📌 Премьер-министр Олжас Бектеновтің төрағалығымен өткен энергетиканы дамыту мәселелері жөніндегі республикалық кеңесте саланың негізгі бағыттары, оның ішінде жаңа қуат көздерін іске қосу, инфрақұрылымды жаңғырту, Батыс аймақтың электр желілерін еліміздің Бірыңғай электр энергетикалық жүйесімен біріктіру, энергия тиімділігін арттыру және басқа да мәселелер қаралды. Энергетика министрі Ерлан Ақкенженов, өнеркәсіп және құрылыс министрі Ерсайын Нағаспаев, «Самұрық-Энерго» АҚ және «KEGOC» АҚ компаниялары басшылығы, сондай-ақ бірқатар өңір әкімдері баяндама жасады.

✔️ Қазақстанда 227 электр стансасы жұмыс істейді. Станса жабдықтарының орташа тозу деңгейі 56%-ға жетеді. Өткен жылдың қорытындысы бойынша электр энергиясын өндіру көлемі 4%-ға өсті. Жаңа қуат көздерін іске қосу қолданыстағы стансаларды жаңғырту және жаңа генерациялайтын қондырғылар салу есебінен болжануда. Энергетика министрі Ерлан Ақкенженов өткен жылы 771 МВт жаңа қуат көзі, оның ішінде Екібастұз ГРЭС-1-дегі №1 блок қалпына келтірілгенін, Атырау ЖЭО-дағы №6 турбина, Жезқазған қаласындағы ЖЭО-да №8 қазандық ауыстырылғанын, сондай-ақ жалпы қуаты 163 МВт баламалы энергетика жобалары іске қосылғанын айтты. Генерациялайтын қондырғыларды жаңғыртуға, кеңейтуге, реконструкциялауға және жаңарту бойынша жалпы қуаты шамамен 2 ГВт болатын 14 инвестициялық келісім жасалды. Биыл 621 МВт, 2026 жылы – 2,6 ГВт іске қосу жоспарланған. Экономиканың электр энергиясына деген қажеттілігін өтеу үшін 2029 жылға дейін 68 жоба жүзеге асырылады. Жалпы, 2035 жылға дейін жалпы қуаты 4,2 ГВт қолданыстағы стансаларды жаңғырту, реконструкциялау және кеңейту жоспарланып отыр.
🔵 Сонымен қатар Ақтөбе, Батыс, Сарыбай жүйеаралық электр желілері KEGOC филиалдарының 220-500 кВ әуе желісін реконструкциялау жобасы аяқталды, оның шеңберінде нормативтік пайдалану мерзіміне жеткен жалпы ұзындығы 2 мың шақырымды құрайтын қолданыстағы 24 электр беру желісіне жөндеу жүргізілді. Сондай-ақ Алматы ЖЭО-2 және ЖЭО-3-ті жаңғырту жұмыстарының барысы туралы айтылды.
✔️ Өнеркәсіп және құрылыс министрі Ерсайын Нағаспаев еліміздің ірі кәсіпорындарымен экономиканың энергия сыйымдылығын және энергия тұтынуды төмендету бойынша жүргізіліп жатқан жұмыстар туралы баяндады. Іске асырылған бірқатар жоба аталды. «КарЦемент» кәсіпорнындағы сорғы жабдықтарын жаңғырту электр энергиясының үлестік шығынын 15,4%-ға төмендетуге мүмкіндік берді. Қазақстан электролиз зауыты электролизерлер мен оқшауланған электр қазандықтарын күрделі жөндеуден өткізіп, электр энергиясын тұтынуды 4,5%-ға азайтты. Ақтөбе мыс компаниясы газ поршенді қондырғылар жұмысын оңтайландыру және отын қоспасын беруді реттеу арқылы электр энергиясының шығынын 2%-ға қысқартты. Сондай-ақ бюджеттік сектордың энергия тұтынуына мониторинг жүргізілуде. Цифрландыру шеңберінде Мемлекеттік энергетикалық тізілім энергия үнемдеу саласындағы Бірыңғай ақпараттық жүйеге трансформациялануда.

