የኢትዮጵያ የባንክ ዘርፍ ከጥቂት ሳምንታት በኋላ ለውጭ ውድድር ሊከፈት መሆኑ ተሰማ

ኢትዮጵያ በታሪኳ ለመጀመሪያ ጊዜ የባንክ ዘርፉን ለውጭ ውድድር ለመክፈት በዝግጅት ላይ ትገኛለች። ይህን ተከትሎ በአሁኑ ወቅት አዲስ ህግ በፓርላማ እየተገመገመ እና በሚቀጥለው ወር ይፀድቃል ተብሎ እንደሚጠበቅ ተገልጿል።

ይህ ውሳኔ በሀገሪቱ ኢኮኖሚያዊ ገጽታ ላይ ከፍተኛ ለውጥን የሚያመለክት ሲሆን ይህም ውድድርን ለማሳደግ፣ የአገልግሎት አሰጣጥን ለማሻሻል እና የውጭ ኢንቨስትመንትን ለመሳብ ያለመ ነዉ ተብሏል ።

ርምጃው በኢትዮጵያ መንግስት እና በብሄራዊ ባንክ የተጀመሩት የማክሮ ኢኮኖሚ ማሻሻያዎች አካል ሲሆን እነዚህ ማሻሻያዎች የተነደፉት የፋይናንስ ሴክተሩን ለማዘመን እና ለሀገር ውስጥ እና ለአለም አቀፍ ንግዶች የበለጠ ምቹ ሁኔታን ለመፍጠር ጭምር ነዉ።

የውጭ ባንኮችን ወደ ኢትዮጵያ የፋይናንስ ምኅዳር ማስገባቱ ፉክክር እንደሚያመጣ የሚጠበቅ ሲሆን ይህም ለተጠቃሚዎች የተሻሻሉ አገልግሎቶችን እና ምርቶችን ሊያመጣ ይችላል ተብሎ ይጠበቃል።

ህጉ የውጭ አካላት በኢትዮጵያ የባንክ ዘርፍ እንዳይሳተፉ በታሪክ የሚገድቡ እንቅፋቶችን ለመበተን ያለመ ነው። የውጭ ባንኮች ከአገር ውስጥ ተቋማት ጋር አብረው እንዲሠሩ በመፍቀድ፣ መንግሥት የፋይናንስ አካታችነትንና ፈጠራን ሊያጎለብት የሚችል ዓለም አቀፍ እውቀትና ካፒታል ለመጠቀም ያለመ መሆኑ ታዉቋል።

የብሔራዊ ባንክ ገዢ ማሞ ምህረቱ በቅርቡ በተካሄደዉ እና የአውሮፓ ምክር ቤት በኢትዮጵያ ባዘጋጀው ዝግጅት እንደተናገሩት የኢትዮጵያን ኢኮኖሚ በዓለም አቀፍ ደረጃ ተወዳዳሪ ለማድረግ ማሻሻያው ወሳኝ መሆኑን አስረድተዋል ።

ከዚህ በተጨማሪ የግሉ ሴክተር በኢትዮጵያ ኢኮኖሚ ውስጥ ያለው ፍላጎትና ተሳትፎ በተለይም የውጪ ንግዶች ለእድገት ፍፁም ወሳኝ ናቸዉ ሲሉም አክለዋል ።

አማራ ባንክ ከታክስ በፊት ከ550 ሚሊየን ብር በላይ ትርፍ ማግኘቱን አስታወቀ።

በ2013 ከ180 ሺህ በላይ ባለ አክሲዮኖች የተመሰረተው አማራ ባንክ ባለፉት አመታት ኪሳራዎች ገጥመውት እንደነበር ይታወሳል።

እየተጠናቀቀ ባለው የፈረንጆቹ 2024 ሰኔ ወር ድረስ ከገባበት ኪሳራ በመውጣት ከ550 ሚሊየን ብር በላይ ጠቅላላ ትርፍ ማስመዝገቡን የባንኩ 3ኛ መደበኛ ጠቅላላ ጉባኤ ላይ ተነግሯል።

ባንኩ ከ801 ሺህ በላይ አዳዲስ ደንበኞችን አግኝቻለሁ ያለ ሲሆን በዚህም አጠቃላይ የደንበኞቹን ቁጥር ከአንድ ሚሊየን ስምንት መቶ ሺህ በላይ ለማድረስ መቻሉ ነው የገለፀው።

የባንኩ የቦርድ ሰብሳቢ ጋሻው ደበበ ባለፈው አመት በባንክ ኢንደስትሪው አወንታዊና አሉታዊ ሁኔታዎችን የፈጠሩ አለም አቀፋዊና አገራዊ ክስተቶች ማጋጠማቸውን አስታውሰው የተፈጠሩት ጂኦፖለቲካዊ ውጥረቶች የኢኮኖሚ ማሽቆልቆል በኢኮኖሚው ላይ ተፅዕኖ ማሳደሩን ጠቁመዋል።

