የአፍሪካ አመራር ልህቀት አካዳሚ ፕሬዚደንት አቶ ዛዲግ አብርሃ ከማዕድን ሚኒስትሩ ኢ/ር ሀብታሙ ተገኝ ጋር ተወያዩ::

ፕሬዚደንቱ ለማዕድን ሚኒስትሩ እና ለሚኒስትር ዴኤታዎች አካዳሚው በሶስት ዓመት ውስጥ ስለሚተገብራቸው የአመራር ልማት ፕሮጀክቶች እና የሪፎርም ፕሮግራሞች ገልፃ አድርገዋል::

አቶ ዛዲግ በውይይቱ ላይ እንደጠቀሱት፤ በአካዳሚው የለውጥ፤ የማስፋት እና የሽግግር ስራዎች ውስጥ ሁሉን አቀፍ እና አካታች የአመራር ልማት ፕሮግራም መነደፉን አስታውሰው፤ በጠቅላላ (General) አራት እና በልዩ (Specialized )ሰላሳ ስምንት የአመራር ልማት ፕሮግራሞች ተቀርጸው ወደ ስራ እንደተገባና ለሁሉም ፕሮግራሞች ማስፈፀሚያ የሚሆን ከ2,500 በላይ ገፆች ያሉት ዝርዝር ስትራቴጂ እንደተዘጋጀም አብራርተዋል::

በኢትዮጵያ እና በአፍሪካ ውስጥ ተራርቀውና ተነጣጥለው ያሉ ተቋማትን እና መሪዎችን እንደ ድልድይ ሆኖ ለማገናኘት ሰፋፊ ተግባራት እየተከናወኑ እንደሆኑም አቶ ዛዲግ ተናግረዋል።

ፕሬዚደንቱ አያይዘውም የአፍሪካ አመራር ልህቀት አካዳሚ ከበርካታ ዓለምአቀፍና የሀገር ውስጥ ተቋማት ጋር በትብብር እየሰራ እንደሆነ ጠቅሰው፤ ከማዕድን ሚኒስቴር ጋርም በአመራር ልማት ፕሮግራም፤ በአመራር የልህቀት ሽልማት፤ በሀሳብ ማመንጫ ማዕከል ግንባታ እና በጥናትና ምርምር ዘርፎች አብረው መስራት እንደሚፈልጉ ተናግረዋል::

የማዕድን ሚኒስትሩ ኢ/ር ሀብታሙ ተገኝ በበኩላቸው፤ አፍሌክስ በሶስት ዓመታት ውስጥ ሊሰራ ያቀደው እና ፕሬዚደንቱ ዕቅዱን ያቀረቡበት መንገድ ከአፍሌክስ ጋር ለመስራት የሚያነሳሳ መሆኑን ጠቅሰው፤ አካዳሚው በአመራር ልማት ዘርፍ የሰነቀው ራዕይ ከተቋም ግንባታ ባሻገር ለሀገርና ለአፍሪካ ብልፅግና የሚኖረው ሚና ከፍተኛ ነው ብለዋል::

የኢትዮጵያ የፖለቲካ ፓርቲዎች የጋራ ምክር ቤት ምክክር በአፍሪካ አመራር ልህቀት አካዳሚ
**************************************

የፖለቲካ ፓርቲዎች የጋራ የውይይት መድረኮች ሀገራዊ ችግሮችን በጋራ ለመፍታትና የዳበረ የዴሞክራሲ ስርዓት ለመገንባት ጥሩ መሰረት የሚያኖር መሆኑን የፖለቲካ ፖርቲዎች የጋራ ምክር ቤት ገለጸ።

የኢትዮጵያ የፖለቲካ ፓርቲዎች የጋራ ምክር ቤት አባላት በወቅታዊና ዋና ዋና ሀገራዊ ጉዳዮች ዙሪያ በአፍሪካ አመራር ልህቀት አካዳሚ ውስጥ ምክክር አድርገዋል።

