عن الهجرة الثانية.. كتبت الدكتورة #نهلة_عيسى:
"دخلنا بالهجرة الثانية لعشرية الحرب، الهجرة الأولى إلي غادر فيها حوالي 3 _ 4 ملايين سوري ويمكن أكتر ما حسيتها رغم تداعياتها ومعانيها موجعة متل الهجرة التانية إلي عم نعيش فصولها هلق، لأنه كان إلها عشرات الأسباب، أهمها الخلاف الايدلوجي والسياسي مع الدولة وتجريمها، وثانيها الخوف على الذات، وثالثها حلم السفر المقيم لدى كل العرب، ورابعها ...الخ، بس الهجرة التانية، والله يعلم كم مليون راح يهاجر فيها، هجرة بتكسر الضهر، وبتموت الروح لأنها هجرة جوع من حموا الدولة ودافعوا عنها، ودفعوا الغالي والرخيص لحتى ما يسقط هالوطن، بس شافوا حالهم عم يسقطوا من حسبان أصحاب القرار، فاتخذوا القرار وبلشوا يرحلوا، مو لأنهم ما بيحبوا البلد، بس لأنه البلد يبدو ما عاد عم تحبهم، والله يسترنا من الآت.
https://www.facebook.com/1933662260043227/posts/4302902543119175/

الدكتورة #نهلة_عيسى تعقب على كلام لوزير الكهرباء:
"طلع جزء من كارثة اختفاء الكهرباء (مو انقطاعها), مشكلة نفسية, هيك قال وزير الكهربا, وأنا ما بقدر كذبه لأسباب كتيرة, منها أنه وزير, والوزير ببلادنا كائن خرافي متل الرخ والعنقاء بتحسه ما بتفهمه, وثانياً هو دكتور زميل، ومو حلوة مني كذبه, وثالثاً: لأنه عم يحكي من موقعه ومن وجهة نظره, يعني هوي مو شايف انه القصة مشكلة كبيرة, وما حس بتغيير جراء الانقطاع، فما بقدر اقنعه بالعكس, خاصة انه القصة صغيرة يا دوب الكهربا عم تنقطع عشرين ساعة باليوم, فمو مستاهلة ننشف ريقه عليها, بعد ما مرقنا ارتفاع الاسعار عشر تلاف بالمية، وطوابير الخبز والسكر، وتلات اسعار للبنزين شرعي مو سوداء، وسعرين للمازوت برضه شرعي، وووو الخ، وضلينا ساكتين, ونحنا شعب بيشيل والعلف كتير, ولا هزة بدن الوزير ثانية👌☝😕
https://www.facebook.com/1933662260043227/posts/4502051169870977/

رداً على توضيح الوزير #عمر_سالم بخصوص المستبعدين من الدعم.. نشرت الاستاذة في كلية الاعلام الدكتورة #نهلة_عيسى:
"قبل ما ينرفع الدعم المرفوع اصلآ: وفقآ للكتاب الصادر عن وزير الاقتصاد المحددة فيه الشرائح إلي مرشحة لرفع الدعم عنها، وإلي ساوى بين واحد عنده مليارات وواحد قسط بأيام الرخص سيارة دفع حقها على تلات اربع سنين، غير إنه على ما يبدو كل حدا بيقبض راتب مهدد بالاستبعاد من الدعم "الوهمي"، إلي هوي في الحقيقة جنة فاسدي الحكومة.

على كل حال ما لنا بمن سيستبعد، لأنه قصة الدعم ماسخة وكذبة كبيرة، قصتي أنه الكتاب صادر عن وزير الاقتصاد، ممكن اعرف شو حشره لوزير التجارة لحتى يطلع يعقب عليه، وتلحقه جوقة المطبلين يفسرولنا تعقيبه، وكأنه قال لوغارتيم، أو كأنه نحنا شعب جحش ما بيفهم الحكي، بأنه الوزير قصده كذا وقصده كذا، وقصده إلي عم يدفع حق وجبة وحدة 75 الف!؟.

طيب يا جهابذة: كل سورية عم تدفع حق الوجبة الوحدة 75 الف بس بالدين أو أنه عم تبيع أرزاقها لتاكل.

بقى معلش حبيباتي تقبضوا من الوزير بدون ما تتفهمونا على ربنا، لأنه بعد أذنكم قرفنا وكتير كتير.

المشهد
https://www.facebook.com/1933662260043227/posts/4515172941892133/

"الحكومة اختارت الكلب ولا عواء لنا"

كتبت الاستاذة في كلية الاعلام الدكتورة #نهلة_عيسى:
"وزير التجارة في تبريره لرفع أسعار البنزين، أدان نفسه والحكومة التي يمثلها، لأن قوله بأنه ليس هناك دولة في العالم تدعم أسعار المشتقات النفطية، مردود عليه بأنه ليس هناك أيضآ دولة في العالم أعلى سقف راتب فيها لا يتجاوز الخمسين دولار فكيف بالأدنى في غابة من التوحش السعري للسلع الأساسية وغير الأساسية.

