Chempionlarini ulkan sovgʻalar bilan siylayotgan xalq shu sovgʻa qilinayotgan Tahoe'dan bittagina olish uchun sentyabrdan boshlab 10%ga oshirilayotgan minimal ish haqini 960 oy (80 yil) davomida yemay-ichmay, hech narsaga sarflamay yigʻishi kerak ekan.

Yangi oʻquv yili boshlanishiga ham oz qoldi. Agar ish qidirayotgan yoki ish joyini oʻzgartirmoqchi boʻlgan ustozlar boʻlsa, ushbu post siz uchun foydali boʻlishi mumkin.

🟢 Rahimov School xususiy maktabi quyidagi fan oʻqituvchilarini ishga taklif etadi:

• Boshlangʻich sinf
• Boshlang'ich sinf (rus sinflari uchun)
• Rus tili
• Kimyo
• Biologiya
• Jismoniy tarbiya (qizlar uchun)
• Audit (Kurator)
Shuningdek: maktab psixologi.

Oʻqituvchilarga quyidagi ish sharoitlari vaʼda qilinmoqda:

— Maktab hududida tushlik. Maktab hisobidan 50% toʻlab beriladi
— Farzandlaringiz uchun 30% lik chegirma
— Hujjatbozliklardan xoli avtomatlashgan ish jarayoni
— Maishiy xaridlarda maktab tomonidan koʻmak
— 500 ga yaqin kitoblarga ega kutubxona
— Imtihon qilib olingan oʻquvchilar
— Ustozlar uchun dam olish xonalari
— Yuqori oylik maosh: 4-17 mln soʻm

Qiziqqanlardan oʻz arizalaringizni @RahimovSchool_jbot orqali qoldirish va bilimingizni maxsus sinov testlari orqali sinab ko'rish soʻraladi.

Mintaqadagi aholi soni jihatdan eng katta mamlakatni boshqarayotgan hukumat rahbari fact-checking qila olmasligi (yoki qilmasligi) va buni omma oldida namoyish qilishi - juda achinarli holat.

Qizigʻi, bir narsaga eʼtibor berganman. Chinovniklarimiz kabinetlaridagi televizorlarda odatda "Rossiya 24" yoki "Rossiya 1" yoqilgan boʻladi. Bu kanallarni muntazam koʻrish miya atrofiyasiga sabab boʻlishi mumkin. Hisobga olib qoʻyilsa foydadan xoli boʻlmaydi.

Qiziq bir qonuniyat bor. Farzandlarning talant va qobiliyatlari ota-onalarning lavozimlariga toʻgʻri proporsional ravishda oʻsib boradi. Bu qonuniyatni tasdiqlovchi misollar istalgan joyda va istalgan sohada topiladi.

"A"ni aytgandan keyin "B"ni ham aytish kerak emasmi?

Yo'q, menimcha Saymon aka (Simon Kuper) bu maqolani Toshkentda to'y oshi yeb, maza qilib yozmagan. Shunchaki bu maqola haqida yozib chiqqanlar (sportwashing?) "A"ni aytib, "B" haqida indamaslikni ma'qul ko'rishgan, ya'ni maqolaning boshidagi fikrlarni olib, davomidagi fikrlarni tashlab ketishgan. Aks holda sal sinchkovroq o'quvchida "maqolaning boshidagi fikrlar Yangi O'zbekistonga tegishlimi, yoxud ikkinchi yarmidagi?" degan savol tug'ilmasligi mumkin emas edi.

Kuper yozadi:

"Iqtisodchi Stefan Shimanski va men “Sokkernomika” kitobimiz uchun Olimpiya o‘yinlari va boshqa xalqaro musobaqalarning barcha natijalari asosida sport yutuqlari jadvalini tuzganimizda, shuni aniqladikki, dunyodagi aholi jon boshiga eng yaxshi sport mamlakati - boy, demokratik Norvegiya ekan. Shubhasiz, mamlakatlarning sport yutuqlari asosidagi har qanday reytingdagi o'rni hamda mamlakat boyligi va aniqrog'i, inson taraqqiyoti o'rtasida yuqori darajada korrelyatsia bo'ladi...

