የአፍሪካ አመራር ልህቀት አካዳሚ ከገንዘብ ሚኒስቴር ጋር በመተባበር ለሚኒስቴር መስሪያ ቤቱ ባለሙያዎች የአቅም ግንባታ ስልጠና እየሰጠ ነው።
ሀያ ሶስት ባለሙያዎች የሚሳተፉበት ስልጠና ለስምንት ቀናት የሚቆይ ሲሆን በተለያዩ የስልጠና ርዕሶች ላይ ሰፊ ስልጠና እየወሰዱ እንደሆኑ በገንዘብ ሚኒስቴር የኢኮኖሚ ማሻሻያና ፕራይቬታይዜሽን ጽ/ቤት ከፍተኛ ባለሙያ የሆኑት እና የስልጠናው አስተባባሪ አቶ ልሳነወርቅ ይርሳው ገልጸዋል።
አስተባባሪው እንደሚገልጹት በተቋማቸው ያለውን የሰው ሀይል አቅም በማስተባበርና በቡድን በመስራት ውጤታማ አፈጻጸም ማምጣት የሚቻልበትን መንገድ የሚያመላክት ስልጠና እያገኙ እንደሆነ ጠቅሰው፤ ለዚህም በአካዳሚው ውስጥ ያሉ አሰልጣኞችም ሙሉ አቅማቸውን በመጠቀም እውቀት እና ክህሎት እያስጨበጧቸው እንደሚገኙ ተናግረዋል።
ከስልጠናው ርዕሶች መካከልም Future thinking,Discovery and Readiness of future Proof Thinking, Tools and Methods in future Thinking, Developing Future Thinking Competencies and Mindset, Strategies for embedding Future Thinkingin to daily Ministry of Finance Organizational Processes and Strategic Roles, Problem Analysis and Solution design ተጠቃሾች ናቸው።
ስልጠናው በተግባር የተደገፈ በመሆኑ በስራ ውስጥ የሚያጋጥሙ ችግሮችን ለመፍታት እንደሚያግዝ የገለጹት አቶ ልሳነወርቅ፤ የአካዳሚው የአገልግሎት አሰጣጥም ሰልጣኞች ሀሳባቸው ሳይከፋፈል ሙሉ ለሙሉ ስልጠናው ላይ ብቻ በማተኮር እንዲከታተሉ የሚያደርግ መሆኑን ተናግረዋል።
ስልጠናው በተለያዩ ዙሮች እንደሚቀጥልም ተገልጿል።

የአፍሪካ አመራር ልህቀት አካዳሚ የአረንጓዴ አሻራ የችግኝ ተከላ መርሐ ግብር ቅድመ ዝግጅት ስራዎች በምስል ይህን ይመስላሉ።

የአፍሪካ አመራር ልህቀት አካዳሚ እና የኢንዱስትሪሚኒስቴር በጋራ ለመስራት ተስማሙ::

የአፍሪካ አመራር ልህቀት አካዳሚ እና የኢንዱስትሪ ሚኒስቴር በጋራ ለመስራት የሚያስችላቸውን ስምምነት ዛሬ ሀምሌ 12 ቀን 2016 ዓ.ም ተፈራረሙ።

ስምምነቱን የአፍሪካ አመራር ልህቀት አካዳሚ ፕሬዝዳንት ዛዲግ አብርሃ እና የኢንዱስትሪ ሚኒስትሩ መላኩ አለበል ተፈራርመዋል።

የአፍሪካ አመራር ልህቀት አካዳሚ ፕሬዝዳንት ዛዲግ አብርሃ በፊርማው ስምምነት ወቅት እንደገለፁት ከረጅም ጊዜያት ውይይት በሁዋላ ለፊርማ የበቃው ይህ ስምምነት የኢንዱስትሪውን ዘርፍ በብቃት የሚመሩ እና የኢትዮጵያን ብልፅግና የሚያረጋግጡ አመራሮችን በአመራር ልማት ፕሮግራም ለማብቃት ስምምነቱ ወሳኝ ሚና ይኖረዋል ብለዋል::

