Элчихонамиз томонидан Ўзбекистон мустақиллигининг 33 йиллиги муносабати билан расмий қабул маросими ўтказилди.
Тантанали маросимда Польша ташқи ишлар вазири ўринбосари Владислав Бартошевский асосий меҳмон сифатида иштирок этди. Шунингдек, Польша Сейми (қуйи палата) раиси ўринбосари Кшиштоф Босак, маданият вазири ўринбосари Божена Желазовска ҳамда турли вазирлик ва идоралар раҳбарлари, жамоат арбоблари, тадбиркорлар, маданият, оммавий ахборот воситалари вакиллари ва ватандошлар қатнашди.
Польша ташқи ишлар вазири ўринбосари Владислав Бартошевский ўз нутқида Шавкат Мирзиёев Ўзбекистон Президенти этиб сайланганидан сўнг икки мамлакат ўртасидаги иқтисодий ҳамкорлик ва савдо айланмаси доимий ўсиб бораётганини таъкидлади. "Польшанинг илғор компаниялари Ўзбекистон бозорига кириш, айниқса, тўғридан-тўғри хорижий инвестицияларни киритишга қизиқиш билдирмоқда. Ҳамкорликни ривожлантириш учун айниқса қишлоқ хўжалиги, қишлоқ хўжалик техникаси, тўқимачилик ва фармацевтика соҳаларида катта имкониятлар мавжуд. Варшава-Тошкент йўналиши бўйича тўғридан-тўғри авиақатновларнинг очилиши ушбу ҳамкорликни янада тезлаштиришга, шунингдек, туризм алмашинуви ошишига ҳисса қўшмоқда", – деди Польша ТИВ раҳбари ўринбосари.
Қабул маросими давомида унинг иштирокчилари Ўзбекистоннинг бой маданий мероси ва анъаналари билан яқиндан танишиш имконига эга бўлдилар. Шунингдек, Ўзбекистон санъат усталари томонидан тақдим этилган концерт дастури барчага байрамона кайфият улашди.

Польшанинг Тиббий маҳсулотлари, тиббий жиҳозлар ва биоцид маҳсулотларини рўйхатдан ўтказиш идораси президенти Гжегож Чесак бошчилигидаги делегациянинг Ўзбекистонга ташрифи ташкил этилди.
Фармацевтика маҳсулотлари хавфсизлиги маркази директори Алишер Темиров билан ўтказилган учрашув якунида ҳамкорликда фаолият олиб боришга келишилган йўналишлардаги ишларни амалга ошириш бўйича аниқ ҳаракатлар режасидан иборат бўлган йўл харитаси имзоланди.
Фармацевтика тармоғини ривожлантириш агентлиги директори Абдулла Азизов билан бўлиб ўтган музокараларда томонлар икки томонлама ҳамкорлик ва тартибга солувчи органлар ўртасида маълумот алмашиш зарурлиги тўғрисида келишувга эришдилар.
Эслатиб ўтамиз, жорий йил 19-25 сентябрь кунлари Ўзбекистонда “Ўзбек-польяк ҳамкорлик ҳафталиги” давом этмоқда.