Buni qanday izohlash mumkin? Boy demokratik davlatlar, ayniqsa, ijtimoiy demokratik davlatlar o'z aholisiga g'amxo'rlik qilishni yaxshi uddalaydilar. Bu daromad darajasi tulicha bo'lgan insonlarga sport bilan shug'ullanish uchun imkoniyat yaratish ham demakdir. Masalan, Norvegiyaning eng chekka joylarida ham, odatda, uydan shundoq bir qadam narida har qanday ob-havoga mos keladigan sport maydonchasi topiladi... Hamma uchun sport maydonchalari va murabbiylar bilan ta'minlay oladigan mamlakatlar - ko'pgina demokratik davlatlar shunday - hamma uchun sog'liqni saqlash tizimi va maktablar bilan ta'minlashni ham yaxshi uddalaydilar. Boy va demokratik bo'lish hamda yaxshi ta'lim olgan, sportda yaxshi bo'lish - umuman olganda, bir tanganing ikki tarafidir.

... Qashshoqroq mamlakatlarda kamroq odamlar bunday imkoniyatga egadirlar. Sohilda o'z futbol mahoratini oshirayotgan braziliyalik o'spirinlar haqidagi stereotipni unuting. Bular istisnolar. Dunyodagi ko'plab kambag'allarning olimpiya salohiyati tug'ilishdan oldin, oziq-ovqat yetishmasligi tufayli barbod bo'ladi. Va Braziliya, Hindiston yoki Afrikaning katta shaharlarini aylanib, o'ynash joylarini qidirib ko'ring. Rasmiylar kamdan-kam hollarda aholini bunday imkoniyatlar bilan ta'minlashadi".

Agar sizda endi "xo'sh, maqolaning birinchi yarmidagi fikrlar Yangi O'zbekistonga tegishli edimi, yoxud ikkinchi yarmidagi?" degan savol tug'ilgan bo'lsa, yaqin atrofdan sport bilan tekin (har xil fitnes klublariga katta summa to'lamasdan) shug'ullanish uchun sharoit qidirib ko'ring. Sog'liqni saqlash va ta'lim tizimining holatiga boqing. Shunda savolga javobni o'zingiz uchun topa olasiz.

"Madaniyat va maʼrifat" kanali "Agar" koʻrsatuvida Bakiroo aytgan "yoʻqolib qolgan" va jamoatchilikni chuqur tashvishga solgan qonun zarurligi oqlab-koʻklab berilmoqda. Eng qizigʻi, suhbat bu qonun qabul qilingan va kuchga kirgan, degan taassurot qoldiradi. Ertaga bu qonun tasdiqlangani haqida bilib qolsak ajablanmayman.

Parlament va fuqarolik jamiyati "oʻlik jon" boʻlmaganda, shuncha muammo turgan joyda, byudjet ilma-teshik boʻlib yotgan paytda bitta medal uchun bir necha million dollar sarflanmasdi. Yoki vazir soliq toʻlovchilar pulini xususiy telekanal loyihasi uchun ajratib berib, keyin "uyimni sotib boʻlsa ham toʻlayman" deb "bodilik" qilmasdi. Parlament shunchaki soliq toʻlovchilar pullari bebiliska sarflanishiga yoʻl qoʻymasdi.

Soliq toʻlovchilar uchun, jamiyat uchun eng qimmatga tushadigan narsa - tizginsiz ijro hokimiyati-yu uning soxta obroʻ uchun gigantomaniya loyihalari emas. Eng qimmatga tushadigan narsa - oʻlik parlament.

Lukashenkoning Qozogʻiston haqidagi gaplaridan keyin Belarus elchisi Qozogʻiston Tashqi ishlar vazirligiga chaqirtirilgan.

Elchining TIVga chaqirtirilishiga sabab boʻlgan intervyuda Oʻzbekiston haqida ham gap ketgan. Oʻzbekistonda elchi TIVga chaqirtirilgani yoki boshqa biron tarzda munosabat bildirilgani hozircha maʼlum emas.

Ukrainada bolalar, ayollar va qariyalar ustiga raketalar yogʻilishi, kasalxona va boshqa muhim ijtimoiy obyektlarning vayron qilinishiga hissa qoʻshyapmizmi shunda? "Любая бизнес хороша"?

