Prezidentimiz tashabbusi va topshiriqlari asosida, yozgi ta’til davrida maktab o‘quvchilari hamda yoshlarning bo‘sh vaqtini mazmunli va samarali tashkil etish maqsadida "Dolzarb 90 kunlik" loyihasi amalga oshirilmoqda.

Ushbu loyiha doirasida Surxondaryo viloyatida ilg‘or xorijiy tajribalar asosida umumta’lim maktablarida "Kasb markazlari" faoliyati yo‘lga qo‘yildi. Bugun mazkur markazlar o‘z faoliyatini boshladi.

Xususan, Termiz shahar politexnikumida tashkil etilgan "Kasb markazi"da o‘tkazilgan tadbirda Surxondaryo viloyati hokimi Ulug‘bek Qosimov ishtirok etib, yaratilgan shart-sharoitlar, kurs va to‘garaklar faoliyati bilan yaqindan tanishdi. Shuningdek, videokonferensaloqa orqali hududlardagi yana 15 ta markaz faoliyatiga rasman start berildi.

"Kasb markazlari"da quyidagi yo‘nalishlar bo‘yicha to‘garaklar tashkil etilgan:
➖hunarmandchilik, kulolchilik, yog‘och va metall o‘ymakorligi;
➖sartaroshlik, robototexnika, oshpazlik va qandolatchilik;
➖karving san’ati, tikuvchilik va kiyim dizayni;
➖fotografiya, videotasvirga olish, grafik dizayn va gulchilik;
➖duradgorlik, avtotrinajyor, kibersport va ot sporti;
➖SMM (Social Media Marketing) — Instagram, TikTok, Facebook kabi ijtimoiy tarmoqlarda kontent yaratish, reklama va targ‘ibot strategiyalari.

Viloyat hokimi to‘garaklar faoliyati bilan tanishib, mas’ullarning axborotlarini tingladi hamda o‘quvchi yoshlarning qiziqishlarini inobatga olgan holda to‘garaklar sonini yanada oshirish bo‘yicha tegishli vazifalarni belgilab berdi.