🔴Қуръонни ўқиб чиқдим. Китобнинг 90 ўрнида Аллоҳни бандаларининг ризқига кафил эканини, фақатгина 1 ўрнида шайтон инсонни фақирлик билан қўрқитишини кўрдим.
Инсон Роббисининг 90 ваъдасини унутиб, шайтонни биргина ёлғонига алданганини ҳам кўрдим.

Ҳасан БАСРИЙ

Таңғы тилек

ЭНГ БОЙ ОДАМ

Набий соллаллоҳу алайҳи васаллам бундай дедилар:
"Қайси бирингиз хонадони тинч, соғлиги яхши ва бир кунлик ризқи бор ҳолда тонг оттирса, гўё бутун дунёни қўлга киритибди."

Демак, инсон шу уч нарсага, яъни, тинчлик, оила ва бир кунлик ризққа эга бўлса, шу нарсаларга Аллоҳ таоло томонидан берилган улуғ неъмат, деб шукурлик қилиши керак бўлади. Аллоҳ таолонинг шукур қилган инсонларга неъматларини зиёда қилиб бериши ҳақидаги ваъдаси бор.
Шу ваъдага мувофиқ инсон шукур қиладиган бўлса Аллоҳ таоло ҳам юқорида таъкидланган неъматларини инсон учун зиёда қилиб беради.

👉 Аллоҳ таоло бизларни ҳар доим берган неъматларига шукур қилувчи бандаларидан қилсин!

🔹Бугунги кунингиз ният қилганингиздан ҳам кўпроқ хайрли ишларга, яхшиликларга тўла бўлсин!

ҒИЙБАТ

Қиёмат кунида энг кўп қайғуга соладиган ҳолат қуйидагича:
Қаттиқ яхши кўрсанг ҳам ота-онанг, ёринг ҳаттоки болангга ҳам бир яхшиликни бера олмайсан, лекин дунёда энг кўп ёмон кўриб ғийбат қилган, ғийбат қилган одамингга ўша яхшилигингни мажбуран бериб юборасан.

Абу Умар Одил

Изоҳ: Ҳадиси шарифларда айтилишича, қиёмат куни одамлар савобимни сўрамасин деб ўз яқинларидан қочар экан. Абаса сурасида айтилишича, у куни одам ўз биродаридан, ота-онасидан, хотини ва болаларидан қочади.
Аммо дунёда кимни ғийбат қилган бўлсанг, ўша одамга савобларингни қўш қўллаб топширишга мажбур қилинасан. Ғийбат қилган одамларга савобларингни бериб тугаб қолса, унда уларнинг гуноҳлари бўйнингга ёзилар экан.
Шунинг учун бировни ғийбат қилишдан сақланиш лозим.

ЁМОН АХЛОҚ ВА ЁМОН АМАЛДАН
ПАНОҲ ТИЛАШ УЧУН ЎҚИЛАДИГАН ДУО

اللَّهُمَّ إِنِّي أَعُوذُبِكَ مِنْ مُنْكَرَاتِ الْأَخْلَاقِ وَالْأَعْمَالِ وَالْأَهْوَالِ وَالْأَدْوَاءِ.

Ўқилиши: “Аллоҳумма инний аъуузу бика мин мункароотил ахлаақи вал-аъмаали вал-аҳвааи вал адвааи”.

Маъноси: “Ё Аллоҳим! Мен Сендан ёмон хулқлардан ва ёмон амаллардан, гуноҳга берилишдан ва кассаликлардан паноҳ тилайман”.

Тинчлик – энг олий неъмат

Аллоҳ таоло бандаларни ўзаро тинчликка даъват этиб бундай буюради: «Агар мўминлардан икки тоифа ўзаро урушиб қолсалар, дарҳол улар ўртасини ислоҳ этингиз!..» (Ҳужурот, 9).
Аллоҳ таоло бандаларига ёппасига тинчликка кириш, бахтли яшаш ва абадий саодатга эришишлари учун зарур бўлган барча йўл-йўриқларни таълим берган. Тинчлик, аввало ҳар бир кишининг ўзидан бошланади. Зеро, Ислом кўрсатмаларига амал қилган инсон қалбига тинчлик-хотиржамлик ўрнашади.