Zulmning oddiy holga aylanishi, taʼbir joiz boʻlsa, absurd darajasiga chiqishi

Soqol uchun (ha, toʻgʻri tushundingiz, oddiy soqol, yaʼni aksar erkaklarda iyakdan va yuzning boshqa qismlaridan oʻsib chiqadigan tuk uchun) fuqarolarning sud tomonidan maʼmuriy va jinoiy javobgarlikka tortilishi holatlariga munosabat bildirar ekan, Sardor Salim yozadi:

"Yovuzlikning odatiyligi...

... Xullas, yaqqol aksil-konstitutsiyaviyligi va barcha tamal inson huquqlariga zidligi bilan ajralib turgan qonunlar va "siloviklar" faoliyati bu jamiyatda fasodga sabab bo'lmoqda va aks natija beradi. Eng yomoni, biz chidab bo'lmas huquqiy o'zboshimchalik va zo'ravonlikka ko'nikdik, buni tabiiy bir jarayon deb qabul qilyapmiz.

Biroq, huquqiy o'zboshimchalik va zulm bu tarzda davom etaversa, "soqolga tig' tekkizgani uchun" 15 darra beriladigan davrlarga tezda kelishimiz ham hech gap emas".

Shaxs soqolning bor-yoʻqligi yoki uning uzun-kaltaligiga qarab identifikatsiya qilinmaydi. Bunday tizimlar yuzdagi oʻziga xos nuqtalarni (masalan, yuzning geometrik shakli, ikki koʻz orasidagi masofa, jagʻ, burun, lab, yonoq shakllari) tanib olish va ularni bazadagi maʼlumot bilan solishtirish asosida ishlaydi. Soqolning bor-yoʻqligi bunday tizimlar uchun hech qanday ahamiyatga ega emas.

Tushunishimcha, bu yerda gap soqolning "shaxsni identifikatsiya qilishga imkon bermayotganida" emas. Gap bizda "tepadagilar" "diniy fon" deb ataydigan narsadan qoʻrqishlarida. Va bunday "soqolga qarshi tadbirlar", ularning nazdida, "diniy fonning oshib ketmasligi" uchun xizmat qiladi. Masalan, ayol kishilarning (qizlarning) roʻmollariga qarshi kurash ham ular uchun shunday "fonni normallashtiruvchi" tadbirlardir.

Lekin, bunday Konstitutsiyaga va har qanday sogʻlom mantiqqa zid, noqonuniy va absurd buyruqlar berayotganlar va ularni bajarayotganlar bir narsani tushunmaydi (yoki tushunishni istamaydi). Din ham ayrim insonlar uchun tabiiy ehtiyoj. Qolaversa, Konstitutsiya va qonunlarda belgilangan huquq. Soqol uchun jarimaga yoki qamoqqa solish ularni dindan qaytarib qolmaydi. Lekin bunday zulmni sodir qilganlar, unga yoʻl qoʻyganlarga nisbatan kattagina adovatni keltirib chiqarishi va vaqt-soati kelib teskari, umuman kutilmagan natija berishi mumkin. IMHO.

O‘zbekiston Afg‘onistonning Mozori Sharifida 6 mln dollarga 1000 talabaga moʻljallangan madrasa qurib beradi. Bu Balx viloyati hokimi iltimosiga binoan amalga oshirilmoqda.

Eslatib oʻtamiz. Oʻzbekistonning oʻzida oʻquv binolari yetishmasligidan 2 milliondan oshiq oʻquvchi 2- yoki 3- smenada oʻqishga majbur. 20% maktablar kapital taʼmirga muhtoj yoki yaroqsiz ahvolda. 70% maktabda esa kanalizatsiya yoʻq.

"Balkim oldin oʻzimizning farzandlarimiz davlat Konstitutsiyada oʻz boʻyniga olgan umumiy oʻrta taʼlimni normal sharoitlarda olishi uchun sharoit yaratib, keyin boshqa davlatda madrasa qurish uchun millionlab dollar sarflarmiz?" degan savolni deputatlardan birontasi bergan yoki bermaganligi haqida xabarlarga koʻzim tushmadi.

Ijtimoiy tarmoqlardagi xabarlarga koʻra, 28-avgust kuni Maktabgacha va maktab taʼlimi vaziri Hilola Umarova ishtirokida matbuot anjumani boʻlar ekan. Nahotki oradan 1 yil-u 9 oy oʻtib vazir matbuot anjumani oʻtkazadigan, yigʻilib qolgan savollarga javob beradigan kunlarga ham yetib keldik?

Darvoqe. Dilfuza opa (Sobirova), iltimos, xabar bering, bu ochiq matbuot anjumanimi? Borsak, savollarimizni bersak boʻladimi?

Qiyshiq mexanizm to'g'rilanishi kerak

Jurnalist Ilyos Safarovning yozishcha, Oliy ta'lim, fan va innovatsiyalar vazirligi yana bir xususiy universitet litsenziyasini bekor qilish bo'yicha sudga da'vo arizasi kiritgan. "Ha deganda litsenziya olinaversa, yopilaversa, xususiy universitet qoladimi? Axir, universitet ochish, o'qituvchi olib kelish, uni tanitish, qabul jarayoni shunchaki o'yinchoq ishlar emas", deb yozadi jurnalist.

Oliy ta'lim, fan va innovatsiyalar vazirligi shu paytgacha litsenziyasi bekor qilingan qaysi xususiy OTM qanday xatolarga yo'l qo'ygani, qaysi litsenziya talablarini buzgani to'g'risida biron-bir rasmiy ma'lumot bergan emas (har qalay, men ko'rmadim). Lekin vazir Sharipov oldinroq u boshchiligidagi vazirlik qonunga "tupurib", xususiy universitetlarga litsenziya berishni to‘xtatganini aytgan edi va va buni "O‘zbekistonda xususiy oliygohlar yetarlicha" ekani bilan izohlagan edi. Balki, shu yo'l bilan vazirlik "yetarlicha" deb o'ylagan (qaysi mezon asosida "yetarlicha" - aniq emas) xususiy oliygohlar sonini kamaytirishni maqsad qilgandir, bilib bo'lmaydi.

Tasavvur qiling: korxona bir mahsulot (non, kolbasa, shokolad - farqi yo'q) ishlab chiqaradi. Va xuddi shu korxonada xuddi shunday mahsulot ishlab chiqaruvchi boshqa korxonalarga ruxsat berish (yoki bermaslik), ularning faoliyatini tekshirish, bu korxonalarning yopilishini talab qilib sudga murojaat qilish vakolati bor. Absurd deysizmi? Albatta, absurd. Chunki o'sha ham o'zi ham mahsulot ishlab chiqaradigan, ham xuddi shunday mahsulot chiqaruvchi boshqa korxonalarga ruxsat berish vakolatiga ega korxona bozorda faqat o'zi (yoki o'ziga yaqin) korxonalar qolishidan manfaatdor-ku. Bunday vaziyatda bu korxona hech qanaqasiga boshqa korxonalar ishiga xolis baho bera olmaydi.

Oliy ta'lim bilan vaziyat xuddi shunday: Oliy ta'lim, fan va innovatsiyalar vazirligi ham o'zi (davlat OTMLari orqali) oliy ta'lim sohasida xizmatlar ko'rsatadi, ham xuddi shunday xizmatlar ko'rsatuvchi xususiy tahkilotlar ishiga baho beradi. Bu nafaqat adolatsizlik, mantiqsizlik, manfaatlar to'qnashuvi, balki "Litsenziyalash, ruxsat berish va xabardor qilish tartib- taomillari toʻgʻrisida"gi qonunga zid. Bunday vaziyatda vazirlik: a) davlat va nodavlat OTMlariga bir xil baho bermaydi (bera olmaydi, chunki davlat OTMlari "o'ziniki", nodavlatlari "begona); b) nodavlat OTMlarning kamroq bo'lishidan (yoki umuman bo'lmasligidan) manfaatdor. "Nechta davlat OTMlarini bilaman, na o'qitishda sifat bor na tizimda. Butun jarayon korrupsiyalashgan. Qani, kim tugatadi ularni, kimning kuchi yetadi davlatning o'sha universitetlarini tozalashga? Nega tozalikni, yopishni o'sha tomonlardan boshlamaysiz? Nega kuchingiz doim himoyasizga yetadi?" deb yozadi Ilyos Safarov. Haqiqatdan ham, vazirlik nodavlat OTMlariga qo'yilayotgan talablar prizmasida davlat OTMlarini tekshirsa, nechtasi tekshiruvdan omon chiqa oladi?

