✍️ #آراز_فکری

💥 قدیم چاغلاردا دونیانین هر یانیندا #بؤرکون چوخ #ارزیشی واریدی. ایللاه کیشی لرده، بؤرک، قولاق یا بورون کیمی #بدن_عضولریندن بیری اولموشدو. ایندینین اؤزونده بئله بیزیم قوهوملاردان وار کی قدیم آدام اولدوغونا گؤره حامامدادا بؤركون باشیندان #چیخارتماز!!!

🔹اونا گؤره ده آتا-بابالاريميز اؤز سؤزلرینده بو گئییمدن چوخلو فايدالانيبلار. ائله بونا گؤره ده دئمک اولار بو پالتارین ارزیشی حتی کت شالوار سهل دیر کی اوندان #اؤنملی_پالتارلاردان دا چوخدور.

🔹بیزیم آتابابالاريميز بؤركو بير #آدام_كیمی دیری و اؤزل وجودا صاحیب گؤروبلر.
میثال اوچون؛ 《ایکی اولسان بیرلیکده دانیش، بیر اولسان بؤركونله دانیش》 جومله سینده بو آنلامی گؤروروک. تک قالان آداما اَن ياخين يولداش او زامانلار بؤرکو ایدی.
ایندی کی یاشاییش فیشاریندان هامی خیاواندا گئده - گئده اؤزوایله دانیشیر قدیم اولسايدی دئمزدیلر سفهدی. فوقو دئیردیلر بؤرکويله دانیشیر!!

🔹هله دئمک اولار بؤرکون مقامی فقط هم صحبت اولماق دئییل. بؤرک ائلییه بیلر آدامین ایشلرینه ده قضاوت ائلییه، ائله اونا گؤره دئییرلر کی 《بؤرکونو اؤزونه قاضى ائله》. یا میثال او چون دئییبلر 《منى قانديرما کی بؤركونو قاندير》. يانی ہو کی منیم بؤركومون عاغلى مندن ده چوخدور.
ايندی گؤرورسوز کی بؤرکون، سیز بیلدیينیزدن داها چوخ اؤنمی وار. بوجور دوستو کیم ایسته‌مز؟!!

🔹دئدیک کی قدیم زامانلار بؤرکسوز کيشی، کیشی اولا بیلمزدی. نئجه کی دئییبلر 《کیشی نین ناموسر اوچ‌ دور؛ پاپاق، آرواد، آت》
بو اوچ کلمه‌دن بللی‌دیر کی بؤرک بو ایکی اؤنملی موجود قدر ارزیشى وار. هله ايلک سيرادا گلمه سی اونو داها اؤنملی ائله‌ییر.

🔹 ایندی بیر کیشی ناموس‌سوزلوق ائله‌سه یانی ائله بیل بؤركونو آلتينا قویوب اونون اوستونده اوتوروب.

🔹دوزدور دئدیم کی قدیمدن بو یاخین ایللره کیمی بؤرکسور کیشی تاپیلمازدی آما بیرآز بؤرکسوز قالان آتا-بابالاريميز دا واریدی کی اونلاردا بؤرکلو آتا-بابالاریمیزا تای اؤزلرینه قازانان سؤزلر دئییب لر. آیری ایشلری يوخودو کی، فقط سؤز دئییرلر.

🔹میثال اوچون بؤرک آلا بیلمیش آتا۔ بابالاريميز دئییبلر: 《کیشی بؤرکسوز اولماز». اونون قاباغیندا بؤرک تاپانمایانلار دئییبلر: «باش اولسون، بؤرک تاپيلار》! هله بونلار چوخ بؤرکو اولانلارا دا دئییبلر: 《بير باشا، بیر بؤركدن آرتیق، باش آغریسی گتیرر》 بونوندا دئییلمه‌سی بوجور اولموش کی بعضن آتابابالاریمیز گؤرمه میش لر کیمی ایکی بؤرکو بیر بیرینین اوستونه قویموشلار، اونو گؤرنلر ده بو سؤزو دئیبلر.

🔹یادیمدان چیخمامیش دئییم کی قدیم چاغلاردان بؤرک تیکمک اَن اؤنملی ایشلردن و او ایشی گؤرن ایسه زيرنگ آدام اولاردی. بؤركون بوجور اؤنمی اولاندا اونون يارادانی گؤر نمنه اولارا ائله اونا گؤره ده دئييبلر : 《جينه بؤرک تیکير، تپه سينه ده دلیک قويور》 معلوم دئییل کاموا آز گليب یوخسا دلیک او زامان كولئرین ایشین گورردی، آما 《حاق سؤز دانیشانین بؤرکو دلیک اولار》

🔹قونشوموز گول بادام خانیما دا بیر سورپرایزیم وار. دئمه بس اسکی چاغلاردان اونون رحمتليک أرى آتا۔ بابالاریمیزین تانینمیش شخصیتی دی: 《عالمين مالی مولکو، قنبر عمى نين بوركو》!! اولمايا بونو گول بادام خانیم اؤزو چیخاردیب؟ آخی او هئی قنبر عمی نین بؤرکونون گؤزل لييی، جورابلارینین ایی و شالوارينین یاماغیندان دانیشار !!


🌎 آرازنیوز ایله اؤزگورلوگه دوغرو...
🔗 @ArazNews