ታኀሳስ 21፣2017 ዓ.ም (ሱሉልታ - አፍሌክስ ):- የባህልና ስፖርት ሚኒስቴር አመራሮችን በማብቃት የባህል የስፖርትና የኪነጥበብ ዘርፍ ለሀገር አንድነትና ብልፅግና ያለውን ሚና አጠናክሮ ለማስቀጠል በአፍሌክስ ስልጠና መስጠት ጀመረ።
የባህልና ስፖርት ሚኒስቴር ሚኒስትር ክብርት ሸዊት ሻንካ የስልጠናውን ማስጀመሪያ መርሀ ግብር አስመልክቶ ንግግር አድርገዋል።
ክብርት ሸዊት ሻንካ እንደተናገሩት በዓለም ላይ ባህል፣ ኪነጥበብ፣ ፈጠራ እና ስፖርት ሕዝቦችን በማስተሳሰር፣ ኢኮኖሚ በማመነጨት፣ ለብዙ ሰዎች የሥራ እድልን በመፍጠር፣ ማኅበራዊ ትስስርን እና ትብብርን በማጎልበት የአንድን አገር ጠንካራ መሰረት የሚጥሉ ዘርፎች እንደሆኑ ገልፀዋል፡፡
መንግስት ለዘርፉ በሰጠው ትኩረት ሴክተሩ ለሀገር ገፅታ ግንባታ እና ለኢኮኖሚ እድገት ሚያበረክተውን አስተዋኦ ለማበርከት የተሰጠንን ታላቅ ሀገራዊ ሀላፊነት ለመወጣት እንዲህ አይነት የግንዛቤ ማስጨበጫ ስልጠናዎች ለዘርፉ ተዋንያኖች መስጠት ወሳኝ መሆኑን ክብርት ሚኒስትሯ ተናግረዋል፡፡
በንግግራቸው የአፍሪካ አመራር ልህቀት አካዳሚ ብቁ አመራሮችን ማፍራት የሚያስችል መሰረተ ልማት እንዲሁም ብቁ አመራር እና ባለሞያዎች ያሉት ሃገራዊ ተቋም መሆኑን ጠቅሰው፤ የሚሰጡ ስልጠናዎችም አሁን ያለንበት ደረጃ እና የወደፊት አዝማሚያዎችን ለማሟላት ታስበው የተዘጋጁ በመሆናቸው የስልጠናው ተሳታፊዎች በቆይታችሁ ተፈላጊውን ችሎታ በመቅሰም ከምትሠሩት የዕለት ከዕለት ተግባር ጋር በማዛመድ ተግባራዊ ልታደርጉ ይገባል ሲሉ አሳስበዋል።
የአፍሪካ አመራር ልህቀት አካዳሚ የአመራር ልማት ዘርፍ ምክትል ርዕሰ አካዳሚ ወ/ሮ መሰረት ደስታ በመክፈቻ ስነ ስርዐቱ ላይ ተገኝተው ስለአካዳሚው ገለጻ አድርገዋል።

"አፍሌክስ ነባር እና ተተኪ የአፍሪካ አመራሮች በጋራ ለአፍሪካ ችግሮች አፍሪካዊ መፍትሄ የሚያበጁበት ተቋም ነው።" ወ/ሮ መሰረት ደስታ የአፍሌክስ የአመራር ልማት ዘርፍ ምክትል ርዕሰ አካዳሚ
አፍሌክስ ለባህል እና ስፖርት ሚኒስቴር አመራሮች እና ሰራተኞች ስልጠና መስጠት ጀመረ
ታኅሣሥ 21/2017 (ሱሉልታ - አፍሌክስ):- የአፍሪካ አመራር ልህቀት አካዳሚ ከ300 በላይ ለሚሆኑ የኢ.ፌ.ዴ.ሪ የባህልና ስፖርት ሚኒስቴር አመራሮች እና ሰራተኞች የአመራር ልማት መስጠት ጀምሯል።
ስልጠናው የአመራሩን ብቃት በማጠናከር ኪነ ጥበብ፣ ባህል፣ እና ስፖርት ለሃገር አንድነት እና ብልጽግና ያላቸውን ሚና አጠናክሮ ለማስቀጠል ያለመ እንደሆነ ተገልጿል።
በመክፈቻ ስነ ስርዐቱ ላይ ንግግር ያደረጉት የአፍሌክስ የአመራር ልማት ዘርፍ ምክትል ርዕሰ አካዳሚ ወ/ሮ መሰረት ደስታ "አፍሌክስ ነባር እና ተተኪ የአፍሪካ አመራሮች በጋራ ለአፍሪካ ችግሮች አፍሪካዊ መፍትሄ የሚያበጁበት ተቋም ነው።" ብለዋል።
አያይዘውም "አፍሌክስ በሚሰጣቸው ልዩ የአመራር ልማት ፕሮግራሞች ውስጥ የመንግስት ተቋማትን አመራሮችን አቅም ማሳደግ ላይ ትኩረት ሰጥቶ እየሰራ ይገኛል፣ ይህ ስልጠናም የዚሁ አካል ነው።" ሲሉ ገልጸዋል።
የባህል እና ስፖርት ሚኒስቴር ሚኒስትር ክብርት ወ/ሮ ሸዊት ሻንካ በዚሁ የመክፈቻ ስነስርዐት ላይ ባደረጉት ንግግር "አፍሌክስ ብቁ አመራሮችን ማፍራት የሚያስችል መሰረተ ልማት እንዲሁም ብቁ አመራር እና ባለሞያዎች ያሉት ሃገራዊ ተቋም ነው።" ብለዋል።
አፍሌክስ በኢትዮጵያ የመንግስት ተቋማት አመራሮችን ብቃት ለማሳደግ አቅዶ ብሰፊው እየሰራ ይገኛል።

