شرح الأستاذ مهند واضح وممتع بعفويته. فقط الاحظ انه يعمد لأسلوب التلقين بشرح الرياضيات في حين ان فهمها انفع

اقترح نشر مقتطفات من الملزمة او اعداد صورة تعبر عن اهم ما ورد في الدرس من أسئلة, قوانين, ملحوظات مهمة:
بعض المحاضرات تحتاج وقت طويل وتكون لغاية التدرب على الحل واتقانه.
احياناً يكون وقت الطالب ضيق بسبب ضغوط مواد أخرى.
المراجعة من خلال المحاضرات غير عملية.

لو يتم اجراء اختبارات داخل المجموعة بأسئلة سريعة (فراغات, أفكار رياضية, الخ..)

الأسئلة والاجوبة النموذجية خصوصاً تحتاج الى عناية بالتنضيد

بناء قوائم الدرجات ضعيف, من الممكن يكون جدول ذكي قابل لفرز الاعمدة حسب (الابجدية, الأرقام)

لو يتم اعداد بوستر كل أسبوعين يتوج فيه ثلاث طلاب تفوقوا بالاختبارات

علي حيدر حسن (#طلاب الأستاذ مهند السوداني 2024)

دوره كلش حلوة وتسهل المواد وحرفيا خسران الي ما يدخل دوره الكتروني لأن بالالكتروني يختصر الوقت مال معهد وتسيطر عل ماده وبدون تراكمات وشرح مفصل +المساعدات ابد ممخلين قصره ويانه واش ما نسأل يجاوبونا اشكركم على هذا تعبكم وجهدكم ويانه وإن شاء الله نجازيكم بدرجات عاليه ونرفع راسكم
الاسم مريم عبد الكريم احمد(#طلاب الاستاذ مهند السوداني 2024)

السلام عليكم
بالنسبة للدورة الالكترونية لأستاذ مهند السوداني دورة وافيه وشاملة ومعلومات جداً مميزه حتى طريقة الشرح تخلي المادة مفهومة وماتنسي وبأي وقت يمتحنه بأي موضوع نجاوب استاذ مهند ملك الكيمياء ربي يحفظه ويوفقه وانشوفة بأعلى المراتب .

أسد علي سعد(# طلاب أستاذ مهند السوداني دورة 2024)

من أفضل الدورات من حيث الالتزام والامتحانات والمساعدات كلش لطيفين وافضل شي انو يدزون الحل النموذجي علمود نشوف اخطائنه وأعاده الامتحانات حته نكدر نسيطر على الماده وشرح الاستاذ مهند افضل وأروع شرح ♥️♥️
ان شاء الله نرفع راسكم بالوزاري وميروح تعبكم ويانه
هدى محمد رشيد (#طلاب الأستاذ مهند السوداني 2024)

السلام عليكم طبعا الدورة ممتازة وكلش الجدول مرتب وديمشي بشكل كلش زين الحمدلله ومن نواجه مشكله بشي انتو موجودين وتردون بسرعه علينا وحتى استاذ مهند معروف بسرعه رده ع الاسئلة بس صراحه المنصه صارلها كم يوم واكفه عندي دزيت محد رد عليه انو شكدر اسوي لان حتى امتحانات ممتحنت
وشكرا ع تعبتكم ويانه
نور بشار

السلام عليكم
الصراحة قبل لا اسجل بالدورة كثير طلاب نصحوني انو ما اسجل يم استاذ كونه(مثل ما گالو) طريقة شرحه للطلاب الجاهزين(المتميزين)
بس الصراحة اني جانت عندي ثقة كبيرة بالاستاذ وبشرحه لأني اقرا عليه باليوتيوب من الثالث متوسط
والحمد لله كما هو متوقع طلعت ثقتي بمحلها
استاذ رصيده العلمي عظيم
استاذ متمكن
ينزل بشرحه للمادة الى ادنى مستوى
يقدم طرائق مبتكرة (ومضحكة بنفس الوقت مرات)تسهل حفظ المادة
ان شاء الله نرفع راس استاذ مهند بنهاية السنة
ونكون مصدر فخر اله
الطالب:محمد عزيز شاكر(#طلاب الاستاذ مهند السوداني 2024)

نجاح صبر نواف حمادي
دورة الاستاذ مهند السوداني 2024
الشرح فووول زين وكلش تمام والله وياريت يخلص النا المنهج قبل شهر 4😭😭

السلام عليكم ورحمه الله وبركاته.. بدايه كلام احب ان اشكر الاستاذ
على جهده وتعبه ويانا.... كانت الدوره عبارة عن رحلة ممتعة و شاقه استمتعت بها كثيرا…يغلفها روح الألفة والمحبة بين المشاركين …وتبادل النقاشات الهادفة والخبرات النافعة…شكرا جزيلا استاذ مهند السوداني ايها المدرس المبدع.... اعطاك الله القوة

تبارك ياسر سعدي (طلاب استاذ مهند السوداني 2024)

