ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង និងលោកជំទាវ ម៉េត រ៉ាវីចិត្រ សុខ លូ បានអញ្ជើញចូលរួមពិធីប្រគេនទៀនចំណាំព្រះវស្សាចំនួន ១៦វត្ត នៃក្រុង-ស្រុកទាំង១៤ ក្នុងខេត្តបាត់ដំបង ក្រោមអធិបតីភាពដ៏ខ្ពង់ខ្ពស់លោកជំទាវ ញ៉ែម សាខន ស ខេង ព្រមទាំងមានការអញ្ជើញចូលរួមដោយបុត្រាបុត្រី ចៅៗ និងក្រុមគ្រួសារ ។
ពិធីប្រគេនទៀនចំណាំព្រះវស្សានេះ ផ្ដួចផ្ដើមឡើងដោយសម្ដេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងលោកជំទាវ ញ៉ែម សាខន ស ខេង ដើម្បីឧទ្ទិសមហាកុសលជូនដួងវិញ្ញាណក្ខន្ធ សម្តេចអគ្គមហាធម្មពោធិសាល ជា ស៊ីម និងលោកជំទាវ ញ៉ែម សឿន ជាស៊ីម មហាឧបាសក ស ប៊ិត មហាឧបាសិកា ម៉ក់ សែម មហាឧបាសក ញ៉េប អឹម មហាឧបាសិកា ញ៉ែម អ៊ុន មហាឧបាសក ស ទិត្យ ឯកឧត្តម ស ថេង និងឧបាសិកា ស ស៊ន ព្រមទាំងញាតិកាទាំងប្រាំពីរសន្តាន ទាំងសងខាងដែលបានចែកឋានទៅហើយនោះ ក្រោមអធិបតីភាពដ៏ខ្ពង់ខ្ពស់ លោកជំទាវ ញ៉ែម សាខន ស ខេង ព្រមទាំងមានការអញ្ជើញចូលរួមដោយបុត្រាបុត្រី ចៅៗ និងក្រុមគ្រួសារ ដែលប្រារព្ធឡើងនៅភូមិគ្រឹះសម្តេចក្រឡាហោម ស ខេង ភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ។