🏦 Moody's рейтинг агентлиги Капиталбанк рейтингини оширди

27 январь куни Moody's халқаро рейтинг агентлиги "Капиталбанк" АТБ кредит қувватининг асосий баҳосини (BCA) b3 дан b2 даражасига ва банкнинг миллий ва хорижий валютадаги депозитлари рейтинги даражасини b2 даражагача кўтарди.

Moody's прогнозларига кўра, жадал ўсиш шароитида банк капиталининг етарлилиги барқарорлигича қолмоқда, бу эса банкни мижозлар, ҳамкорлар ҳамда инвесторлар учун ишончли ҳамкорга айлантиради. Банкнинг асосий кўрсаткичлари кейинги 12-18 ойлар давомида барқарор қолиши қайд этилган.

Батафсил - https://bankers.uz/news/1028

@bankers_uz

🏦 Микрокредитбанк банкоматлари профилактика муносабати билан вақтинча ишламайди

Микрокредитбанк тизимида 2-5 февраль кунлари банкоматлар орқали хизмат кўрсатиш вақтинча тўхтатилади. Бу ҳақда банк телеграм каналида маълум қилинди. Хабарда мазкур жараён МКБ тизимида трансформация ва профилактика ишлари амалга оширилиши муносабати билан деб изоҳланган.

Мижозларнинг нақд пулга бўлган талабини қондириш мақсадида, ушбу кунларда одатдаги тартибда банк кассалари орқали нақд пул маблағларини ечиш имконияти яратилиши айтилган.

Эслатиб ўтамиз, Марказий банк маълумотларига кўра, 2022 йил 1 январь ҳолатига республика бўйича Микрокредитбанкка қарашли 537 та банкомат ўрнатилган.


@bankers_uz

🏦 Агробанк АҚШнинг энг йирик банкларидан бири билан вакиллик муносабатларини ўрнатди

Жорий йилнинг 31 январь куни "Агробанк" АТБ "дунёнинг глобал аҳамиятли банклари" қаторига кирувчи, АҚШнинг энг йирик ва қадимий банкларидан бири — The Bank of New York Mellon'да ўз вакиллик ҳисобварағини очди. Бу ҳақда Банк матбуот хизмати маълум қилмоқда.

Вакиллик ҳисобварағининг очилиши тўғридан-тўғри ҳисоб-китобларни амалга ошириш, халқаро пул ўтказмалари хизматларини ривожлантириш ҳамда жаҳон молия бозорида Агробанк мақомини мустаҳкамлашга йўналтирилган.

Маълумот учун, очилиш тарихи 1784 йилга тақалувчи The Bank of New York Mellon — америка холдинг компанияси бўлиб, 2007 йилда The Bank of New York и Mellon Financial Corporation'ларнинг бирлашувидан ташкил топган. Банкнинг 40 дан ортиқ мамлакатларда ваколатхоналари бўлиб, дунёдаги энг қадимги 20 банкдан бири ҳисобланади.


@bankers_uz

🏦 Алоқабанк бошқарув раисининг биринчи ўринбосари тайинланди

2017 йилдан Маданият вазири ўринбосари лавозимида ишлаб келган Умиджон Абдураҳимович Қўқонбоев АТ "Алоқабанк" бошқаруви раисининг биринчи ўринбосари лавозимига тайинланди. У.Қўқонбоев 1999-2017 йилларда Алоқабанк тизимида турли лавозимларда, шу жумладан, бошқарув раиси ўринбосари, бошқарув раисининг биринчи ўринбосари лавозимларида ишлаган. Эслатиб ўтамиз, амалдаги меъёрий ҳужжатлар талабларига кўра, У.Қўқонбоев Марказий банк розилиги олингандан сўнг расман лавозимига тайинланган ҳисобланади.

Батафсил - https://bankers.uz/news/1031


@bankers_uz

🏦 Агробанк Қамашидаги ҳолат юзасидан муносабат билдирди

Аввалроқ Агробанкнинг Қамаши филиали масъуллари маблағларни ўзлаштиришда гумон қилинаётгани тўғрисида хабар берилганди. Ушбу ҳолат юзасидан банк матбуот хизмати расмий муносабат билдирди.

Қайд этилишича, ушбу жиноий ҳолат банк томонидан ўтказилган режали комплаенс тадбирлари давомида аниқланган ва тегишли тартибга асосан тўпланган ҳужжатлар Қашқадарё вилояти прокуратурасига юборилган.

Расмий муносабатда амалдаги меъёрий ҳужжатлар талабларига кўра, "шахс суд ҳукмига асосан у ёки бу жиноятни содир этганликда айбдор деб топилмагунига қадар уни жиноят содир этишда айблаш ёки гумон қилиш мумкин эмаслигини, тергов материалларини оммавий ахборот воситаларида эълон қилиш тегишли рухсатларга асосан амалга оширилиши лозим"лигини эслатиб ўтилган.

Банк ҳолат юзасидан тегишли маълумотлар ўрнатилган тартибда тақдим этилишини маълум қилган.

