នាព្រឹកថ្ងៃទី៣១ ខែមករា ឆ្នាំ២០២៥ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង បានអញ្ជើញអមដំណើរ ឯកឧត្តមនាយឧត្តមសេនីយ៍ កិត្តិសង្គហបណ្ឌិត គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានអញ្ជើញជួបសំណេះសំណាលសួរសុខទុក្ខ ជាមួយបងប្អូនប្រជាកសិករដែលបានបង្កបង្កើនផលស្រូវប្រាំងកំពុងជួបប្រទះការខ្វះខាតទឹក នៅក្នុងឃុំហប់ និងឃុំធិបតី ស្រុកគាស់ក្រឡ ខេត្តបាត់ដំបង។

ឯកឧត្តម សុខ លូ អញ្ជើញជួបសំណេះសំណាលជាមួយកសិករបង្កបង្កើនផលស្រូវប្រាំងជួបការខ្វះខាតទឹកស្រោចស្រព ក្នុងស្រុកមោងឫស្សី

នារសៀលថ្ងៃទី៣១ ខែមករា ឆ្នាំ២០២៥ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង បានអញ្ជើញជួបសំណេះសំណាលជាមួយកសិករបង្កបង្កើនផលស្រូវប្រាំងជួបការខ្វះខាតទឹកស្រោចស្រព ប្រមាណជាង ៤,០០០ហិកតា នៅភូមិព្រាននិល ឃុំព្រៃតូច ស្រុកមោងឫស្សី និងបន្តពិនិត្យស្ថានភាពស្ទឹងចកសម្រាប់គម្រោងស្តារឡើងវិញ ស្ថិតនៅភូមិចកធំ ឃុំកកោះ ស្រុកមោងឫស្សី ខេត្តបាត់ដំបង។

នារសៀលថ្ងៃទី០៥ ខែកុម្ភ: ឆ្នាំ ២០២៥ ឯកឧត្តម សុខ លូ អភិបាល នៃអភិបាលខេត្តបាត់ដំបង បានអញ្ជើញដឹកនាំកិច្ចប្រជុំអំពីការពន្លឿនផែនការជំរុញដីធ្លីមិនទាន់បានចុះបញ្ជីមានលក្ខណៈជាប្រព័ន្ធក្នុងភូមិសាស្ត្រខេត្តបាត់ដំបង និងការរៀបចំសណ្តាប់ធ្នាប់ ការកែលម្អសោភ័ណភាពក្រុង និងយុទ្ធនាការ “ផ្ទះមួយខ្នង ដើមឈើមួយដើម” ការរៀបចំដោះស្រាយសំណង់បណ្តោះអាសន្នមិនរៀនរយក្នុងក្រុងបាត់ដំបង ព្រមទាំងការរៀបចំដោះស្រាយទំនាស់ដីធ្លី ក្នុងឃុំបឹងប្រាំ ស្រុកបវេល និងនៅទីតាំងសំខាន់ៗផ្សេងទៀត នៅសាលប្រជុំសាលាខេត្តបាត់ដំបង។

ឆ្លៀតក្នុងឱកាសនេះ ឯកឧត្តម សុខ លូ អភិបាលខេត្តបាត់ដំបង ណែនាំឪ្យលោកអភិបាលក្រុង ស្រុកបន្តខិតខំផ្សព្វផ្សាយពន្យល់ណែនាំអោយបងប្អូនប្រជាពលរដ្ឋជួយថែរក្សាដើមឈើដែលបានដាំរួចនាពេលកន្លងមកក្នុងយុទ្ធនាការ “ផ្ទះមួយខ្នង ដើមឈើមួយដើម” អោយបានល្អដោយចូលរួមក្នុងការស្រោចទឹក ថែទាំ ចំពោះដើមឈើដែលនៅមុខផ្ទះនីមួយៗ អោយបានទៀងទាត់តាមលទ្ធភាពដែលបងប្អូនធ្វើបាន និងខិតខំដាំបន្តទៀតដើម្បីបង្កើនសម្រស់ទីក្រុងបាត់ដំបង ជាទីក្រុងបៃតងមានសោភ័ណភាពស្អាតទាក់ទាញភ្ញៀវទេសចរកាន់តែច្រើនក្នុងពេលអនាគត។