Aholini zamonaviy va qulay uy-joylar bilan ta’minlash maqsadida Termiz shahrida keng ko‘lamli qurilish ishlari amalga oshirilmoqda. Davlatimiz rahbari tomonidan qabul qilingan qator farmon va qarorlar asosida shaharsozlik me’yorlariga mos ravishda ko‘p qavatli turar joylar barpo etish belgilangan.

Surxondaryo viloyati hokimi Ulug‘bek Qosimov Termiz shahrining Istiqlol ko‘chasidagi 9 qavatli turar-joy kompleksi, "Manguzar" mahallasining eski uy-joylar o‘rnida qurilayotgan yangi binolar hamda "Termiz city"dagi qurilish jarayonlari bilan tanishdi. Loyihalarni tezlashtirish, eski uy-joylar uchun kompensatsiya to‘lovlarini to‘liq yakunlash va qurilishni boshlash bo‘yicha mas’ullarga tegishli ko‘rsatmalar berildi.

Shuningdek, shaharda amalga oshiriladigan yangi loyihalar taqdimoti o‘tkazildi. "Shohbekat Termiz" MCHJ tomonidan 9 va 12 qavatli 5 ta ko‘p qavatli uy hamda 2 qavatli 15 ta kottej qurilishiga start berildi.

Bundan tashqari, shahar infratuzilmasini yaxshilash, "Anhor" saylgohi hududidagi Navbog‘ ko‘chasini 24/7 rejimida faoliyat yurituvchi turizm ko‘chasiga aylantirish, Termiz tumanidagi "Yangi O‘zbekiston" massivida turar joylar va ijtimoiy obyektlar qurish, shuningdek, "Yangi O‘zbekiston" bog‘ida amfiteatr barpo etish va ko‘chat ekish ishlari ham ko‘zdan kechirildi.

Surxondaryo.uz | Telegram | Facebook | Instagram | YouTube | X