Kech bo'lmasdan bunday absurd holat to'g'rilanishi kerak. Ta'lim sohasida sifatga baho beradigan alohida, mustaqil, xolis regulyator bo'lishi kerak. Umuman, davlat OTMlariga ham akademik erkinlik berib, Oliy ta'lim vazirligidan voz kechilsa ham bo'ladi - barcha OTMlar sifatiga xolis baho beradigan regulyatorning o'zi yetadi. (OTMlari xalqaro reytinglarda muntazam yuqori o'rinlarni egallab keladigan davlatlarda Oliy ta'lim vazirligi yo'q - ularda Ta'lim vazirliklari OTMlar faoliyatini nazorat qilmaydi).

P.S. Faqat bu regulyator "eski monstr" - DTM bo'lmasligi kerak. 30 yildan beri testlarni o'tkazishga ilmiy yondasha olmayotgan, xodimlari g'ayriilmiy bayonotlar beradigan tashkilotga ta'lim sifatiga baho beruvchi regulyatorlik funksiyalarini berish - juda katta xato bo'ladi.

Lavozimga tayinlanganidan 1 yil-u 9 oy o'tib Maktabgacha va maktab ta'limi vaziri Hilola Umarova bugun birinchi marta matbuot anjumani o'tkazibdi. Vazirga bermoqchi bo'lgan bir qancha savollarim bor edi, afsuski, bora olmadim.

Matbuot anjumani biron-bir platformada efirga uzatildimi? Ko'rsa bo'ladimi? Ta'limning, anjumanda berilgan ma'lumotlar, savollar va javoblarning jamiyat uchun ahamiyatini hisobga olib, vazirlik matbuot xizmati tadbir translyatsiyasini ta'minlash ko'rgan deb umid qilaman. Har qalay, vazirning "debyuti" - birinchi matbuot anjumani. Qolaversa, vazirlik maybuot anjumani odatda ahamiyati bundan ancha pastroq bo'lgan tadbirlarni efirga uzatishni unutmaydi.

Hilola UMAROVA: “6000 nafardan ziyod oʻqituvchi 1000$ maosh olyapti”

Agar matematika bilimlarim pand bermayotgan boʻlsa, 6000 - bu jami oʻqituvchilar sonining 1%ini tashkil qiladi. 1% oʻqituvchi eng yuqori minbarlardan vaʼda qilingan 1000$ni olishi - matbuot anjumanida maqtanishga emas, yigʻlashga arzigulik holat. Menimcha.

Zamonaviy dunyoda tanqidiy fikrlash ko'nikmasi har qachongidan ham muhim ahamiyat kasb etadi. Tanqidiy fikrlash - berilgan ma'lumotni boshqa manbalardan kelayotgan ma'lumotlar bilan solishtirib, mustaqil xulosalar chiqara olish hamdir. Tanqidiy fikrlashda taqdim qilingan ma'lumotning asl manbasini topib, tanishib chiqish ham muhim, chunki ba'zan ikkinchi manba turli sabablarga ko'ra, asl manbadagi ma'lumotni to'liq ma'lumotni taqdim qilmayotgan bo'lishi mumkin. Bunga misol - Financial Times kolumnisti Saymon Kuperning “Olimpiya medallari jadvali bizga nimalar haqida hikoya qiladi?” nomli maqolasi. (Bu haqda yuqorida ham yozilgan edi).

Darvoqe. Negadir Olimpiada va unda egallangan medallarning qanchaga tush(ayot)ganligi haqidagi materiallar bir qancha OAVlardan g'oyib bo'ldi (1, 2). BBC O'zbek xizmati bunga e'tibor qaratgan va o'z ko'rsatuvlaridan birini shu masalaga bag'ishlagan.

"Bitta o‘qituvchining oyligini 1 million [so‘m]ga bir oyga oshiradigan bo‘lsak, bir yilga 7 trillion so‘mdan (taxminan 553 million dollar — tahr.) ziyod mablag‘ degani”. Maktabgacha va maktab ta'limi vaziri o‘rinbosari Temurjon Komilov.

"Hamma birdek 1000 dollar oladi, degan narsa bu — utopiya" degan vazir o'rinbosari, masalan, Prezident maktablarida $4200dan oylik olayotgan (va mahalliy o'qituvchilarning tushiga ham kirmaydigan imtiyozlar taqdim qilinayotgan) yoki "til egalari" sifatida taklif qilingan xorijlik o'qituvchilarning faoliyati qay darajada samaradorligi haqida fikr bildirmagan. Masalan, falon pulga "til egalari"ning jalb qilinishi (ular haqiqatda til egasi bo'lgan taqdirda ham) ta'lim sifatini oshirishga xizmat qilishi ilmiy isbotini topmaganligi haqida oldin yozgan edim.