የባህልና ስፖርት ዘርፍ ለሀገር ኢኮኖሚ ዕድገት ያለው ሚና፣ ተግዳሮቶችና መልካም አጋጣሚዎች በሚል ርዕስ በአፍሌክስ ስልጠና እየተሰጠ ነው።

ታኅሳስ 22፣ 2017ዓ.ም (ሱሉልታ- አፍሌክስ)- በአፍሪካ አመራር ልህቀት አካዳሚ እየተሰጠ የሚገኘው አመራሮችን በማብቃት የባህል፣ የስፖርት እና የኪነ ጥበብ ዘርፍ ለሀገር አንድነትና ብልፅግና ያለውን ሚና አጠናክሮ የማስቀጠል ስልጠና በሁለተኛው ቀን ውሎ የባህልና ስፖርት ዘርፍ ለሀገር ኢኮኖሚ ዕድገት ያለው ሚና፣ ተግዳሮቶች እና መልካም አጋጣሚዎች በሚል ርዕስ ስልጠና እየተሰጠ ይገኛል።

የስልጠናውን ሰነድ አዳነ ካሴ (ዶ/ር ) ባቀረቡበት ወቅት ኢትዮጵያ የብዝሀ ባህል እና ቋንቋ ባለቤት፤ የልዩ ልዩ ዕይታዊ፣ ትዕይንታዊ እና ሥነ-ፅሁፋዊ እሴቶችም ባለቤት እንደመሆኗ መጠን ለሀገር ኢኮኖሚ ልማት ያለው እምቅ አቅም ከፍተኛ ድርሻ ያለው እና ያልተነካ እምቅ ሀብት ያለበት ዘርፍ ነው። በቀጣይም መንግስት የሀገሪቱን ኢኮኖሚ ለማሳደግ ለሀገር በቀል የኢኮኖሚ ሪፎርም በሰጠው ትኩረት ልክ ዘርፉ ለዚህ ዕቅድ ስኬት የዕቅዱ አካል አድርጎ ሊሠራ ይገባል ብለዋል።

አክለውም በስፖርት ዘርፉም ልዩ የሆኑ ባህላዊ ስፖርቶች መገኛ ከመሆኗም ባሻገር ዘመናዊ ስፖርቶች የሚከናወኑባት እና ስፖርት ወዳድ የሆነ ህዝብ ያለባት ሀገር እንደመሆኗ ይህንን ምቹ አጋጣሚ በመጠቀም የኢኮኖሚ ምንጭ ማድረግ ይገባል።

ሙሉጌታ ጌጡ (ዶ/ር) በበኩላቸው ብሔራዊ የህግ ማዕቀፎችና ዘርፉ ለኢኮኖሚ ያለው አስተዋፅኦ ከሀገሪቱ የልማት ዕቅድ አኳያ ሰነድ ያቀረቡ ሲሆን የባህል፣ የስፖርት እና የኪነ ጥበብ ዘርፍን በህግ ማቀፍ ከህገ መንግስት፣ ከስትራቴጂክ ፖሊሲ፣ ከሚኒስቴር መ/ቤቱ የየዘርፉ ፖሊሲዎችንና ከዓለም አቀፍ ተሞክሮዎች አንፃር ገለፃ አድርገዋል።