ነሲሓ ኮንፈረንስ እንዴት አለፈ?

በአላህ ፈቃድ ታላቁ ነሲሓ ኮንፈረንስ ዛሬ እሁድ መጋቢት 1/2016 በሚሊኒየም አዳራሽ በታላቅ ድምቀት ተካሂዷል። የረመዳን ዋዜማ ላይ የተካሄደው ይህ ፕሮግራም ትኩረቱን በቁርዓን ላይ ያደረገ ሲሆን፤ የቁርዓን ህዝቦች በሚል ርዕስ በርካታ ኡስታዞች የተሳተፉበት ውይይት ቀርቧል። በውይይቱ መጀመሪያና መጨረሻ በርዕሱ በኡስታዝ አህመድ መሐመድ ተፅፎ የቀረበው ግጥም የብዙዎችን ልብ ስቧል።

በሸይኽ ሙሀመድ ኢድሪስ ሞላ መሳጭ የቁርአን አቀራር ተግባራዊ ትምህርት ቀርቧል። የነሲሓ መስጂድ ኢማም በሆኑት ኡስታዝ ሰዒድ አበበ ልዩ ቲላዋ ከመቅረቡ ባሻገር ለሁለት ተማሪዎች ኢጃዛ ተሰጥቷል።

የእለቱ ልዩ ፕሮግራም የነበረው "ፍም እንደመጨበጥ" በሚል ርዕስ በሸይኽ ኢልያስ አህመድ የቀረበው ልዩ ሙሐደራ ሲሆን የመጨረሻውን ዘመን ፈተናዎች የዳሰሰና መፍትሄዎቸችን የጠቆመ ነበር።

በተጨማሪም የኢብኑ መስዑድ ኢስላሚክ ሴንተር የዳዕዋና የትምህርት እንቅስቃሴዎችና የኢትዮጵያውያን ኡለማዎች ታሪኮች የተዳሰሱባቸው ዶክሜንተሪዎች ቀርበዋል።

ፕሮግራሙን በማቀናጀትና በማስተናበር እንዲሁም ጥሪ አክብረው ለታደሙ የነሲሓ ቤተሰቦች፤ እንዲሁም በፕሮግራሙ ላይ በመገኘት ላበረታቱን ኡለማዎች፣ ጠለበተል ዒልምና የመጅሊስ አመራሮች አላህ መልካም ምንዳን እንዲፅፍላቸው እየለመንን በአላህ ስም ምስጋናችንን እናቀርባለን።

አላህ እንኳን ለታላቁ የረመዳን ወር አደረሳችሁ። አላህ ፆምና መልካም ስራዎችን ያግራልን። አሚን!

ኢብኑ መስዑድ ኢስላሚክ ሴንተር
መጋቢት 1/2016 ሻዕባን 29/1445

_____
🕌 ኢብኑ መስዑድ ኢስላሚክ ሴንተር
@merkezuna