«Сіздер өз қызметтеріңізде кәсібилік пен жауапкершілікті жоғары деңгейде ұштастыра отырып, полиция мен бұқаралық ақпарат құралдары арасындағы тиімді байланысты қалыптастыруға, қоғам мен құқық қорғау органдарының арасындағы сенімді нығайтуға айрықша үлес қосып келесіздер» - деді орынбасар.

«Бүгінде Алаштың астанасының медиа кеңістігінде 40-тан астам бұқаралық ақпарат құралы жұмыс жасайды. Қаланың баспасөз тарихында «Семей таңы» газетінің алар орны ерекше. Тамыры тереңде жатқан бұл басылым – 1917-1918 жылдары шыққан «Сарыарқа» газетінің жалғасы. Бүгінде екі тілде – «Семей таңы» және «Вести Семей» атауымен жарық көріп келеді. Бұл басылым Семей журналистерінің ұстаханасына айнала білді. Семей телеарнасының тарихы – өз алдына бір шежіре. Биыл бұл арнаның құрылғанына 60 жыл толып отыр. Жарты ғасырдан астам уақыт бойы телеарна аймақтың басты ақпарат көзі болып келеді. Арна ұжымы жаңа дәуірдің талаптарына бейімделіп, сапалы контент жасау арқылы көрермен сенімінен шығып жүр. Ал ТВК-6 телеарнасы – 90-жылдардың басында құрылған, алғашқы тәуелсіз ақпарат құралымыздың бірі. Бүгінде бұл медиақұрылым тек телеарнамен шектелмей, екі бірдей газет шығарып отыр. Ақпарат таратуда кешенді, көп форматты тәсілді ұстанған ТВК-6 – өңірлік медианарықтағы ерекше орынға ие», – деді Семей қаласы әкімінің орынбасары.