يحيى معمر احمد (#طلاب استاذ مهند دفعه ٢٠٢٤).
للصراحه الدوره جوز ولوز وموز
السبب ان الاستاذ ماشي عدل بالماده اكثر من بقيه المدرسين وبخطه واضحه .
ثانيا :اسلوب استاذ مهند الاكثر من رائع يوصل الفكره لاضعف طالب .
ثالثا:تصوير ابواب ونظام الامتحان لكن النقطتين الفوك. اكثر تميزا بكثير

صراحه الدوره الالكترونيه كولش تفيد وانصح كل طالب يدخلها ع منصه ابوب كولش داافهم ع الشرح والجدول جدا جيد ومنظم ومناسب ويه اوقات دوامنه وماكو ضغط والمحاضرات تمشي بشكل سهل وحلو والشرح جداً حلو حرفياً عاشت اديكم ✨♥️♥️

مرحبا استاذ
استاذ الدوره والتدريس وكلشي غني عن التعريف افضل اختيار كان ان أشارك بدورتك استاذ الماده وياك سلسه وسهله وان شاءالله بالوزراي انكون عند حسن ظنك ونجيب المعدل العالي ومننسى تعب المساعدين ويانه الله يطيكم الصحه والعافيه ويكون بميزان حسناتكم..انتهى.

#طلاب هكر الكيمياء مهند السوداني 2024..

"هاجر محمود"

حسين علي وهاب (#طلاب الأستاذ مهند السوداني 2024)
الدورة كلش كلش مرتبه
من ناحية التزام امتحانات جداول والمساعدين كلش كلش زينين ويانا
بس اني اتمنى الصراحه اكو زياده بالامثله داخل المحاظرات
لكن الدوره افضل من المعاهد وكلشي لان تقره براحتك والمدرسين على مستوى العراق

طبعا اول شي احب اشكر الاستاذ على هذا الشرح وعاشت ايدة يعني حرفيا المدرس الوحيد مال الكيمياء الي افتهمت عليه ويستهال لقب (ملك الكيمياء) وبكل جدارة وانشاء الله نرفع راسه وما نخيب امله وثاني شي احب اشكر كل المساعدات الطيفات وعلى تعاملهن الزين الويانة وعلى اخلاقهن العالية وعلى المتابعة المستمرة وثالث شي (نحن طلاب مهند السوداني نحو الدرجة الكاملة)
مصطفى حسين محمد (#طلاب الأستاذ مهند السوداني 2024)

بدايةً احب اشكر جهود استاذ مهند ويانا و جميع المساعدين ، كانوا جدا متعاونين و متفهمين من بداية الدورة و إلى اليوم.
بصراحه انا كنت معتمده ادرس على محاضرات استاذ مهند القديمه باليوتيوب و شكد ما عجبتني و ردت افهم اكثر قررت اشوف اذا عنده دورة إلكترونيه و كلش فرحت لما عرفت لان جنت متأكده ح تكون ممتازه أكثر... بس ما اقلل من شأن المحاضرات الموجوده بالعكس افادتني و افادت طلاب كثيرين.
و حاليا بعد بداية العام الدراسي انصدمت بجودة التدريس بالمدرسه، اساتذه يشرحون غلط، يشرحون بشكل جدا بطيئ او جدا سريع و خصيصا كوننا طلاب خارجي و الاساتذه المتوفرين عددهم محدود او عندهم قلة خبرة..
بعد هذا الشهر البسيط بينت قيمة هذه المحاضرات بشكل اوضح و بين المجهود الي بيها..
اخيرا اريد اشكر استاذ مهند و المساعدين من جديد على كل تعبهم و ان شاء الله ما يضيع منه اي جزء و كله بميزان حسناتنهم🌹💖
روز زيدون نزار (#طلاب_الاستاذ_مهند_السوداني_2024)

السلام عليكم ورحمه الله وبركاته

معك احد طالبات الدوره الالكترونيه للاستاذ مهند السوداني 🦋🫡
بديت مشواري ويا حلمي (صيدله 💕)
بوقت مبكر بديت من عطله الرابع وحبيت اخليها بدايتها مسك ان شاء الله مع الكيماء

كنت خايفه من هل الخطوه لان اخاف ما اكدر اكون كدها او ما اكدر اسيطر عل الوضع

توكلت على الله وبديت كيمياء مع الاستاذ مهند السوداني وما ندمت ابداً بهذه الخطوه كانت احسن وافضل خطوه اخطيها
استاذ اكثر من رائع يبسط الشرح ويخلي الكيماء شي سهللل و ممتع بشكل بدرسه ولا يخلي الطالب يمل ولو كانت المحاضره طويله
مو بس مهند السوداني طبعاً مجموعه المساعدين مثل دكتوره خنساء وست ضحى
عسل عسل متعاونين بشكل فضيع وفللل لطافه 🥹🦋
واحب اشكر الجميع الاستاذ والمساعدين على تعوانهم ويانه وان شاء الله بفضل الله ثم فضلهم ان شاء الله يكونوا سبب للوصول الى الحلم🫶🏼


