የመርከዝ ፕሮጀክት... የትብብር ፍሬ!

ኢብኑ መስኡድ ኢስላሚክ ሴንተር፤
ከ2001 አብነት አካባቢ ከሁለት በጎ ፈቃደኛ ወንድማማቾች ባገኘው ትንሽ ቤት ውስጥ ኢስላማዊ ቤተ መፃህፍት፣ ነሲሓ ኢስላማዊ ስቱዲዮ፣ ዳሩል ሐዲስ የሰርተፊኬትና የዲፕሎማ ፕሮግራሞች፣ መስማት የተሳናቸው ወገኖችን ጨምሮ በርካታ የትምህርት ፕሮግራሞችን እውን በማድረግ አገልግሎት ሲሰጥ ቆይቷል። ሆኖም በጠባብ ቦታ ላይ የተጀመሩትን እንቅስቃሴዎች ማሳለጥ ይችል ዘንድ፤ በተለምዶ 18 ተብሎ በሚጠራው አካባቢ ቦታ ለመግዛትና ቋሚ የመርከዝ ህንፃ ለመገንባት ፕሮጀክት ነድፎ ህዝበ ሙስሊሙን በማስተባበር ቦታ ገዝቶ ግንባታ ማከናወን ጀመረ።

ከዚያ በፊት በአብዛኛው መሰል ፕሮጀክቶች የሚፈፀሙት በውጭ ድጋፍ ስለነበር የመርከዙ እቅድ ለአንዳንዶች የማይሳካ ህልም መስሏቸውም ነበር። ሆኖም በአላህ ፈቃድ በአጭር ግዜ ውስጥ ውጥኑ የብዙዎችን ቀልብ በመሳብ የአስተሳሰብ ለውጥ ከማምጣቱ ባሻገር በራስ አቅም ዳዕዋን መደገፍ እንደሚቻል ህያው ማሳያ ሆኖ ነበር። እጅግ አስደናቂ በሆነ ተነሳሽነትና የአላማ አንድነት ከሴት ተማሪዎች እሰከ ባለሀብቶች ባደረጉት ድጋፍ ሁለት ወለል ማጠናቀቅ ተችሏል።

በወቅቱ የዳዕዋ ተቋማት ላይ የተጋረጡ አደጋዎች፣ ጫናዎችና እጅግ ፈታኝ ሂደቶች ስለነበሩ በትዕግስትና በጥበብ ማለፍን ይጠይቅ ነበር። ስለሆነም በከፊል ከተጠናቀቀው ግንባታ ከፊሉን በማከራየት በአብነት ለሚገኘው መርከዝ ቋሚ የዳዕዋ ድጋፍ ማግኘት ተችሏል። የተወሰኑ ወለሎች ቢቀሩትም ግንባታውን ከፍ ወዳለ ደረጃ በማሸጋገርና የተገነቡ ወለሎችን በዘመናዊ ሁኔታ በማጠናቀቅ መስጅድ፣ የሙሐደራትና ኮርሶች አዳራሽ፣ ቤተ መፃህፍት በማሟላት የታህፊዝና የሴቶች ማዕሐድ ከጥር 1/2008 ጀምሮ አገልግሎት መስጠት ሲሰጥ ቆይቷል። በሁለቱም መርከዞች በሺዎች የሚቆጠሩ ሙስሊሞች ተምረዋል። ይህ መርከዝ ከምስረታው ጀምሮ ለሴቶች ከፍተኛ ትኩረት የሰጡ የትምህርት የተርቢያና የስልጠና መርሐ ግብሮችን ተፈፃሚ አድርጓል።

አሁንም በአላህ ፀጋና በረከት ቀሪውን ግንባታ በማድረግ በቅርቡ ሙሉ በሙሉ በመጠናቀቁ በቀጣይ ኢስላማዊ ኮሌጅን ጨምሮ በርካታ ፕሮግራሞችን ማካሄድ የሚያስችል ሆኗል።

እሁድ መስከረም 13 /2016 ረፋዱ ላይ ለፕሮጀክቱ እውን መሆን አሻራቸውን ያኖሩ ሁሉ በመርከዙ በመገኘት የልፋታቸውን መልካም ፍሬ የሚያዩበት፣ ለዋለላቸው ፀጋ አላህን የሚያመሰግኑበት ቀን ነው።

وَمَا بِكُم مِّن نِّعۡمَةࣲ فَمِنَ ٱللَّهِ
(ማንኛውም በእናንተ ላይ ያለው ጸጋ ከአላህ ነው) አል-ነሕል: 53

የብዙ ጀግኖች አሻራ አርፎበት ለስኬት የበቃው ይህ ፕሮጀክት፤ ለቀጣይ የዳዕዋ ጉዟችንና ወኔ ለሚጠይቁ ፕሮጀክቶቻችን ተግባራዊ ምሳሌ ስለሆነ ለቀጣይ ስኬቶች እንዘጋጅ።

አልሐምዱሊላህ!

ኢብኑ መስዑድ ኢስላሚክ ሴንተር
መስከረም 7/2016
____
🕌 ibnu Masoud islamic Center
@merkezuna