የአፍሪካ የአመራር ልህቀት አካዳሚ አመራሮችና ሠራተኞች አረንጓዴ አሻራቸውን አኖሩ።
የአፍሪካ የአመራር ልህቀት አካዳሚ አመራሮች፣ ሰራተኞችና በሸገር ከተማ የመና አቢቹ ክፍለ ከተማ አመራሮችና ማህብረሰቡ በአፍሌክስ የአመራር ልማት ማዕከል ውስጥ የችግኝ ተከላ መርሃ ግብር አካሂደዋል፡፡
በመርሃ ግብሩን ላይ ንግግር ያደረጉት በአፍሪካ አመራር ልህቀት አካዳሚ የስራ አመራር ዘርፍ ምክትል ርዕሰ አካዳሚ ወንድዬ ለገሰ (ዶ/ር)፤ በኢትዮጵያ የአረጓዴ ኢኮኖሚን በማሳደግ የዜጎችን የምግብ ዋስት ለማረጋገጥ በትኩረት እየተሰራ ነው ብለዋል፡፡

የኢትዮጵያ የፖለቲካ ፓርቲዎች የጋራ ምክር ቤት አባላት በአፍሪካ አመራር ልህቀት አካዳሚ ውስጥ አረንጓዴ አሻራቸውን አኖሩ።
የኢትዮጵያ የፖለቲካ ፓርቲዎች የጋራ ምክር ቤት አባላት አረንጓዴ አሻራ መርሀ ግብር የችግኝ ተከላ አከናውነዋል።
በመርሀ ግብሩ የኢትዮጵያ የፖለቲካ ፓርቲዎች የጋራ ምክር ቤት አባላት በአፍሪካ አመራር ልህቀት አካዳሚ የስራ አመራር ዘርፍ ምክትል ርዕሰ አካዳሚ ወንድዬ ለገሰ (ዶ/ር) ጋር በመሆን በችግኝ ተከላው ላይ ታድመዋል።

የከፍተኛ ትምህርት አመራሩን አቅም የሚገነባ የትምህርት አመራር ልማት ፕሮግራም መቅረጽ በሚቻልባቸው ጉዳዮች ላይ ውይይት ተደረገ::

ውይይቱን ያደረጉት የአፍሪካ አመራር ልህቀት አካዳሚ ፕሬዚደንት አቶ ዛዲግ አብርሃ እና የትምህርት ሚኒስትሩ ፕሮፌሰር ብርሀኑ ነጋ ናቸው::

በከፍተኛ ትምህርት ዘርፍ ያለውን የአመራር አቅም ውስንነት ለመሙላትና ሁሉን አቀፍ የከፍተኛ ትምህርት የአመራር ልማት ፕሮግራም ለመቅረፅ ሁለቱ ተቋማት የተወያዩ ሲሆን በጋራ በመስራት የዘርፉን ሁለንተናዊ ዕድገት ማረጋገጥ እንደሚቻል ከስምምነት ላይ ተደርሷል::

የአፍሪካ አመራር ልህቀት አካዳሚ ፕሬዚደንት አቶ ዛዲግ አብርሃ በውይይቱ ላይ እንደገለጹት በሁለቱ ተቋማት የሚቀረፀው የከፍተኛ ትምህርት የአመራር ልማት ፕሮግራም የዘርፉን አመራር አቅም በመገንባት ለትምህርት ጥራት እና ለትውልድ ግንባታ የሚኖረው ሚና ቀላል ግምት የሚሰጠው አይደለም ብለዋል::

የትምህርት ሚኒስትሩ ፕሮፌሰር ብርሀኑ ነጋ በበኩላቸው የሚቀረፀው የከፍተኛ ትምህርት አመራር ልማት ፕሮግራም የዘርፉን አመራር በብቃት ለማልማት እና ስምሪት ለመስጠት ዕድል የሚፈጥር መሆኑን ጠቁመው በአውሮፓና አሜሪካ ይገኛል ተብሎ ከሚታሰበው ልምድና ስልጠና የተሻለ እንደሚሆን ያላቸውን እምነት ገልጸዋል::

የአፍሪካ አመራር ልህቀት አካዳሚ እና ትምህርት ሚንስቴር የከፍተኛ ትምህርት አመራር ልማት ፕሮግራም ቀርፃን የሚከውን የቴክኒክ ኮሚቴ አቋቁመው ውይይቱን አጠናቀዋል::