Батафсил - https://bankers.uz/news/1035


@bankers_uz

🏦 Марказий банк Наманган вилояти бошқармасига янги раҳбар тайинланди

2018 йил 7 февралдан буён Марказий банк Наманган вилояти бош бошқармаси бошлиғи ўринбосари лавозимида ишлаётган Маъруфжон Маҳмуджонович Раҳмонов МБ Наманган вилояти бош бошқармаси бошлиғи лавозимига тайинланди. У мазкур лавозимда фаолият юритган Жамшид Алиевнинг ўрнида иш бошлади.

Маъруфжон Раҳмонов 1982 йил Уйчи туманида туғилган. Маълумоти олий, 2006 йили Наманган муҳандислик-иқтисодиёт институтини тамомлаган.

Меҳнат фаолияти давомида Халқ банки Наманган вилоят филиалида турли лавозимларда, Республика Инкассация хизмати Наманган вилояти бошқармаси, Марказий банк Наманган вилояти бош бошқармасида раҳбарлик лавозимларида ишлаган.

Батафсил - https://bankers.uz/news/1036


@bankers_uz

🏦🇹🇷 Туркиядаги зилзила оқибатида жабр кўрганлар учун хайрия маблағларини Ўзбекистондан комиссиясиз ўтказиш мумкин

Туркия Жумҳурияти Ички ишлар вазирлиги Офат ва фавқулодда вазиятлар бошқармаси (AFAD) табиий офатдан жабрланган фуқароларнинг шошилинч эҳтиёжларини тўлдириш мақсадида ёрдам хайриясини бошлади.

Ziraat Bank Uzbekistan'нинг маълум қилишича, ёрдам беришни истаганлар хайрияларини мазкур банкнинг исталган филиалидан қуйидаги реквизитлар орқали Туркияга пул ўтказмасини ҳеч қандай комиссиясиз юбориш имкониятига эга:

T.C. ZİRAAT BANKASI A.Ş.
ANKARA KAMU KURUMSAL ŞUBESİ
TL : TR73 0001 0017 4555 5555 5552 04
USD : TR 46 0001 0017 4555 5555 5552 05
EURO : TR 19 0001 0017 4555 5555 5552 06
SWIFT : TCZBTR2A


@bankers_uz

🏦 Ўзбекистон олтин-валюта захиралари $174 млнга кўпайди

Марказий банк 1 февралга Ўзбекистоннинг халқаро захиралари ҳолатини эълон қилди. Маълумотларга кўра, Ўзбекистоннинг халқаро захиралари ҳажми 35 млрд. 941,9 млн. АҚШ долларини ташкил қилмоқда.

Ўзбекистон Республикаси ялпи халқаро захиралари 2023 йилнинг январь ойида ўтган ойга нисбатан 174,4 млн. долларга кўпайди.

Захира активлар таркибида монетар олтин 23,56 млрд. долларни ташкил этмоқда. Бир ой олдинга нисбатан монетар олтин қиймати 491,7 млн. долларга кўпайган бўлса, олтиннинг физик ҳажми 370 минг унцияга камайган.

Ялпи захираларнинг валюта қисми 1 январь ҳолати билан солиштирганда камайиш ҳажми 331,3 млн долларни ташкил қилган. Валюта захиралари ҳозирда 11,3 млрд долларни ташкил қилмоқда.


@bankers_uz

🏠 2023 йил ипотека кредитлари учун 1 трлн. сўм субсидия йўналтирилади

Норматив-ҳуқуқий ҳужжатлар лойиҳалари муҳокамаси порталига 2023 йилдаги давлат дастурига оид президент фармони лойиҳаси жойлаштирилди.

Унга кўра, 26 минг нафар фуқарога бозор тамойилларига асосланган ипотека кредитлари, шунингдек, 11 минг нафар фуқароларга бошланғич бадал ва фоиз тўловларининг бир қисмини қоплашга субсидиялар ажратиш учун Давлат бюджетидан 1 трлн. сўм миқдорда маблағлар йўналтирилади.

Батафсил: https://bankers.uz/news/1040


@bankers_uz

🏦 Ўзагроэкспортбанк бошқарув раиси лавозимига россиялик мутахассис тайинланди

"Ўзагроэкспортбанк" АТБ кузатув кенгашининг жорий йил 27 январдаги қарорига кўра, россиялик мутахассис Артём Анатольевич Попов банк бошқаруви раиси, бошқарув аъзоси этиб тайинланди. Бу ҳақда Корпоратив ахборот ягона порталида маълум қилинган.

Қайд этилишича, 2017 йилдан банк бошқаруви раиси бўлиб ишлаб келган Наврўзжон Алимов ҳамда банк бошқаруви раиси ўринбосари Азиз Валиев билан меҳнат шартномалари ҳам муддатидан олдин бекор қилинган. Бошқарув таркибидаги ўзгартиришлар банкнинг ягона акциядори - "SUPPORT LEVEL" МЧЖ хатига асосан амалга оширилган.