واضافت: "أيضآ زعمه أن زيادة سعر ليتر البنزين لغير مستحقي الدعم (أي أن من وجهة نظره، كل من يملك سيارة مهما كان نوعها ودخله غير مستحق للدعم)!! ستصب في مصلحة مستحقي الدعم، أيضآ مردود عليه، لأن هذه الزيادة ستنعكس ارتفاعآ في أسعار كل الأشياء على المواطنين جميعآ، ولحق إذا بتلحق يا مواطن!؟

وختمت: "الحقيقة كلام الوزير ذكرني ببرنامج يعرض على شاشة ناشونال جيوغرافيك اسمه (إعادة تأهيل الكلاب) تدور أحداثه حول إعادة تأهيل الكلاب التي لديها مشاكل مع أصحابها، وتظهر مجريات البرنامج ذروة تأزم المشكلة عندما يصبح أصحاب الكلب وكأنهم في موقف صعب بين اختيار سلامتهم وسلامة أولادهم، أو الكلب!؟ ويبدو أنه حكومتنا اختارت الكلب😉 ولا عواء لنا..

#عمرو_سالم
#التجارة_الداخلية
#المشهد
almashhadonline.com
https://www.facebook.com/1933662260043227/posts/4564338116975615/

انتقدت الدكتورة #نهلة_عيسى طريقة الحوار الذي أجراه التلفزيون الرسمي مع رئيس مجلس الوزراء حسين عرنوس مساء أمس..

ونشرت الاستاذة في كلية الاعلام تدوينه عبر حسابها الشخصي في فيسبوك تسخر فيها من مجريات اللقاء: "طول ما أنا عم اتفرج على الحوار مع رئيس الوزراء ما خطر على بالي غير اغنية يمكن للجسمي ( لقيت الطبطبة)!؟ والسبب بسيط كتير، لأنه مجريات الحوار، الله يجعله حوار خلتني بحالة ترقب ايمتى بدو يقوم واحد من المحاورين ينفض شعرة هارة عن كم رئيس الوزراء!!..

واعتبرت "عيسى" ان اسئلة الحوار مكررة ورئيس الحكومة يحفظها: "ومبروك لرئيس الوزراء انه الاسئلة طلعت دورات سابقة، وطوبى لهذا الوطن الحزين، والحقيقة كان لازم المذيعة بنهاية الحوار بدل ما تشكر رئيس الوزراء، تشكر الشعب السوري على سعة صدره!؟.

#المشهد
almashhadonline.com
https://www.facebook.com/1933662260043227/posts/4651303541612405/

كتبت الدكتورة #نهلة_عيسى:
"كنت أتمنى ألا يضطر #عباس_النوري إلى لقاء آخر يشرح فيه ما لا يحتاج إلى، ولكننا أخفناه، فالرجل صاحب رأي، وهذا أبسط حقوقه، وفيما قاله كثير مما يجب أن نناقشه جميعآ، هو فقط حاول أن يثقب ثغرة في جدار صلد من المسلمات المبنية على أوهام، وتابوهات آن أوان نزع قدسيتها، ولكن هذا البلد يفارق عقله، فلا عجب مما حدث، فالدم تحت أظافر النهار الطويلة.
لا يغرنكم الصراخ بزعم الوطنية, وتجريد الخصوم من ملابس الرزانة بدعوى الوضوح، فالوقاحة أيضاً وضوح, والفجور وضوح, والعهر وضوح, والخيانة وضوح, ومن باعوا هذا البلد الحزين, وسرقوا حبات قلوب الأمهات, تذرعوا بالوضوح.
يا أصدقاء: هذا الوطن كان يغني, ومن يدعون الوضوح, قتلونا بزعم أننا كنا نصغي للغناء, ثم ذهب بعضهم إلى تجريم كل من يفكر خارج الصندوق في هذا البلد الحزين لكي – علينا- يغني, هل تظنون أني بومة تبشر بالخراب؟ وتلقي على الزهور الغبار؟ واهمون أنتم.. أنا بنت الوجع, ورفيقة زرقاء اليمامة, أنذر, أحذر, ألملم أحاجي النهار, ولكنني مثل زرقاء اليمامة, أرى ما لا يرى, ولذلك أتتبع خطى الجند، ومن يفكرون وينطقون دون خوف من الآخرين, ففي خطاهم يولد النهار الذي أنتمي إليه أنا.

#المشهد
https://www.facebook.com/1933662260043227/posts/4754843414591750/

عقب استبعاد شرائح من الدعم كتبت الدكتورة #نهلة_عيسى:
"ما بملك بالدنيا شي مادي ابدآ، غير سيارتي إلي اشترتيها بالتقسيط من حوالي 12 سنة، وراتبي الشهري إلي ما بيتجاوز (200 ألف)، وخبزي وغازي ومازوتي بالسعر الحر، واليوم حكومتنا الكريمة استبعدتني من الدعم لأنه سيارتي موديل 2009 و1600 سي سي، في أكتر من هيك تعسف ما بظن، لأنه راتبي الهزيل صار ما بيكفي غير حق بنزيني!؟ وما ضل غير افتح تمي للهوا،وطبعا حالي حال كتير من الناس، وبيجوز رواتبهم أقل من راتبي.
يا عمي بتستبعدوا واحد عنده مرسيدس، عنده بي إم، عنده اودي وبتقولوا عنه مقتدر بفهم، أما واحد سيارته من الموديلات الشعبية الرخيصة بزمان شرائها كيا أو بروتون أو هونداي فهادا أمر لا يصدق، إلا إذا كان حدا إله مصلحة وسبوبة بتنشيط سوق السيارات القديمة كتير، وإلا إذا حدا إله مصلحة يخلينا نطلع من عقلنا.
يا حكومتنا ما هكذا تورد الأبل، وملء خزينة الدولة ما بيصير على حساب كرامات الناس، وبس.

#المشهد
almashhadonline.com
https://www.facebook.com/1933662260043227/posts/4756956957713729/