Олжас Бектенов «Самұрық-Қазына» директорлар кеңесінің отырысын өткізді: қазақстандық тауар өндірушілермен 1,4 трлн теңгеге келісімшарт жасалады

📌 Премьер-министр Олжас Бектенов «Самұрық-Қазына» ұлттық әл-ауқат қоры» АҚ директорлар кеңесінің отырысын өткізді. Қордың басқарма төрағасы Нұрлан Жақыповтың өндірістік және қаржылық көрсеткіштер туралы есебі тыңдалды.

🔷 Мемлекет басшысының басым инфрақұрылымдық жобаларды жүзеге асыру жөніндегі тапсырмаларының орындалу барысы қаралды. Қор басшылығы экономиканың басым салаларындағы жалпы сомасы шамамен 36,4 трлн теңгені құрайтын инвестициялық 46 ірі жоба туралы баяндады. Бүгінгі таңда «Полиэтилен өндірісі», күкірт қышқылы зауыты және «Мойынты – Қызылжар» теміржол желісі, Жаңаөзен қаласындағы газ өңдеу зауыты, сондай-ақ «Шу», «Жамбыл», «Шымкент» қосалқы стансаларында Қазақстан БЭЖ оңтүстік аймағының электр желісін нығайту шеңберінде құрылыс-монтаждау жұмыстары басталды.

⏩ Нұрлан Жақыповтың айтуынша, 2025 жылдың соңына дейін «Достық – Мойынты» теміржол желісі, Алматы қаласын айналып өтетін айналма теміржол желісі, Ақтау порты базасындағы контейнерлік хаб, «Талдықорған – Үшарал» магистралды газ құбыры, Кендірлідегі су тұщыту зауыты сияқты инфрақұрылымдық нысандарды, сондай-ақ Caspi Bitum зауытын кеңейту және Павлодар мұнай-химия зауытында дизель отынын гидротазарту қондырғысын реконструкциялау жобаларын аяқтау жоспарлануда.

✔️ Отандық тауар өндірушілерді қолдау бағытында атқарылып жатқан жұмыстарға назар аударылуда. Қордың сатып алу тәртібінде: тауарларды ОТӨ-ден сатып алу басымдығы, жұмыстар мен қызметтерді орындау кезінде ОТӨ-ден тауарларды сатып алу бойынша мердігерлер мен қосалқы мердігерлік ұйымдардың міндеттемелері, сондай-ақ 16-дан астам қосымша қолдау шаралары көзделген. Аталған қолдау шаралары шеңберінде қазақстандық тауар өндірушілермен жасалған келісімшарттар санын 2024 жылғы 1,1 трлн теңгеден 2025 жылы 1,4 трлн теңгеге дейін арттыру жоспарланып отыр.

Сонымен қатар Импортты алмастыру бағдарламасы бойынша «Самұрық-Қазына» қоры өткен жылы қазақстандық кәсіпкерлермен 191 млрд теңгеге офтейк-келісімшарттар жасады – бұл 10 есе өсім. Кәсіпкерлікті қолдау шараларының бірі – skstore. kz электрондық дүкені. Платформада 13 мыңнан астам ШОБ өкілі және 500 отандық тауар өндіруші тіркелген. 2024 жылдың қорытындысы бойынша 14,6 млрд теңгеге 25 мың тапсырысты құраған, бұл өткен жылмен салыстырғанда 7 есеге көп.

🔘 Премьер-министр «Самұрық-Қазына» қоры басшылығына және жауапты министрліктерге жобалардың Қазақстан инфрақұрылымына, энергетикасына, көлік логистикасына, өнеркәсіптік және экономикалық дамуына мультипликативті әсерін ескере отырып, олардың уақтылы жүзеге асырылуын қамтамасыз етуді тапсырды.

📱 @KZgovernment

Олжас Бектенов Қазақстан машина жасаушылары форумында Мемлекет басшысының құттықтау сөзін оқыды

📌 Премьер-министр Олжас Бектенов Қазақстан машина жасаушыларының XII форумына қатысып, машина жасау және металл өңдеу бойынша VI Халықаралық арнайы көрмеде индустрия көшбасшыларының жетістіктерімен танысты.

