ቅዳሜ፡- ጥር 4 ቀን 2016 ዓ.ም

ዜና ስፓርት

የኮሌጁ እግር ኳስ ቡድን ተጋጣሚውን 3ለ1 አሸነፈ!!

የጀነራል ዊንጌት ፖሊ ቴክኒክ ኮሌጅ የእግር ኳስ ቡድን ከአዲስ ከተማ ኢንዱስትሪያል ኮሌጅ አቻው ጋር ተጋጥሞ 3ለ1 በማሸነፍ የድል ባለቤት ሆነ።

በሁለተኛ ዲቪዚዮን ምድብ ሐ ላይ ተደልድለው ዛሬ ውድድራቸውን በጀነራል ዊንጌት የእግር ኳስ ሜዳ ያካሄዱት ሁለቱ ቡድኖች ከፍተኛ ፉክክር የታየበት ጨዋታ ያደረጉ ሲሆን በመጨረሻም በብርቱዎቹ የጀነራል ዊንጌት ፖሊ ቴክኒክ ኮሌጅ የእግር ኳስ ቡድን 3ለ1 አሸናፊነት ተጠናቋል።

በተያያዘ ዜና በዛሬው ዕለት በርካታ የከተማይቱ ልዩ ልዩ የእግር ኳስ ቡድኖች በተለያዩ ሜዳዎች ከአቻዎቻቸው ጋር ውድድሮችን አካሂደዋል።

‹‹በላቀ አገልግሎት የመረጃ ተደራሽነት››

ሰኞ:- ጥር 6 ቀን 2015 ዓ.ም

እንዲህም ይደረጋል!!

ሰልጣኞቹ በባለፈው ዓመት 2015 ዓ.ም ላይ በቢዝነስ እና ፋይናንስ ዲፓርትመንት ስር በሚገኘው የማርኬቲንግ ሙያ ስልጠናን በደረጃ 4 ተቀላቀሉ፡፡ እንደ ቴክኒክ እና ሙያ ተቋም ስልጠናው የሚሰጠው 30 በመቶው ንድፈ ሀሳባዊ ሲሆን 70 ፐርሰንቱ ደግሞ በተግባር የታገዘ መሆኑ እሙን ነው፡፡

እነዚህ የማርኬቲንግ ሙያ ሰልጣኞች ታዲያ በትብብር ስልጠና እና መሰል መንገዶች ተግባራዊ ስልጠናቸውን ከማዳበር ባሻገር በራሳችን አቅም እና ባለን ዕድል ተጠቅመን የተግባር ልምምድ ለምን አናደርግም በማለት በግቢው ውስጥ የፋስት ፎድ ሽያጭ ዘመቻ /Sales campaign/ እያደረጉ ይገኛሉ፡፡

በሁለት ሴክሽን እየሰለጠኑ ያሉ እና ወደ 7 በሚደርሱ ቡድኖች ተዋቅረው ልዩ ልዩ ዓይነት የምግብ ዝግጅቶችን በተመጣጣኝ ዋጋ ለግቢው ማህበረሰብ ማቅረብ ከጀመሩ 4 ቀናት ተቆጥረዋል፡፡

ዓላማው ሰልጣኞቹ በማርኬቲንግ ዘርፍ ላይ ያለውን ሙያ በደንብ ተለማምደው ወደ እውነተኛ የስራ ህይወት ሲቀላቀሉ በምርት ወይም በአገልግሎት አሰጣጥ ላይ የሚኖራቸው ተግባቦት፣ ተግዳሮቶችን የሚሻገሩባቸው ጥበቦች፣ የደንበኛ አያያዝ ክህሎት፣ የንግድ ውድድር ብቃት እና ጥናት መሰል ችሎታቸውን ለማጎልበት ታቅዶ መሆኑን ከአሰልጣኞቻቸው መረጃ አግኝተናል፡፡

የሽያጭ ዘመቻው እስከ ነገ ጥር 7 ድረስ እንደሚቀጥል ሰምተናል፡፡ እኛም አገልግሎታችሁ ተመችቶናል እና ይልመድባችሁ እንላለን፡፡

"በላቀ አገልግሎት የመረጃ ተደራሽነት"

ማክሰኞ፡- ጥር 14 ቀን 2016 ዓ.ም

በጀነራል ዊንጌት ክላስተር ስር ባሉ ኮሌጆች ለሚገኙ አሰልጣኞች በሙያ ብቃት ምዘና /COC/ አተገባበር ዙርያ የግንዛቤ ማስጨበጫ መድረክ ተካሄደ!!

በጀነራል ዊንጌት ክላስተር ስር ባሉ 3 ኮሌጆች ለሚገኙ አሰልጣኞች በሙያ ብቃት ምዘና /COC/ አተገባበር ዙሪያ ዛሬ ጥር 14 ቀን 2016 ዓ.ም በጀነራል ዊንጌት ፖሊ ቴክኒክ ኮሌጅ የግንዛቤ ማስጨበጫ መድረክ ተካሄደ።

መድረኩ የተመራው ከከተማ አስተዳደሩ በተመደቡ የስራ ኃላፊዎች እና የኮሌጆቹ ዲኖች ሲሆን በመድረኩ ስለሙያ ደረጃ ምንነት፣ ስለሙያ ብቃት ምዘና ስርዓት፣ በየደረጃው ስለሚሰጡ የሙያ ብቃት ምዘና መሳሪያዎች ዝግጀት ሂደት እና ከምዘናው የሚጠበቁ ግቦች ምንነት ላይ ያተኮረ ገለጻ ተደርጓል።

በውይይት መድረኩ ላይ በአዲሱ የሙያ ስልጠና /OS/ ደረጃ 4 ያልደረሱ የስልጠና ዘርፎች በምን መልኩ ይስተናገዳሉ፣ የምዘና ጊዜው ቢራዘምልን፣ ፈተና ላላለፉ አሰልጣኞች በቀጠይ ምን ታስቧል፣ የመዛኞች የባህርይ እና የሙያ ብቃት ምን ያህል አስተማማኝ ነው፣ የአሰልጣኛች የስነ ልቦና ዝግጅት ምን ያህል በትኩረት ታይቷል የሚሉት እና መሰል ጥያቄዎች ከአሰልጣኞች ተነስተዋል።

ይህ በእንዲህ እንዳለ ምዘናው የሚሰጠው ስልጠና በሚሰጥባቸው ደረጃ እና UC (Unit of Competence) ባለቸው ላይ ብቻ እንደሆነ፣ የተሟላ ማቴሪያልና ማሽን ለሌላቸው ምዘናው የማይሰጥ መሆኑ እንዲሁም የክህሎት ክፍተት ያለባቸው አስልጣኞች በሂደት እየተሞላ ምዘናው እንደሚሰጥ ከመድረኩ ተገልጿል።  
 
በዕለቱ ከጀነራል ዊንጌት ፖሊ ቴከኒክ ኮሌጅ 268፣ ከአዲስ ከተማ ኢንዱስትሪያል ኮሌጅ 170 እና ከኮልፌ ኢንዲስትሪያል ኮሌጅ ደግሞ 119 አሰልጣኞች በመድረኩ ላይ  ተግኝተዋል።

"በላቀ አግልግሎት የመረጃ ተደራሽነት"