የመምህር ግርማ ወንድሙ የወንጌል ተማሪዎች

👉🏻በመጀመሪያ የትዳር አጋርን ለመምረጥ ብዙ ሊደከም ይገባል
፡ ሊቁ ቅዱስ ዮሐንስ አፈወርቅ እንዲህ ይላል አንድን ዕቃ ስንገዛ ስለሚሸጡልን ሰዎች መረጃ እንደምንሰበስብ የሚያዋጣን መኾኑን እንደምናመዛዝን ከሉ አንድ ኦርቶዶክሳዊ ወጣት የትዳር አጋሩን ሲመርጥ እጅግ ከፍ ያለ ጥንቃቄ ሊያደርግ ይገባዋል፡፡ ምክንያቱም የገዛነው ዕቃ የተበላሸ እንደ ሆነ ልንመልስ እንችላለን አንዴ ወደ ትዳር ከገባን በኋላ ግን የትዳር አጋራችንን መለወጥ አንችልም፡፡ ታዲያ መምረጥ የምንችለው

ሀ/👉🏻 ፍቃደ እግዚአብሔርን በመጠየቅ:-
ከምንም በፊት እግዚአብሔርን ልንጠይቅ ይገባል፡፡ ሊቁ አንዲህ ይላል ማግባት ስትፈልግ አስቀድመህ ጸልይ አሳብህን ለእግዚአብሔር ንገረው፡፡ እግዚአብሔር መርጦ እንዲሰጥህ ለምነው፡፡ ጭንቀትህን ሁሉ በእርሱ ልይ ጣለው፡፡ አንተ እንደዚህ እርሱ እንዲመርጥልህ የምታደርግ ከኾነም አክብረኸዋልና እርሱም ለአንተ በጎ የትዳር አጋርን በመስጠት ያከብርሃል፡፡ ታዲያ አስቀድመን እንዲህ ብናደርግ ወደ ትዳር ስንገባ ፍቺ አይገጥመንም ሚስት ወይ ባል ሌላ አይመኝም በሌላ በማንም እንዳንቀና ያደርገናል ጠብ ክርክር አይኖርም ከጠብ ይልቅ ታላቅ የኾነ ሰላምና ፍቅር በመካከል ይኖራል፡፡ እነዚህን ደግሞ በጎ ምግባራትን ትሩፋትን ለመፈጸም አንቸገርም፡፡
አንድ ሰው አይቶ ስለ ወደደ፤ ሃይማኖት ስላለው፤ በጎ ምግባርን ገንዘብ ስላደረገ ብቻ ይህን ማግባት አለብኝ ብሎ ሊወስን አይገባውም፡፡ ወደውሳኔ ከመምጣት በፊት ያሰብኩት አሰብ የማነው የእግዚአብሔር አሳብ ሊሆን ይችላል ወይ የራሴ ወይ ደግሞ የዲያብሎስ አሳብም ሊኾን ይችላል ብለን ቆም ብለን ማሰብ ይገባል፡፡ አስቀድመን የንሰሐ አባታችንን ማማከር በጸሎት ሊረዱን ከሚችሉ መንፈሳውያን አባቶች ወይም እናቶች ጋር ተመካክሮ የዓቅማቸንን ያህል ሱባኤ መያዝ ተገቢ ነው፡፡ በተቻለን አቅም ደግሞ ስናማክር የትዳር ተቀዳሚ ዓላማ ያልገባቸው ሰዎችን ለእርዳታ እና ለምክር ባንጠይቅ የተሸለ ነው፡፡ በሰዎች ምስቅልቅል ሕይወት የሚነግዱም ስላሉ፡፡ ከዚህ ሁሉ ይልቅ የእግዚአብሔርን እርዳታ መጠየቅ በናንተ መሃል ሽማግሌ ለመሆን አያፍርም፡፡ መንፈሳዊ ሕይወታችሁ ጽኑዕ የትዳራችሁ ዋና ግብም ጽድቅ እንዲሆን እግዚአብሔርን ጠይቁ፡፡ ይሄን አድርገን እግዚአብሔር መፍቀዱን በምን እናውቃለን ብንል እግዚአብሔር በራዕይ ወይ በድምጽ እንዲነግረን አንጠብቅ ፍቃዱ ከሆነ ያች በአቅማችን የያዝናት ሱባኤ የመረጥነው ሰው የእግዚአብሔር ፍቃድ ከኾነ ያለን መውደድ እየጨመረ ይሄዳል፡፡ አሳቡ የራሳችን ምኞት ወይ የዲያብሎስ ምክር አሳብ ከነበረ ግን ጸሎት የማያፈርሰው የጠላት አጥር የለምና ስለዛ ሰው የነበረን አሳብ ይጠፋል፡፡ የእግዚአብሔር ፈቃድ ካልሆነ ያ የጀመርነው ጓደኝነት በሆነ ምክንያት እግዚአብሔር ያስቀረዋል። ለዚህ ምሳሌ ሊሆን የሚችለው የአበ ብዙኀን የአብርሃም አገልጋይ ለይስሐቅ ሚስት ለማምጣት በተላከ ጊዜ ያደረገው ጸሎትና ርብቃን የለየበት መንገድ፡፡ ዘፍ 24፡12