🔻 Форумның ашылуында Премьер-министр Мемлекет басшысы Қасым-Жомарт Тоқаевтың құттықтау сөзін оқыды. Еліміздің орнықты экономикалық өсуіндегі машина жасау саласының рөліне ерекше назар аударылды.

«Қазақстанның өңдеу өнеркәсібіндегі машина жасау саласының үлесі соңғы бес жылда 13-тен 19 пайызға дейін өсті. Былтыр өндіріс көлемі 4,6 триллион теңгеге жетті. Жаңа өнім түрлері шығарылып, тауар экспорты да айтарлықтай артты. Ел нарығына ауыл шаруашылығы техникаларын, автобустар, жеңіл және жүк көліктерін жасайтын жаңа компаниялар келді. Биыл Қазақстанда әлемдегі ірі компаниялардың жоғары технологиялы кәсіпорындары іске қосылады. Мұның бәрі – мемлекеттің отандық өндірісті қолдауға қатысты жүйелі шараларының жемісі.

Машина жасау ісін одан әрі өркендете түсу үшін жергілікті өндірістің үлесін арттыру және озық технологияларды, соның ішінде жасанды интеллектіні жаппай енгізу қажет. Сонымен қатар жұмысшыларға жайлы әрі қауіпсіз еңбек жағдайын жасау, білікті мамандар даярлауға және олардың біліктілігін көтеруге жете көңіл бөлу маңызды.

Экономикалық тұрақсыздық жағдайында болашағы зор салалар мен бағыттарды дамыту үшін жаңа мүмкіндіктер ашылады. Еліміздің машина жасау саласы бүкіл экономикамызды өркендетуге тың серпін беру үшін өз әлеуетін толық іске асыра алады деп сенемін»,

— деп атап өтілген құттықтау хатта.

🔘 2024 жылдың қорытындысы бойынша машина жасау саласындағы өндіріс көлемі 10%-ға өсті. Осы жылдың I тоқсанында аталған көрсеткіш 17%-дан асты, бұл саланың жоғары әлеуетін және қабылданып жатқан шаралардың тиімділігін көрсетеді.

⏩ Пленарлық отырыста машина жасау кәсіпорындарын қолдау, локализациялауды тереңдету, жаңа технологиялық үдерістерді игеру шаралары, сондай-ақ машина жасау саласындағы халықаралық ынтымақтастықтың келешегі талқыланды.

🔵 Пленарлық отырысқа қатысушылар бірқатар өзекті мәселе көтерді. Karlskrona LC AB бас директоры Талғат Алпысбаев саладағы өзгерістерді талап ететін негізгі аспектілерді – отандық шикізатқа қолжетімділік және ұзақмерзімді қаржыландыру мәселелерін атап өтті. Шикізат ресурстарын бөлу тетіктерін заманауи әрі технологиялық жобаларды жүзеге асыратын кәсіпорындар үшін жеңілдікпен несиелеу мүмкіндіктерін кеңейтуге және ішкі өңдеуге басымдық бере отырып, қайта қарау бойынша ұсыныстар айтылды.

🔵 Hyundai Motor Company бас менеджері Ан Джунмо компанияның Қазақстандағы локализациялауды әрі қарай дамыту жоспарлары туралы айтты.

🔵 Қытайдың Халықаралық сауданы қолдау комитеті Машина жасау комитетінің вице-президенті Чжоу Хаймин негізгі компоненттерді локализациялау арқылы жоғары технологиялы машина жасау өнімдерін шығаратын бірлескен өндірістер құруға инвестиция салу бойынша қытайлық компаниялардың жоспарларымен бөлісті.

⏩ Форумның пленарлық отырысы барысында өнеркәсіп және құрылыс министрі Ерсайын Нағаспаев, Қазақстан машина жасаушылар одағының басқарма төрағасы Мейрам Пішембаев, KUKA AG компаниясының аға вице-президенті Дмитрий Капишников өз пікірлерін білдірді.

📱 @KZgovernment