بۆ یادی #فوئاد "دڵ"

لە پێدەشتی کامێران و بێڵەوار، لە پەنای شاخی شاهۆ، لە نێو دڵی ژاوەرۆ و لە بنەماڵەیکی زەحمەتکێشی ئاوایی ماویان کوڕێک هاتە ژیانەوە و بە یادی فوئادەوە ناوی لێ نرا فوئاد "دڵ"

لە گەڵ ڕەنج و ئازاری خەڵکی ئەو ناوچەیەدا، مەینەتی و دەستەنگی بنەماڵەیدا، لە گەڵ هەڵاڵە و شلێر، لە گەڵ قاسپەی کەوی بناری شاهۆدا، لە گەڵ چپە چپی جحیڵانی سیاسیدا، له گەڵ ئاوازی لەیلاکان و فڕینی وەرزی کرێکاراندا باڵای کرد و باڵای کرد ..

فوئاد عاشقی شاخ و کێو بوو، عاشقی ڕەنگی سوور و ئەستێرەی سوور و شێعری سوور و رێگای دوور و مەشخەڵی نووری بەرەو ڕێ دوور بوو ..

فوئاد گوێ لە دەنگی خۆڕەی رووباری سیروان و گاوەرۆ و خشە خشی رادیۆ ئەم دیوی سنوور دەگرت، لەوێیەوە خەیاڵی دەفڕی و سنوورەکانی دەبڕی و تێکەڵ بە پەخشانێکی شێرکۆ بێکەس دەبوو و دەچووە بە گژ کۆشکی دەستکردی کرێکاردا ..

فوئاد خۆشەویست بوو، دەیویست وەک وا بژی وەک ئەوانەی هەرگیز نامرن، ئەو دەیویست و پەلەی بوو بڕواتە کاروانی خۆشەویسترین خۆشەویستەکانی کوردستانەوە، ئەو پەلەی بوو نەکا لەم کاروانی خەباتە جێ مابێ، ئەو ژنی لە سویلا و دایە هاجەر و ویان و ژیوان و ژنانی کوردستاندا دەبینی ..
ژیانی لە کورپەزخانەکانی ناوچەی موکریان و کۆڵبەرانی سەر سنوورەکانی کوردستان و کرێکارانی کۆچەر و وەیلانی نێو باڵەخانە بەرزەکانی تاران و دەستی قڵێشاوی جوتیارانی ماویان دەبینی..

ئازادی لە سەر لووتکەی چیاکانی شاهۆ و کۆساڵان و ئاتەشگە و چل چەمە و سۆڵتان و دووبرا، لە ئاوایی ئافڕیان و لە زمانی ئاگرینی شۆڕش کاک سدێقی کەمانگەر و لە خوێندنەوەی شێعرەکانی فەرزاد دەبینی و دەبوو بە هاوڕێ هەمان رەفێقی لە سێدارەدراومان...

یاد و ناوت هەمیشە زیندووە

#ژینا_امینی
#فواد_محمدی
#انقلاب_ژینا
لینک عضویت کانال
با ما همراه باشید در آخرین خبرهای مبارزات مردم ایران.
https://t.me/Rednews5
#خبرسرخ

✌️🚩🚩🚩🚩🚩🚩✌️