የአፍሪካ አመራር ልህቀት አካዳሚ በሱሉልታ ከተማ ለሚገኙ ትምህርት ቤቶችና የወጣቶች ማዕከል የቁሳቁስ ድጋፍ አደረገ፡፡
የድጋፍ ርክክቡ የተደረገው የሱሉልታ ከተማ አስተዳደር ምክትል ከንቲባ አቶ አቡ ብርኪ እና ሌሎች የከተማ አስተዳደሩ ከፍተኛ የስራ ኃላፊዎች በተገኙበት ሲሆን ምክትል ከንቲባው አካዳሚው የትምህርት ተቋማትንና የወጣቶች የስፖርት ማዘውተሪያን ለመደገፍ የወሰነውን ውሳኔ አድንቀው የተደረገው ድጋፍ ለትምህርት ጥራትና ለመማር ማስተማሩ ተግባር ከፍተኛ ሚና እንዳለው ተናግረዋል፡፡
ምክትል ከንቲባው አያይዘው ተቋሙ በሱሉልታ ከተማ እንደመገኘቱ ለከተማዋ ዕድገትና ልማት ጉልህ ድርሻ እንደሚኖረው አስታውሰው በቀጣይም ከተቋሙ ጋር ለመስራትና አካዳሚውን ለማገዝ ዝግጁ መሆናቸውን ተናግረዋል፡፡
የአካዳሚው የሰልጣኞችና ተማሪዎች አገልግሎት ዳይሬክተር አቶ ሔኖክ አስፋው በበኩላቸው ተቋሙ ለከተማ አስተዳደሩ ያደረገው ድጋፍ የመጀመሪያው እንዳልሆነና ከዚህ ቀደም ለከተማው ስድስት አመራሮች የሁለተኛ ዲግሪ እና አንድ የሦስተኛ ዲግሪ የትምህርት ዕድል መስጠቱን አስታውሰው አካዳሚው ከአመራሩ ልማት ባሻገር በማህበረሰባዊ አገልግሎት ላይ እየተሳተፈ እንደሆነና ይህም ተጠናክሮ እንደሚቀጥል ተናግረዋል፡፡
ለሁለት ሁለተኛ ደረጃ ትምህርት ቤቶችና ለአንድ የወጣቶች ማዕከል ከተደረገው ድጋፍ ውስጥ ኮምፒውተር፣ ፕሪንተር፣ ወንበር፣ ጠረጴዛ፣ ፕሮጀክተር፣ ፎቶ ኮፒየር፣ ቴሌቪዥን ተጠቃሾች ሲሆኑ የንብረቶቹ አጠቃላይ ግምትም 800,000.00 (ስምንት መቶ ሺህ) ብር እንደሆነ ታውቋል፡፡

የአፍሪካ አመራር ልህቀት አካዳሚ 3 ሚሊዬን ብር የሚገመት የተለያዩ ቁሳቁሶችን ለኮምቦልቻ ጠቅላላ ሆስፒታል ድጋፍ አደረገ፡፡
የሆስፒታሉ ስራ አስኪያጅ አቶ ከበደ ይመር ከኮምቦልቻ ከተማ አስተዳደር ህዝብና ሚዲያ ግንኙነት ቡድን ጋር በነበራቸው ቆይታ እንደገለፁት የአፍሪካ አመራር ልህቀት አካዳሚ ለሆስፒታሉ ከ3 ሚሊዬን ብር በላይ የሚገመት የተለያዩ ቁሳቁሶችን ድጋፍ አድርጓል ብለዋል፡፡ሆስፒታሉ በትግራይ ወራሪ ኃይል ዘረፋና ውድመት ደርሶበት ስለነበር የአፍሪካ የአመራር ልህቀት አካዳሚ የሆስፒታሉን የግብአት ጉድለት የሚያጠና ቡድን በመላክ ባጠናው ጥናት መሰረት እጅግ አስፈላጊ ግብአቶችን ለግሷል ብለዋል፡፡ የእንግዳ ማረፊያ ወንበር ፣ የባለሙያዎች ወንበር ፣ ጠረንፔዛዎች ፣ አልጋዎች ፣ ፍራሾች ፣ ኮምፒውተር ፣ እስካነር ፣ ፋክስ ወ.ዘ.ተ እቃዎችን ድጋፍ መደረጋቸውን ስራ አስኪያጅ አብራርተዋል፡፡
የአፍሪካ አመራር ልህቀት አካዳሚ ርዕሰ አካዳሚ ምህረት ደበበ /ዶ/ር/ የህውሀት አሸባሪው ቡድን ባደረሰው ጉዳት እጅግ ማዘናቸውንና ሆስፒታሉ የገጠመውን ችግር በመጋራት የአካዳሚው ማኔጅመት ኮሚቴ ሆስፒታሉን ለመደገፍ በመወሰኑ የመጀመሪያ ዙር ድጋፉን እና መልዕክት ልከዋል፡፡ ከቁሳቁስ ድጋፍ በተጨማሪ አካዳሚው ከሆስፒታሉ ጎን በመቆም በቀጣይ የአቅም ግንባታ እና ሙያዊ እገዛ እንደሚደረግ ጨምረው ገልፀዋል፡፡
የሆስፒታሉ ስራ አስኪያጅ አቶ ከበደ ይመር ሆስፒታሉ የአፋር ክልል ፣ ሰሜን ሸዋ ፣ ኦረሞ ብሔረሰብ ልዩ ዞን ፣ ደቡብ ወሎ ዞን ቃሉና አርጎባን ጨምሮ በርካታ አካባቢዎችን በሪፈራል ሆስፒታልነት እያገለገለ በመሆኑ ፍሰቱ በርካታ ነው ብለዋል፡፡
ሆስፒታሉ በወራሪ ቡድኑ በደረሰበት ጉዳት የግብአት እጥረቱ እንዲቀርፍ ሁሉም ርብርብ እንዲያደርግ ጠይቀዋል፡፡