ለ/ 👉🏻የትዳርን ዓላማን በደንብ መረዳት፡- የትዳር የመጀመሪያ ዓላም ጽድቅን መፈጸም ነው፡፡ ሌሎቹ ዓላማዎች በዚህ ስር ይጠቃለላሉ
ልጅን ለመውለድ ብቻ አስቦ ማግባት አይገባም የትዳር አንዱ ዓላማ ልጅ መውለድ ቢኾንም ቅሉ ላይወልድም ይችላልና ፡፡
ወጪውን ለመቀነስ ብሎም አያግባ ዓላማው ከዚህም ያልፋል
አንድ ለአንድ መወሰን ጥሩ በሚል ብቻም ማግባት የለበትም መልካም ቢሆንም በውስጡ ከዝሙት ተጠብቆ ጽድቅን ለመፈጸም ካልሆነ ምክንያቱም ከአሕዛብም የጽድቅ አሳብ ሳይኖራቸው የሚወሰኑ አሉና፡፡
መልኳም ወደድኹ ብሎም ማግባት ውበት ባይጠላም እርሱ ግን የትዳር ዓላማ አይደለም ይህንን አድንቆ ከገባ ከተወሰንኑ ቀናት በኋላ አይማርከውም ይለምደዋልና፡፡ ሌላም ቆንጆ ቢያይ ልሂድ ሊል ነው።
እነዚህ ዓላማ ሳያደርግ ግን ጽድቅን አስቦ የገባ ባይወልድ እንኳ አይፋታም፤ ሩካቤ ባያደርግ፤ ቢሰንፍ እንኳን እራሳቸውን ከዝሙት ተጠብቀውና ራሳቸውን ገዝተው የትዳር አጋራቸውንም እግዚአብሔርን በማመስገን ይኖራሉ እንጂ አይፈቱም፡፡ ጋብቻ ግቡ ይኼ ነውና፡፡ መገንዘብ ያለብን ጋብቻ ወደ ቅድስና የሚያደርስ እንጂ በራሱ ጽድቅ አለመኾኑን ነው፡፡ ጋብቻ በእምነት ያገኘነውን ልጅነት አጽንተን እንድንይዝ እግዚአብሔር ወደ መምሰል እንድናደርግ የሚያደርግ ከድንግልና ሕይወት ቀጥሎ ያለ አንድ የሕይወት መንገድ እንጂ በራሱ ቅድስናን የሚሰጥ አለመሆኑን ነው፡፡ ሰለዚህ የትዳር አጋራችን ስንመርጥ ወደምንፈልገው ግብ የሚያደርሰንና እርሱም አብሮን የሚደርስ ሊኾን ይገባዋል፡፡ ፍቃደ እግዚአብሔር አስቀድመን ስንጠይቅና እግዚአብሔርም ጸሎታችንን ሲሰማ የሚሰጠን የትዳር አጋር ለዚህ ተቀዳሚ ዓላማ የሚስማማንን ነው፡፡ ይሄ ባይሆን ግን የትዳር ዓላማ ሳይገባን የምንገባበት ከኾነ ግን የትዳር አጋራችን የቱንም ያህል መንፈሳዊ ቢኾንም እንኳን አስቸጋሪ ነው፡፡
አንድ ምሳሌ እንይ መንፈሳዊ ሕይወታቸውን ብቻ አይተው የሚያገቡ ሰዎች ስግብግብ ነጋዴዎችን ይመስላሉ ይላል ሊቁ ቅ/ዮሐንስ አፈወርቅ። ስግብግብ ነጋዴዎች መርከቦቻቸውን ከዓቅም በላይ ዕቃ ስለሚጭኑባቸው ማዕበሉን መቋቋም አይችሉም፡፡ ይሰጥማሉ የማይችሉትን ሸክም ለመሸከም የሚገቡ ሰዎችም እንደዚህ ናቸው፡፡ የማይችሉትን የትዳር አጋራቸውን ጠባይ ለመሸከም ይገደዳሉ፡፡ ይህን ለመሸከም ሲሉ ከዓቅማቸው በላይ ወደ ኾነ ተጋድሎ ይገባሉ፡፡ ተጋድሎው በራሱ መልካም ቢኾንም ከዓቅማቸው በላይ ስለሚኾን ይመረራሉ፡፡ አንዱ ብዙ እንጸልይ፤ ብዙ እንስገድ፤ እንጹም ሲል ሌላኛው ግን ከዓቅሙ በላይ ስለሚኾንበት በዚህ ይሰናከልበታል፡፡ ሲከፋም ወደ ውጭ ማየት ሊመጣ ይችላል፡፡ በዓቅማቸው የሚጋቡ ከሆነ ግን ሚስቶች የቱንም ያህል ክፉ ቢኾኑም እንኳን ባሎች፡- ክርስቶስ ደግሞ ቤተ ክርስቲያንን እንደ ወደዳት ሚቶቻችሁን ውደዱ የሚለውን ቃል እግዚአብሔር ለመፈጸም አይቸገሩም፡፡ ሚስቶቹም ባሎቻቸውን በጌታ ለመታዘዝ አይቸገሩም፡፡ እህቴ እኔም የምመክርሽ ፍቃደ እግዚአብሔርን ጠይቂ!!!

5.0K views04:13