Sevimli TV

Учрашув чоғида “Ўзбекистон маданий мероси дунё тўпламларида” туркумидан Италияда сақланаётган маданий меросимиз дурдоналари ҳақида китоб-альбом ва фильм яратиш ҳақида ҳам сўз борди.
— Биз ана шу йирик лойиҳани амалга ошириш учун ёрдам кўрсатишга тайёрмиз, — дейди Италиянинг Ўзбекистондаги элчиси Андреа Бертоцци. — Таниқли шарқшунос олимлар билан алоқа ўрнатиш учун Италия музей, кутубхоналари ва бошқа илмий муассасаларига мурожаат қиламиз. Хусусан, Неополь шарқшунослик университети (Università degli Studi di Napoli "L'Orientale") билан мустаҳкам алоқа ўрнатганмиз. Римдаги “Ла Сапиенца” университети олимлари Самарқандда тадқиқот олиб боришмоқда. Ушбу олимлар билан ҳамкорликда келгусида Ўзбекистоннинг Италиядаги маданий мероси дурдоналарини тадқиқ этишда ҳам яхши натижаларга эришамиз деган умиддаман. Жаноб элчининг таъкидлашича, ўрта асрларда Марко Полонинг саёҳатлари, Венеция ва Генуя савдогарларининг Буюк Ипак йўлидаги савдо карвонлари Ғарб ва Шарқ ўртасида кўприк вазифасини ўтаган ва хусусан Италия ҳудудига ҳам Шарқ маданиятини олиб кирган.
Шу билан бирга, учрашув доирасида Италияда медиа-ивентлар ўтказиш масаласи ҳам муҳокама қилинди.
— Жорий йилда лойиҳа доирасида буюк боболаримиз хусусан, Абу Али ибн Сино мероси ҳақида ҳам янги фильмлар суратга олиш, шунингдек янги китоб-альбомлар чоп этиш кўзда тутилган, — деди Ўзбекистон маданий меросини ўрганиш, асраш ва оммалаштириш бўйича Бутунжаҳон жамияти раиси Ф.Абдухолиқов. — Жумладан, Британиянинг “Clan Production" студияси билан Би-би-си телеканали учун Ибн Сино ҳақида фильм суратга олиш режалаштирилган. Шунингдек, улуғ алломанинг жаҳондаги қатор кутубхоналарда сақланаётган қўлёзмалари ҳақида фотоальбом ва фильм яратишни ҳам кўзда тутганмиз. Бу лойиҳалар Париждаги “Авиценна-Франция” жамияти ва “Eriell Group” компанияси кўмагида амалга оширилади. Болонья университетида сақланаётган мазкур қўлёзманинг факсимиле нусхаси доимий ҳамкорларимиздан бири Австриянинг “Mueller&Schindler” нашриётида тайёрланади.
Ибн Синонинг машҳур “Тиб қонунлари” асари XV асрда лотин тилига таржима қилинган ўша пайтлардаёқ Инжилдан сўнг Европада энг кўп чоп этилган китобга айланган. Мазкур қўлёзма эса асарнинг иврит тилидаги нашри бўлиб, у алломанинг энг қимматли қўлёзмаларидан бири саналади.

4.07K views11:27