"የተቋማት ግንባታ ጊዜ የሚወስድ ተግባር በመሆኑ ስራውን ዛሬ መጀመር አለብን!" ዛዲግ አብርሃ፣ የአፍሌክስ ፕሬዝደንት

የአፍሌክስ መለወጥ የግድ ነው ተባለ

ሱሉልታ መጋቢት 14/2017 (አፍሌክስ) -ለአካዳሚው አመራር እና ሰራተኞች ስልጠና በመስጠት ላይ የሚገኙት የአካዳሚው ፕሬዚደንት አቶ ዛዲግ አብርሃ ለውጥ ለአፍሌክስ ምርጫ ሳይሆን ብልጫ ነው ብለዋል።

የሃገራዊ ሪፎርሙ አካል መሆን፣ የአሰራር ስርዐቱን ማሻሻል፣ ድርጅታዊ ቁመናውን ማሳደግ፣ በአለም አቀፍ ደረጃ ተወዳዳሪ ተቋም ማድረግ እና መሰረታዊ ከሆነው የአመራር ልማት ለውጥ ጋር መጓዝ የአካዳሚው የለውጥ ጉዞ ዋነኛ ኢላማዎች መሆናቸውን አንስተዋል።

በተቋማት የለውጥ ሒደት ውስጥ ተግዳሮቶችን ተቋቁመውና አሸንፈው የአሻጋሪነት ሚና የሚወስዱ ተቋማት እንዳሉ ሁሉ፤ በገጠማቸው የህልውና አደጋ ተሸንፈው ህልውናቸውን ያጡ ተቋማት በታሪክ እንደተመዘገቡ ጠቁመው "የአፍሌክስ ስኬት የአመራርና የሰራተኛው ስኬት በመሆኑ፤ የተጀመረውን የለውጥ ጉዞ እንደ ዐይኑ ብሌን ሊጠብቀውና ሊያስቀጥለው ይገባል።" ሲሉ ተናግረዋል።

አያይዘውም "የመጪውን ትውልድ መሪዎች የሚቀርጽ ተቋም ገንብተን ለትውልድ አሻራችንን እናኑር" የሚል መልዕክትም አስተላልፈዋል።

የተቋም ግንባታንና ስልጣኔን ነጣጥሎ ማየት አይቻልም የሚሉት አቶ ዛዲግ፤ እውነታውን ከአፍሌክስ ነባራዊ ሁኔታ ጋር አዛምደው አስቀምጠዋል። "የተቋም ግንባታ ጊዜ የሚወስድ ተግባር በመሆኑ፣ ስራውን ዛሬ መጀመር አለብን!" ብለዋል።