ЭНГ АФЗАЛ ИБОДАТ

Ҳикоя қилишларича, Абдуллоҳ Умарий имом Моликка мактуб йўллаб, уни узлатга чекиниб, фақат тоат-ибодат билан машғул бўлишга чақирди. Имом Молик унга қуйидагича жавоб ёздилар: "Аллоҳ таоло ризқларни тақсимлагани каби амалларни ҳам тақсимлаб қўйган. Баъзи инсонларнинг қалбини намозга очиб қўйган, лекин рўзага очмаган, баъзиларнинг қалбини садақа қилишга очиб қўйган, лекин рўза тутишга очмаган бўлади. Ибодатларнинг энг афзали илмни ёйишдир. Аллоҳ таоло менинг қалбимни шунга очганидан мингдан минг розиман. Менинг ҳолатим сизнинг ҳолатингиздан пастроқ деб ўйламайман. Умид қиламанки, иккимиз ҳам яхшилик ва эзгуликдамиз".

"Солиҳлар гулшани" китобидан.

Навбатдаги кўчма семинар Кегейли ва Бўзатов туманларида ташкил этилди

Одатдагидек Қорақалпоғистон мусулмонлари қозиёти қозиси Баҳрамаддин Разов раҳбарлигида ўтказилаётган сайёр семинар бугун Кегейли ва Бўзатов туманларида ташкил этилди. Тузилган ишчи гуруҳ аъзолари Кегейли туманидаги 4 та масжид, 13 та маҳалла, Бўзатов туманидаги 1 та масжид, 3 та маҳаллага бириктирилди. Улар ўзларига бириктирилган маҳалла ҳудудидан 104 та хонадонга кириб, шу ерда яшаётганларнинг ҳол-аҳволидан хабар олди, яшаш шароитлари билан яқиндан танишди. Уларнинг муаммоларини ўрганди, фикр-мулоҳазаларини тинглади. Имом-хатиблар 10 та тоифага мансуб 104 та оилага маънавий-маърифий, тарғибот-ташвиқот ва амалий ёрдам тадбирларини олиб борди. Хусусан, эр-хотин, қайнона-келин, ўртасидаги келишмовчилик ва жанжаллар туфайли нотинч бўлган 3 та оила ўрганилиб, уларга насиҳат берилди. Нотинчлик сабабларини бартараф этиш, аразлашганларни яраштириш чоралари кўрилди;
- ногирон ва бемор фуқаролар яшайдиган 34 хонадонга кириб, улардан ҳамдардлик сўралди.
- 41 та кам таъминланган оилага ҳомийлар кўмаги билан озиқ-овқат маҳсулотларидан моддий ёрдамлар кўрсатилди.
- жазони ижро этиш муассасасида ва озодликда бўлган 3 нафар фуқаро ва уларнинг яқин қариндошлари ҳолидан хабар олиниб, инсон қадри улуғлиги, юртимизда олиб борилаётган ислоҳотларни тушунтириш ишлари олиб борилди.
- ичкиликка берилган 2 фуқародан хабар олиниб, бу иллатнинг динимизда қаттиқ қораланиши, барча ёмонликларнинг сабабчиси эканлиги тушунтирилиб, соғлом турмуш тарзига қайтиш бўйича тавсиялар берилди.
- Ташриф давомида 5 нафар ёши улуғ, нуроний отахон ва онахонлар ҳолидан хабар олиниб, юртимиз тинчлиги, халқимиз фаровонлигини тилаб дуолар қилинди.
Шунингдек, масжидлар атрофида ободонлаштириш ва тозалаш ишларини олиб бориш, низом асосида иш ва ҳужжат юритиш, жамоани бошқариш, масжидни тоза ва озода сақлаш, унда қулай шароитлар яратиш жиҳатлари ҳам ўрганилди. Ишчи гуруҳ аъзолари ўзларига бириктирилган масжидларда пешин намозини адо этиб, йиғилганларга Тинчлик саодати, шукроналик, илм олиш фазилати, ёт ғоялар таъсиридан сақланиш, миссионерлик ҳаракатларининг салбий оқибатлари каби муҳим мавзуларда маъруза қилди.
Тадбир якунида амалга оширилган ишлар таҳлил қилиниб, Кегейли ва Бўзатов туманларидаги масжидлар фаолиятини янада ривожлантириш учун кўрсатма ва тавсиялар берилди.

Қорақалпоғистон мусулмонлари қозиёти