሉታን እንደ ዳቮስ የሚል ፕሮጀክት መቀረጹን ያስታወሱት ርዕሰ አካዳሚው፤ ሸገር ሲቲን ከዳቮስ ከተማ ጋር በእህትማማች ከተማ ለማገናኘት ስራ መጀመሩንም ተናግረዋል።

የአፍሪካ አመራር ልህቀት አካዳሚ እና የሲቪል ማህበረሰብ ድርጅቶች በጋራ ሊሰሩ በሚችሉባቸው መስኮች ዙሪያ ተወያዩ።
የአፍሌክስ ርዕሰ አካዳሚ አቶ ዛዲግ አብርሃ ከድርጅቶቹ ለመጡ የሲቪል ማህበረሰብ ተወካዮች የአፍሌክስን የአመራር ልማት ፕሮግራሞች እና የሶስት ዓመት ስትራቴጂ ሰፊ ገለጻ ያቀረቡ ሲሆን የአካዳሚውን የሪፎርም (Reform)፤ የማስፋት (Scaling Up) እና የሽግግር (Transformation) ስራዎችም አብራርተዋል።
በሀገራችን በሁሉም ዘርፍ ያለውን አመራር አቅም ለመገንባት የሚኒስትሮች ምክር ቤት ለአፍሌክስ ስልጣን እንደሰጠው የገለጹት አቶ ዛዲግ፤ በሲቪል ማህበራት ውስጥ ያሉ አመራሮችን በአፍሌክስ ጠቅላላ እና ልዩ የአመራር ልማት ፕሮግራሞች ላይ በማካተት አብረው ለመስራት ፍላጎት እንዳላቸው ገልጸዋል።
የአፍሪካ አመራር ልህቀት አካዳሚ እንደ ስሙ አፍሪካዊ ቅርጽ እና ይዘት እንዲኖረውም የሲቪል ማህበረሰቡ ለአፍሪካውያን ተማሪዎች አዲስ በሚከፈቱ የማስተርስ ትምህርት ካሪኩለም ልማት እና በጠቅላላ እና በልዩ የአመራር ልማት ፕሮግራም ዲዛይን ቀረጻ ላይ ሲቪል ማህበረሰቡ ከአፍሌክስ ጋር ሊሰራ የሚችልበት መንገድ እንዳለ የጠቆሙት አቶ ዛዲግ የራሱን ሀገራዊ አሻራ እንዲያሳርፍ እና በአፍሌክስ የመሰረተ ልማት ማስፋፋት ላይ አብረው እንዲሰሩ ጋብዘዋል።
በውይይቱ ላይ የተሳተፉት የሲቪል ማህበረሰቡ ተወካዮች በበኩላቸው አፍሌክስ የጀመረው ሪፎርም፤ ማስፋት እና ሽግግር ኢትዮጵያን ወደ ላቀ ከፍታ የሚያደርስ መንገድ ከመሆኑም በላይ ከአፍሪካውያን ጋር የሚያስተሳስረን በመሆኑ ያለንን ልምድና ዕውቀት ተጠቅመን የአፍሪካ አመራር ልህቀትን የስኬት መንገድ እናግዛለን ብለዋል።