Keyingi yillarda Surxondaryoning turizm salohiyati rivojlanib, sayyohlar oqimi oshib bormoqda. Bunda tashrif buyuruvchilarga qulaylik yaratish, kelish yo‘llarida sifatli xizmat ko‘rsatishni yo‘lga qo‘yish muhim hisoblanadi. Xususan, vohamizning havo yo‘li orqali darvozasi hisoblangan Termiz xalqaro aeroportida rekonstruksiya ishlari jadal davom etmoqda.

Viloyat hokimi hududlarga tashrifidan so‘ng, aeroportda amalga oshirilayotgan qurilish-ta’mirlash ishlari bilan tanishdi. Loyihaning borishi yuzasidan mas’ullarning axboroti tinglandi.

Shundan so‘ng, Termiz shahri bo‘ylab "Yashil makon" umummilliy loyihasi doirasida daraxt ko‘chatlari ekish ishlarining borishi ko‘zdan kechirildi. Vohamiz bo‘ylab joriy mavsumda 10,2 mln tup ko‘chat ekish rejalashtirilgan bo‘lib, bugungi kunda rejaning qariyb 83 foizi bajarilgan. Jumladan, Termiz shahrida 100 mingdan ortiq daraxt va buta ko‘chatlari ekilgan.

Viloyat rahbari ekologiya insonlar salomatligi bilan bevosita bog‘liq ekanligini inobatga olib, ko‘chatlarni ekish va parvarishlashni sifatli amalga oshirish lozimligini, bu borada mutasaddilarga shaxsiy mas’uliyat yuklanganini ta’kidladi.

Surxondaryo.uz | Telegram | Facebook | Instagram | YouTube | X