Xo'sh, hamma o'qituvchisi "1000$ olishi utopiya" bo'lgan, aksar o'qituvchilar respublika bo‘yicha o‘rtacha ish haqidan sezilarli darajada past oylik olayotgan bir vaziyatda, O'zbekiston sharoiti uchun katta oylik va katta imtiyozlar berib xorijlik o'qituvchilarning jalb qilinishi qay darajada o'zini oqlayapti? Bu yondashuvning ijobiy taraflari nimada bo'lyapti-yu, salbiy taraflari nimada bo'lyapti? Arziyaptimi? Bu masalalar ilmiy tahlil qilib ko'rildimi? Tahlil natijalari bilan tanishsak bo'ladimi?

Xabar berilishicha, lavozimga tayinlanganidan beri o'tgan 1 yil-u 9 oy ichida (adashmasam) birinchi marta matbuot anjumani o'tkazib, savollarga javob bergan Maktabgacha va maktab ta'limi vaziri darsliklar haqidagi savolga javob berar ekan, darsliklar ta'minotidagi muammolarga mas'uliyatni silliqqina qilib ota-onalarga ag'dargan.

Keling, xotirasi qisqalarga eslataylik.

"Ижтимоий тармоқ ҳамда мессенжердаги гуруҳларда янги ўқув йили бошланса-да, фарзандига дарслик етишмаётгани, тўлиқ тарқатилмагани ҳақида ота-оналарнинг норозилиги янграмоқда. Аксар ота-она бу масала шу йилги эмас, аксинча охирги йиллардаги муаммо дейди. hudud24.uz мавзуга диққат қаратиб, боласининг дарслик билан тўлиқ таъминланмаганидан норози ота-она ва мактаб маъмуриятига қулоқ солди ҳамда тегишли вазирликдан бунинг сабабини сўради". Hudud.uz, 2023-yil 8-sentyabr. (O'shanda vazirlik mas'uliyatni Ta'limni rivojlantirish markaziga, markaz esa vazirlikka yuklagan edi).

"2023-yilda O‘zbekistondagi maktablar uchun yangi darsliklar nashr etish maqsadida budjetdan 920 milliard so‘m ajratildi. ... Lekin O‘zbekiston maktablarida yangi 2023/2024 o‘quv yili boshlanganiga 2 haftadan oshganiga qaramay ayrim maktab o‘quvchilari hamon ba’zi darsliklarsiz ta’lim olmoqda. Bu haqda ota-onalar va o‘qituvchilar ijtimoiy tarmoqlarda yozishmoqda". Gazeta.uz, 2023-yil 19-sentyabr.

"С этого учебного года они начали поступать в школы. Начали — потому что по прошествии трёх недель с начала учебного года многие школы до сих пор не получили полный комплект. По предметам, по которым нет новых учебников, используются старые. ... В социальных сетях родители выкладывают фотографии страниц новых учебников издательства Novda Edutainment, на которых имеются ошибки, иногда грубые. Они также указывают на сложность тем и то, что они не связаны с программами предыдущих классов". Gazeta.uz, 2023-yil 22-sentyabr.

O'tgan yili boshlang'ich sinf darsliklari bilan bog'liq muammolarga - ularning maktablarga o'quv yili boshida yetib bormaganligiga, ulardagi jiddiy metodik, ilmiy va texnik xatolarga - ham ota-onalar aybdormi? Nega matbuot anjumanida vazir yoki vazirlik mutasaddilari o'tgan yilgi muammolardan qanday saboqlar chiqarishgani haqida (agar saboqlar chiqarishgan bo'lsa) indashmadi? Darvoqe, bu yil ham boshlang'ich sinf o'quvchilari o'sha - qaysi dasturlar asosida yozilganligi mavhum va xatolarga to'la - darsliklar bilan o'qishadimi?

Maktablar vazir boshchiligidagi ikkinchi o'quv yilini aniq bir curriculum'siz (ta'lim standartlari, o'quv dasturlarisiz) boshlayotgani - alohida masala va bu haqida alohida fikrlashamiz.