🇷🇺Өс көн дауамында беҙ, Бөтә донья башҡорттары ҡоролтайы ағзалары, милләттәштәр менән осрашыуҙар үткәрҙек. Быйыл үтәсәк Алтынсы съезд алдынан йөкмәткеле һөйләшеүҙәрҙе Әбйәлил һәм Баймаҡ райондарынан башланыҡ.
Биш йылда башҡарған эштәр, башҡорт халҡының үҫеш стратегияһы һәм милләтебеҙҙең киләсәге тураһында бик етди фекер алышыу булды.

Беҙгә этәргес биргән һәм рухыбыҙҙы күтәргән саралар ошо йылдарҙа бихисап булды: Башҡорт теле көнө, Милли кейем көнө, туған телде үҫтереү өсөн махсус ойошторлған фонд, билдәле шәхестәребеҙҙең исемдәрен мәңгеләштереү, Ырыуҙар хәрәкәтен ойоштороу, төнъяҡ - көнбайыш диалекта һөйләшкән милләттәштәребеҙҙе ҡайтарыу һ. б.

Милләтебеҙҙе үҫтереүгә дәүләт яғынан, шәхсән беҙҙең республика башлығы Радий Хабиров , ошо йылдарҙа бик күп көс һалды.

Һәр осрашыуҙа борсоған бөтә һорауҙарҙы уртаға һалып һөйләштек. Беренсе урында - юлдарҙы яңыртыу, биналарҙы төҙөкләндереү булһа, икенсе урында балаларҙың тыуған телен белмәү, дингә бәйле һорауҙар, БСТ телеканалы һәм «Юлдаш» радиоһының эше буйынса бик күп тәҡдимдәр яңғыраны.

Әлбиттә ғинуар айында булған ваҡиғалар тураһында ла һөйләштек. Ысынлап, ярҙам һорап килгән әсәләрҙе бик йәл, улар улдары өсөн борсола, ни өсөн әллә кемгә ышанып шунда барҙылар һәм хәҙер законды боҙоусылар булып сыҡтылар, тип өҙгөләнәләр. Өндәүселәр ҡасып бөттө, ә беҙ хәҙер ҡайҙа барырға белмәйбеҙ, тиҙәр. Үкенесле тәжрибә.

Провокация һәм манипуляция ысулдары дошмандар тарафынан әлеге осорҙа киң ҡуланыла һәм уларға ҡаршы тороу, ысынбарлыҡты һәм ялған хәбәрҙе айыра белеү бик кәрәк. Мәғлүмәт һуғышы бара һәм көсәйә генә, ҡыҙғанысҡа ҡаршы. Аңлатыу эштәре урындарҙа бик кәрәк һәм район хәкимиәте вәкилдәре халыҡ менән мотлаҡ осрашып, тығыҙ бәйләнештә булырға тейеш.

Бик матур, олпат ағайҙар һәм апайҙар, дәртле йәштәр, рухлы һәм илһөйәр кешеләр йәшәй беҙҙең ауылдарҙа. Көс туплап, фатиха алып ҡайттыҡ һәм, әлбиттә, артабан бергә киләсәк өсөн эшләргә ҙур ниәттәр менән!

#Ҡоролтай
ЭльвираАиткулова