በሀገሪቱም በአንዳንድ አካባቢዎች የተከሰቱ ግጭቶችና አለመረጋጋቶች ተደማምረው አሉታዊ ተፅዕኖ ማሳደራቸውን ተናግረዋል።

አማራ ባንክ በ3ኛው የባለ አክሲዮኖች ጠቅላላ ጉባኤ ላይ 43 አዳዲስ ቅርንጫፎችን በመጨመር የቅርንጫፎቹን ብዛት 310 ማድረሱ የተገለፀ ሲሆን ከወለድ ነፃ የባንክ አገልግሎትን የሚሰጡ ቅርንጫፎቹም ብዛት 15 ደርሰዋል።

የኢትዮጵያ ሠነደ ሙዓለ ንዋዮች ገበያ ከሞሮኮ አክሲዮን ገበያ ጋር የትብብር ስምምነት ፈጸመ!!

የኢትዮጵያ ሠነደ ሙዓለ-ንዋዮች ገበያ ከሞሮኮ ካዛብላንካ አክሲዮን ገበያ ጋር ስትራቴጂካዊ የትብብር ስምምነት መፈራረሙ ተገለፀ።

አላማውም በዋናነት በእውቀት ማጋራት እና ተግባራዊ ድጋፍ መስጠት ላይ የሚያተኩር መሆኑ ተገልጿል።

ደኅንነቱን የጠበቀ እና ቀልጣፋ የንግድ ሥርዓት እንዲፈጥር የቴክኖሎጂ ማዕቀፍን፣ የአሠራር አቅም እና የአደጋ አሥተዳደር አቅምን የሚያጎለብቱ ሥራዎች ለመስራት ያስችላል ተብሏል።

በተጨማሪም ኢንቨስትመንትን እና ዘላቂ እድገትን ለማበረታታት እንደሚያግዝ ተገልጿል፡።

የውጭ ሀገራት ባንኮች ወደ ሀገር ውስጥ እንዲገቡ የሚፈቅደው የባንክ ሥራ ረቂቅ አዋጅን የህዝብ ተወካዮች ምክር ቤት ነገ መርምሮ እንደሚያፀድቅ ተገለፀ፡፡

6ኛው የሕዝብ ተወካዮች ም/ቤት 4ኛ ዓመት የስራ ዘመን በ11ኛ መደበኛ ስብሰባው የኢትዮጵያ ብሔራዊ ባንክ ረቂቅ አዋጅን አስመልክቶ ከተወያየ በኃላ እንደሚያፀድቅ ይጠበቃል፡፡

በነገው መደበኛ ስብሰባ የፕላን በጀትና ፋይናንስ ጉዳዮች ቋሚ ኮሚቴ፤ የኢትዮጵያ ብሔራዊ ባንክ እና የባንክ ስራ ረቂቅ አዋጅን አስመልክቶ ለምክር ቤቱ ሪፖርትና የውሳኔ ሀሳብ የሚያቀርብ ይሆናል፡፡

ረቂቅ አዋጁ ሰኔ 18 ቀን ፣ 2ዐ16 ዓ/ም ለፕላን በጀትና ፋይናንስ ጉዳዮች ቋሚ ኮሚቴ የተመራ ሲሆን ምክር ቤቱ፤ ቋሚ ኮሚቴው የሚያቀረበውን ሪፖርትና የውሳኔ ሀሳብ መርምሮ አዋጁን እንደሚያፀድቅም ይጠበቃል፡፡

ረቂቅ አዋጁ ሲጸድቅ የውጭ ባንኮች በሃገር ውስጥ ተቀጥላ ወይም ሰብሲዲያሪ ጽህፈት ቤታቸውን እንዲከፍቱ ከመፍቀዱ በተጨማሪም የሀገር ውስጥ ባንኮችን ድርሻ መግዛት እንዲችሉ የሚፈቅድም ነው፡፡

ከዚህም ባሻገር የውጭ ባንኮች ቅርንጫፎቻቸውን እንዲከፍቱ፣ ኢትዮጵያውያንና የውጭ ሀገራት ዜጎችም በባንኮቻቸው የሥራ እድልን ማግኘትና የቦርድ ሊቀመንበር አባላት እንዲሆኑ መንገዱን የሚያቀናላቸው ነው ይኸው ረቂቅ አዋጅ፡፡

መንግስትም የአዋጁን መጽደቅ ተከትሎ ለአምስት የውጭ ባንኮች ፈቃድ ለመስጠት ያስችለዋል፡፡

በኢትዮጵያ ገበያ ለመሥራት ፍላጎት ካሳዩ የውጭ ባንኮች ውስጥ የኬንያው ኬሲቢ እንዲሁም ስታንዳርድ ባንኮች ይጠቀሳሉ፡፡