በአፍሪካ አመራር ልህቀት አካዳሚ በተከበረው የረመዳን ፆም ወቅት የከፍተኛ አመራር ስልጠና ሲከታተሉ የነበሩ ሙስሊም ሰልጣኞች በአካዳሚው የረመዳን ፆም ባማረና በደመቀ ሁኔታ እንዲከናወን የአካዳሚው ርዕሰ አካዳሚና መላው የተቋሙ አመራርና ሰራተኞች ላበረከቱት አስተዋጽኦ የምስጋናና የምስክር ወረቀት አበርክተዋል፡፡

በአመራር ብቃት ማዕቀፍ ላይ ትኩረቱን ያደረገ ዎርክሾፕ ተካሄደ
የአፍሪካ አመራር ልህቀት አካዳሚ በቀጣይ ለሚሰጣቸው የአመራር ማብቃት ስራዎች ግብዓት ከሚሆኑ ስራዎች መካከል አንዱ በሆነው የአመራር ብቃት ማዕቀፍ ላይ ከአካዳሚው፣ ከአዲስ አበባ ዩኒቨርስቲ እና ከኢትዮጵያ ሲቪል ሰርቪስ ዩኒቨርስቲ የተወጣጡ ምሁራን በተሳተፉበት በስካይ ላይት ሆቴል ነው ዎርክ ሾፑ የተካሄደው፡፡
በዎርክሾፑ መክፈቻ ላይ ንግግር ያደረጉት የአካዳሚው ርዕሰ አካዳሚ ዶ/ር ምህረት ደበበ አካዳሚው የተለያዩ የሪፎርም ስራዎችን በማከናወን አሁን ያለበት ደረጃ ላይ መድረሱን በማስታወስ አካዳሚው በቀጣይ ለሚሰጣቸው የአመራር ማብቃት ስራዎች የሚካሄደው ዎርክሾፕ ግብዓት የሚሆን መሆኑን ገልጸዋል፡፡
የአመራር ብቃት ማዕቀፍ በዶ/ር እሸቴ አበበ፣ የአመራር ብቃት ማዕቀፍ ካርኩሌም ዲዛይን በዶ/ር አሰፋ በየነ እንዲሁም የአመራር ብቃት ማዕቀፍ ጋይድላይን በዶ/ር ሞገስ ሎጋው ለውይይት መነሻ የሚሆኑ ጽሁፎች የቀረቡ ሲሆን በቀረቡ ጽሁፎች ላይ ሰፊ ውይይት ተደርጎባቸዋል፡፡
በመጨረሻም የአካዳሚው የፕሮግራም ዘርፍ ም/ርዕሰ አካዳሚ ወ/ሮ ሕይወት አለማየሁ በውይይት የተነሱት ሃሳቦች ጥሩ ግብዓቶች መሆናቸውን በማንሳት በቀጣይ ሰነዱ ዳብሮ ተግባራዊ እንዲሆን የዎርክሾፑ ተሳታፊዎች የበኩላቸውን ድርሻ እንዲወጡም አሳስበዋል፡፡