Ma’lumki, Prezident tashabbusi bilan mamlakatimizda 1-iyundan 30-avgustgacha o‘quvchi yoshlarning yozgi ta’tilini mazmunli tashkil etish maqsadida "Dolzarb 90 kunlik" loyihasi amalga oshirilmoqda. Loyiha doirasida Surxondaryo viloyatida "Kasb markaz"lari faoliyati yo‘lga qo‘yilgan.

Viloyat hokimi Ulug‘bek Qosimov Termiz shahar politexnikumida tashkil etilgan "Yozgi kasblar markazi" faoliyati bilan tanishdi. Fan, sport va kasb to‘garaklari, murabbiy va o‘quvchilar uchun yaratilgan sharoitlar ko‘zdan kechirildi. Volontyor yoshlar bilan suhbat o‘tkazilib, ularning takliflari asosida "Yoshlar kuni" arafasida bayram dasturlari va yozgi oromgohlarda turli tadbirlar tashkil etish vazifalari belgilandi.

Mutasaddilarga "Kasb markaz"lari faoliyatini kengaytirish, ko‘proq o‘quvchi yoshlarni jalb etish hamda ularning qiziqishlaridan kelib chiqib yangi to‘garaklar tashkil etish yuzasidan topshiriqlar berildi.

Shuningdek, Termiz shahridagi 13 va 15-sonli maktablar hamda 16-sonli davlat maktabgacha ta’lim tashkilotini ta’mirlash ishlari ijrosi o‘rganildi. Loyihalarni sifatli va o‘z muddatida amalga oshirish, ta’lim maskanlarini zamonaviy sharoitlar bilan ta’minlash bo‘yicha vazifalar yuklatildi.

Surxondaryo.uz | Telegram | Facebook | Instagram | YouTube | X