የዛሬው ስምምነት የአፍሪካ አመራር ልህቀት አካዳሚና የኢንዱስትሪ ሚኒስቴር በኢንዱስትሪ አመራር ልማት ፕሮግራም: በኢንዱስትሪ አመራር ሽልማት እና በኢንዱስትሪ የትራንስፎርሜሽን የሀሳብ ማመንጫ የመሰረተ ልማት ግንባታ ላይ እና ጥናት እና ምርምር በጋራ ለመስራት እንደሚያስችላቸው አቶ ዛዲግ አብርሃ ተናግረዋል።

ሚኒስትሩ አቶ መላኩ አለበል በበኩላቸው አሁን ያለንበት የአለም የፖለቲካ እና የኢኮኖሚ ሁኔታ ተለዋዋጭ በመሆኑ ይህንን ነባራዊ ሁኔታ የሚረዳና አርቆ የሚያስብ እንዲሁም በዘመናዊ ቴክኖሎጂ የሚደገፍ የኢንዱስትሪ ዘርፍ አመራር ለማፍራት እና ለማብቃት ስምምነቱ አስፈላጊ እንደሆነ ገልፀዋል።

የአፍሪካ አመራር ልህቀት አካዳሚ ፕሬዚደንት አቶ ዛዲግ አብርሃ ከማዕድን ሚኒስትሩ ኢ/ር ሀብታሙ ተገኝ ጋር ተወያዩ::

ፕሬዚደንቱ ለማዕድን ሚኒስትሩ እና ለሚኒስትር ዴኤታዎች አካዳሚው በሶስት ዓመት ውስጥ ስለሚተገብራቸው የአመራር ልማት ፕሮጀክቶች እና የሪፎርም ፕሮግራሞች ገልፃ አድርገዋል::

አቶ ዛዲግ በውይይቱ ላይ እንደጠቀሱት፤ በአካዳሚው የለውጥ፤ የማስፋት እና የሽግግር ስራዎች ውስጥ ሁሉን አቀፍ እና አካታች የአመራር ልማት ፕሮግራም መነደፉን አስታውሰው፤ በጠቅላላ (General) አራት እና በልዩ (Specialized )ሰላሳ ስምንት የአመራር ልማት ፕሮግራሞች ተቀርጸው ወደ ስራ እንደተገባና ለሁሉም ፕሮግራሞች ማስፈፀሚያ የሚሆን ከ2,500 በላይ ገፆች ያሉት ዝርዝር ስትራቴጂ እንደተዘጋጀም አብራርተዋል::

በኢትዮጵያ እና በአፍሪካ ውስጥ ተራርቀውና ተነጣጥለው ያሉ ተቋማትን እና መሪዎችን እንደ ድልድይ ሆኖ ለማገናኘት ሰፋፊ ተግባራት እየተከናወኑ እንደሆኑም አቶ ዛዲግ ተናግረዋል።

ፕሬዚደንቱ አያይዘውም የአፍሪካ አመራር ልህቀት አካዳሚ ከበርካታ ዓለምአቀፍና የሀገር ውስጥ ተቋማት ጋር በትብብር እየሰራ እንደሆነ ጠቅሰው፤ ከማዕድን ሚኒስቴር ጋርም በአመራር ልማት ፕሮግራም፤ በአመራር የልህቀት ሽልማት፤ በሀሳብ ማመንጫ ማዕከል ግንባታ እና በጥናትና ምርምር ዘርፎች አብረው መስራት እንደሚፈልጉ ተናግረዋል::

የማዕድን ሚኒስትሩ ኢ/ር ሀብታሙ ተገኝ በበኩላቸው፤ አፍሌክስ በሶስት ዓመታት ውስጥ ሊሰራ ያቀደው እና ፕሬዚደንቱ ዕቅዱን ያቀረቡበት መንገድ ከአፍሌክስ ጋር ለመስራት የሚያነሳሳ መሆኑን ጠቅሰው፤ አካዳሚው በአመራር ልማት ዘርፍ የሰነቀው ራዕይ ከተቋም ግንባታ ባሻገር ለሀገርና ለአፍሪካ ብልፅግና የሚኖረው ሚና ከፍተኛ ነው ብለዋል::