❗️Березовский кентінің өзекті мәселелері тыңдалды

Семей қаласының әкімі Талғат Мұратов Березовский кентінің тұрғындарымен кездесіп, жол, су, жарық және мектептің жылыту жүйесіне қатысты мәселелерді тыңдады. Ашық диалог форматында өткен жиында тұрғындар көкейкесті сұрақтарын қойды.

Кездесуге тиісті бөлім басшылары мен коммуналдық қызмет өкілдері қатысып, көтерілген мәселелерді шешу жолдары қарастырылды. Әкім тұрғындардың өтініштері назардан тыс қалмайтынын және әр мәселе әкімдік бақылауында болатынын атап өтті.

«Тұрғындардың өмір сүру сапасын жақсарту – біздің басты міндетіміз екенін әрқашан айтамын. Және әрбір тұрғынның мәселесі назардан тыс қалмауы керек. Березовский кентіндегі барлық мәселелер кезең-кезеңімен шешіліп, әрқайсысына тиісті назар аудару қажет. Бөлім басшыларына да осыны тапсырамын», – деп атап өтті Талғат Мұратов.

Кездесу нәтижесінде әкім тиісті бөлім басшыларына мәселелердің шешілуін бақылауға алу қажеттігін тапсырды.

📷inst | 🗳fb | 🌐gov.kz

#СемейҚаласыныңӘкімдігі

🎖️Қала әкімінің орынбасары Гүлдана Ноғайбаеваны марапатымен құттықтады

Халықаралық әйелдер күнінде дәстүрлі әнші, «Мәдениет саласының үздігі», Астана қаласында өткен халықаралық «Шабыт» фестивалінің лауреаты, Павлодар қаласындағы Майра Уәлиқызы әндеріне арналған І Республикалық байқаудың жүлделі I орын иегері Гүлдана Ноғайбаева Мемлекет басшысы Қасым-Жомарт Тоқаевтың жарлығымен «Парасат» орденімен марапатталған еді.

Осыған орай Семей қаласы әкімінің орынбасары Қуаныш Әбілдаев Гүлдана Ноғайбаеваны жоғары марапатымен құттықтап, оған әрі қарай шығармашылық табыс, отбасына амандық, береке мен бақыт тіледі.

📷inst | 🗳fb | 🌐gov.kz

#СемейҚаласыныңӘкімдігі

⚜️ Қазақ халқының мәдени мұрасы дәріптелді

Семей қалалық Мәдениет сарайында Мәдениет және ұлттық салт-дәстүр күніне орай кең көлемді мерекелік іс-шара өтті. Бұл шара қазақ халқының бай мәдени мұрасын дәріптеуге, ұлттық салт-дәстүрлерді жаңғыртуға және жас ұрпаққа рухани құндылықтарды насихаттауға бағытталды.

Мерекелік жиын барысында қазақ халқының көнеден келе жатқан тұрмыс-салты мен дәстүрлерін паш ететін киіз үй тігіліп, ұлттық нақыштағы көрме ұйымдастырылды. Қолөнер шеберлері киіз басу, зергерлік бұйым жасау, ағаш ою сияқты дәстүрлі өнер түрлерін көрсетіп, қатысушыларға шеберлік сабақтарын өткізді. Сонымен қатар, ұлттық тағамдар жәрмеңкесі ұйымдастырылып, келушілерге бауырсақ, қымыз, қазы-қарта сияқты қазақтың асханалық дәстүрінің үздік үлгілері ұсынылды.

Іс-шара аясында ұлттық өнерге ерекше көңіл бөлінді. Айтыс ұйымдастырылып, отты жыр мен тапқырлыққа толы сөз сайысы көрермендердің зор ықыласына бөленді. Жарапазан айтылып, қазақ халқының көне дәстүрлері қайта жаңғырды. Халық әндері орындалып, күмбірлеген күй шертіліп, қазақтың төл өнері жоғары деңгейде дәріптелді.

«Ұлттық мәдениетіміз бен салт-дәстүріміз – ұлтымыздың рухани қазынасы. Бүгінгі шара – сол асыл мұрамызды жас ұрпаққа насихаттаудың, халықтың санасына сіңірудің жарқын үлгісі. Тек осындай игі бастамалар арқылы ғана ұлттық құндылықтарымызды сақтап, келер ұрпаққа жеткізе аламыз», – деді Семей қаласының мәдениет және тілдерді дамыту бөлімінің басшысы Маржан Бахатова.

Сонымен қатар кеш барысында Мәдениет сарайының өнерпаздары жиналған қауымға ән мен күйден шашу шашып, қазақ биінің түрлі жанрларын орындап, көрермендерге тамаша әсер сыйлады. Ұлттық киім киген өнерпаздар сахнаның көркін ашып, қазақ халқының эстетикалық талғамын айшықтады.

Бұл шара ұлттық құндылықтарды ұлықтап, жас ұрпаққа салт-дәстүріміздің маңызын түсіндіруге бағытталған игі қадам болды. Ұлттық мәдениетіміздің асыл қазынасын дәріптеу, ата-бабамыздан қалған мұраны насихаттау – қоғамның рухани кемелденуіне үлкен үлес қосатыны сөзсіз.

📷inst | 🗳fb | 🌐gov.kz

#СемейҚаласыныңӘкімдігі