Xabar berib kelayotganimizdek, har haftaning muayyan kunida belgilangan sohalardagi topshiriqlarning ijrosi o‘rganilib, kelgusi vazifalar belgilanmoqda. Jumladan, dushanba kuni qurilish sohasidagi dastur va loyihalar ijrosini tahlil qilish kuni etib belgilangan.

Ushbu reja doirasida Surxondaryo viloyati hokimi Ulug‘bek Qosimov Termiz shahri hamda Angor, Sherobod va Termiz tumanlaridagi qurilish loyihalari bilan tanishdi.

Xususan, Termiz shahrida "Yangi Termiz Sity" va "Termiz Biznes Sity" majmualari, Termiz tumanidagi "Yangi O‘zbekiston" massivi va bog‘i, Angor tumanida yo‘l va ko‘prik qurilishi, Sherobod tumanida esa avtomobil yo‘llarini rekonstruksiya qilish loyihalari ko‘rib chiqildi. Bundan tashqari, avvalgi tashriflarda berilgan topshiriqlar ijrosi ham tahlil qilindi.

Yo‘l infratuzilmasini yaxshilashga qaratilgan loyihalarda ishlarning sust ketishi hamda bu borada yuklatilgan vazifalar to‘liq bajarilmagani tanqid qilindi.

Shu bilan birga, turar joylar, savdo va xizmat ko‘rsatish nuqtalari hamda ijtimoiy soha obyektlari qurilishidagi kamchiliklar bartaraf etilishi, ishlar sifatini yanada oshirish zarurligi ta’kidlandi.

Hudud rahbarlari, mas’ul mutasaddilar va pudratchi tashkilotlarga aniq topshiriqlar berildi hamda kelasi haftadagi o‘rganishlar davomida mazkur vazifalar ijrosi yuzasidan axborot taqdim etilishi belgilandi.

Surxondaryo.uz | Telegram | Facebook | Instagram | YouTube | X