الطالبه: سما مروان


(طلاب استاذ مهند السوداني 2024💊)


لو تكون كدها لو تطلع من عدها 💕
انتهى….🫡🦋

تجربتي مع مادة الكيمياء عند الأستاذ مهند السوداني تجربة مميزة ومختلفة والسبب يرجع لأستاذ المادة أستاذ مهند طريقة شرحه وأسلوبه وترتيبه للمواضيع بطريقة متسلسة ومترابطة وبالإضافة الى الطرق الخاصة الي يستخدمها بالشرح لإيصال المعلومة بطريقة علمية وممتعة وأكثر شي حلو نظام الواجبات والامتحانات متنوعة بين سهلة ومتوسطة و وزارية ومركزة بيها تحتاج الى تفكير وكانت مكثفة بحيث الطالب يضمن فهمه وحفظه للمادة ولأن كانت تجربتي مع منصة أبواب ف أكيد راح تكون تجربة مميزة أكثر شي حبيته هو المساعدين وطريقة تعاملهم ويانا وتحفيزهم النا وأكثر شي مريح هو تواصل أستاذ مهند ويانه بشكل مباشر واجوبته ع كل تساؤلاتنا بدون ملل حبيت أشكر أستاذي العزيز أستاذ مهند 🌹
ومنصة أبواب المميزة على كل تعبهم وجهودهم ويانا 💛💙

لينا علي حسين ( #طلاب الأستاذ مهند السوداني 2024)

واللله العضيم من احسن الخطوات الي اخذتها ب حياتي ب كل محاضره اكتشف شغله جنت ما اعرفها و ينطيكم العافيه يا رب💗

رأيي في الدورة الالكترونية للاستاذ مهند السوادني ( شعراً )
دَعواكَ تُغني بِها لِلمُقتَفي أثراً
أو رَاجِياً في ذُرى الكيمياءِ مِنْ فَهمِ

تَسَنمتَ آيَ المَجدِ وَاستَهوى العُلى
في حَضرَتِيكَ تَعاصُفَ العَلَمِ

وَوَقتٍ لَهُ في ذا النِظامِ مُحَسَّبٌ
فَلا تَضَعُ الطُلابَ في مَأزِقٍ نَقِمِ

نِظامٌ وَتَرتيبٌ وَحِسٌ وَرَوعَةٌ
وأعطاءُ مَا يُعطى وَتَركَ المُهَمْهَمِ

وَتَرسِيخُ أفكارٍ وتَوسيعُ مُدرَكٍ
وَتقويمُ فَهمِ المَرءِ، يَا مُحسِنَ الفَهمِ

تُعَزِزُ مِنْ كِلتَا المَواضِيعِ جَمَّةٌ
فَلا تَتْرُكَ الطُلابَ في تَائهِ العِلمِ

وأُثني على مَنْ ساعَدُوهُ بِأمرِهِ
أعانَوا لِإكمالِ العَناقِيدِ مُسهِمِ

وَذَوقُهُمُ العَالي يُحيلُ تَواصُلًا
خِطَابُهُمُ رَقٌ وفي أمرِهِ كَلِمِي

فَأخرَجْتَ أجيالًا، وَسَاعَدتَ كَامِلًا
لِتَحقِيقِ مَا يَرجُوا وَكَشفِ المُغَّيَّمِ

بَحثتُ عَلى عَيبٍ فَلمْ ألقى مَا سِوى
بِأمرِ المِنَّصَةِ والحاسُوبِ إذ لا تنتمي

وَهَذا خِتامٌ مِنْ رَحِيقٍ مُهَندَمٍ
مُهَنَّدَ يَستَجلِي السَواعِدَ فِي الهَمِّ

حسين علي حسين (#طلاب الأستاذ مهند السوداني 2024)

(الصراحة الدورة الإلكترونية هاي السنة فد شي وبمستوى آخر واستاذ مهند شرحة خيالي ومتابعة قوية من حيث الامتحانات والتقييمات بحيث كلشي مرتب وبيرفكتو.) معتز نعمان حمزة

صباح التفاؤل واحلى المفاجآت الحلوة، هكذا يخونني التعبير والله مفاجأة حلوة تسعد القلب، الشهادة لله اذا هناك شخص يستحق الشكر فهوا انت استاذي، لك مني جزيل الشكر والتقدير على جميع ما تقدمه لنا من سعادة. طبعاً اني طالبة خارجي وجنت كلش اكره الكيمياء بس كلمة الحق تقال من درست عند استاذ مهند السوداني صارت الكيمياء كلش سهلة كدما فهمتها وحبيت الكيمياء ودرجاتي تشهد اخذت 100 🫶🥰 دنيا علي حكيم (#طلاب استاذ مهند علي السوداني دفعة 2024)