Эслатиб ўтамиз, ўтган йил аввалида Давактив томонидан Ўзагроэкспортбанк сотилганлиги ҳақида эълон қилинган хабарда Артём Попов Россиянинг "Совкомбанк" ОАЖида Бошқарув раиси маслаҳатчиси лавозимида эканлиги кўрсатилганди.

Батафсил - https://bankers.uz/news/1041


@bankers_uz

🏦 Асакабанкка бошқарув раиси тайинланди

2020 йил февраль ойидан "Ўзмиллийбанк" АЖ бошқарув раиси ўринбосари лавозимида ишлаб келаётган Қудратилла Асатуллаевич Туляганов "Асакабанк" АЖ бошқаруви раиси этиб тайинланди. Бу ҳақда Bankers.uz манбалари хабар бермоқда.

Қ.Туляганов 1982 йил туғилган. 2008 йил Тошкент Молия институтини, 2016 йил Банк-Молия академиясини тугатган. Банк тизимидаги иш стажи 23 йилни ташкил қилади.

Эслатиб ўтамиз, 2019 йилдан "Асакабанк" АЖ бошқаруви раиси лавозимида ишлаб келган Нодирбек Сайдуллаев ўтган йил октябрь ойида Марказий банк раисининг биринчи ўринбосари лавозимига тайинланган эди.


@bankers_uz

🏦 Микрокредитбанк Бош Аудитор лавозимига танлов эълон қилмоқда

МKBank ("Микрокредитбанк" акциядорлик тижорат банки) Ички аудит департаменти директори — Бош аудитор лавозимига танлов эълон қилмоқда. Номзодларга соҳа бўйича етарли билим ва тажрибага эга бўлиш билан бир қаторда, олий иқтисодий маълумотга эга бўлиш, банк ёки молия тизимида камида 5 йиллик иш тажрибасига, шу жумладан, аудит тузилмаларида камида 3 йиллик раҳбарлик лавозимларида иш тажрибасига эга бўлиши каби талаблар қўйилган.

Шунингдек, номзоднинг ташқи аудитор сифатида иш тажрибасига эга бўлиши ёки турли халқаро сертификат (диплом)ларга эгалиги устунлик сифатида қабул қилиниши маълум қилинган. Номзодлардан ўз аризаларини 2023 йил 5 мартга қадар hr@mikrokreditbank.uz электрон почта манзилига "Аудит" белгиси билан маълумотнома юбориши сўралган.


@bankers_uz

🏦 Ориент Финанс банк акциядорлари таркибида ўзгаришлар рўй берди

"Ориент Финанс" хусусий акциядорлик тижорат банки акциядорлари таркибида ўзгаришлар рўй берган. Бу ҳақда банк томонидан Корпоратив ахборот ягона порталида маълум қилинган. Хусусан, банкнинг йирик акциядорларидан бири Сакен Полатовнинг банк акцияларидаги улуши 34,6 фоизга етган, шунингдек, жисмоний шахс Ситора Ахмеджанова банк акцияларининг 17,9 фоизига эгалик қила бошлаган.

Батафсил - https://bankers.uz/news/1044


@bankers_uz

🏦 Bankers.uz ва республикамиз банк тизими жамоаси номидан бугун туғилган кунини нишонлаётган "TBC Bank" АТБ бошқаруви раиси Спартак Тетрашвилини табриклаймиз! (1980 йил туғилган).

Шу муносабат билан, Спартак Тетрашвилига мустаҳкам соғлиқ, куч-қувват ҳамда меҳнат фаолиятида янги зафарлар тилаб қоламиз!

@bankers_uz

🏦 Tenge Bank’нинг активлари бир йил давомида 90 миллион долларга ўсди – Умут Шаяхметова

Қозоғистон “Halyk Bank”ининг Ўзбекистондаги шўъба банки – “Tenge Bank”нинг активлари 2022 йилда 1 триллион сўмдан кўпроққа, ёки 90 миллион долларга ўсди. Бу ҳақда Қозоғистон банки бошқаруви раиси Умут Шаяхметова 16 феврал куни Самарқандда бўлиб ўтган журналистлар билан учрашувда маълум қилди.

Умут Шаяхметова ўз нутқи давомида Ўзбекистон “Halyk Group” учун асосий бозор ҳисобланишини ва хорижий инвесторлар учун жозибадор эканлигини ҳам таъкидлади.

Шунингдек, учрашувда "Tenge Bank" АТБ бошқаруви раиси Талгат Аюпов ҳам иштирок этди ҳамда банкнинг ўтган 4 йил давомида эришган натижалари ҳамда кўрсаткичлари билан ўртоқлашди.

Батафсил - https://bankers.uz/news/1045


@bankers_uz

🏦 Bankers.uz ва республикамиз банк тизими жамоаси номидан бугун туғилган кунини нишонлаётган Марказий банк Раиси ўринбосари Аюбхон Камаловни табриклаймиз! (1971 йил туғилган)

Шу муносабат билан, Аюбхон Арибджановичга мустаҳкам соғлик, меҳнат фаолиятида муваффақият ва янги зафарлар тилаб қоламиз.


@bankers_uz