«Президент энергетиканы өзін-өзі қамтамасыз ететін әрі бәсекеге қабілетті ел құрудың негізгі бағыттарының бірі ретінде атады. Бұл табысты цифрландыру мен жасанды интеллектіні кеңінен енгізу – оған тікелей тәуелді болатын жаңа әлемдегі тұрақты ілгерілеудің негізгі факторы. Бұл жерде Мемлекет басшысы атап өткендей, Қазақстанда орасан зор мүмкіндіктер бар.
Сонымен қатар жоспарланған жобалардың уақтылы орындалмауы экономиканың дамуын тежейді. Мұндай жағдайға жол беруге болмайды. Біз белсенді түрде жұмыс істеуіміз керек. Бірқатар ірі жоба қазірдің өзінде электр қуатын қажет етіп отыр»,

— деді Олжас Бектенов. Маңызды жобалар қатарында Семей, Өскемен және Көкшетау қалаларында заманауи көмір станцияларын іске қосу, Екібастұз қаласындағы заманауи ГРЭС-3 станциясының құрылысы атап өтілді.
⏩ Кеңес соңында бірқатар тапсырма берілді. Биыл KEGOC Батыс аймақтың электр желілерін БЭЖ-бен біріктіру үшін құрылыс-монтаждау жұмыстарын бастауы қажет, жұмыс 2027 жылы аяқталуы тиіс. Аталған жоба тұтынушыларды электрмен жабдықтау сенімділігін арттырады. Премьер-министр көмір химиясын дамытуға баса назар аударып, жоғары өңделген өнім өндіру үшін көмірді өңдеудің инновациялық технологиясын белсенді пайдалануды тапсырды.

Олжас Бектенов Павлодар облысының бизнес-қоғамдастығы өкілдерімен экономиканың нақты секторын мемлекеттік қолдау шараларын талқылады

📌 Премьер-министр Олжас Бектенов Павлодар облысының бизнес-қоғамдастығы өкілдерімен кездесу өткізді. Онда Мемлекет басшысының қуатты экономика қалыптастыру жөніндегі тапсырмаларын іске асыруға бағытталған отандық тауар өндірушілерді қолдау шаралары талқыланды.

🔷 Өңір кәсіпкерлерімен кездесу барысында Олжас Бектенов Үкімет отандық тауар өндірушілерді жан-жақты қолдау бойынша жұмыс жүргізіп жатқанын атап өтті. Мемлекеттік сатып алу саласында отандық өндірушілер тауарларының, жұмыстары мен көрсетілетін қызметтерінің тізбесі кеңейтілді, сатып алу рәсімдері оңтайландырылып, ұзақмерзімді шарттар жасау тетігі енгізілді. АӨК-те жеңілдікпен несие беру мөлшері ұлғайтылды, бұл 2024 жылы рекордтық жоғары өнімділікке қол жеткізуге мүмкіндік берді. Экономиканың нақты секторын дамыту үшін шағын бизнесті қолдауды қамтамасыз ететін қаржыландыруды кеңейту және кепілдік қорларын құру көзделген. Алдағы бес жылда 13 трлн теңге инвестицияға Энергетикалық және коммуналдық секторларды жаңғырту жөніндегі ұлттық жоба іске қосылды.

🔻 Премьер-министр бірінші кезекте экономикалық әлеуеті бар басым бағыттарды дамыту қажеттігін атап өтіп, кәсіпкерлерді мемлекеттік қолдау бағдарламаларына белсенді қатысуға шақырды.

«Мемлекет басшысы кәсіпкерлікті дамыту және қолдау мәселесін бірнеше рет көтерді. Ол үшін біз бизнесті жүргізуге барынша қолайлы жағдайлар жасаймыз.
Өткен аптада мен екінші деңгейлі банктермен кездесу өткіздім. Олар экономиканың нақты секторын қаржыландыруды арттыруға ниетті. Сондықтан біз сіздерден келешегі зор жобаларды, өркендеудің жаңа бағыттарын және экспорт нарығын кеңейтуді күтеміз. Металдарды терең өңдеу, мұнай, газ және көмір химиясы, энергетика және машина жасау, туризм сияқты басым бағыттарды дамыту қажет. Бұл өнім сапасы мен компаниялардың бәсекеге қабілеттілігін арттыру, жаңа жұмыс орындарын ашу, халықтың табысы мен бюджетке түсетін кірісін арттыру тұрғысынан пайда әкеледі»,

— деп атап өтті Олжас Бектенов.

⏩ Ұлттық экономика вице-министрі Бауыржан Омарбеков бизнес жүргізу үшін жағдайды жақсарту және оны басым түрде қолдау жөніндегі жұмыс туралы баяндады. Әкімшілік жүктемені азайту үшін кәсіпкерлік қызметті «таза парақтан» реттеу енгізілді, 10 мың негізсіз талап қысқартылды, сондай-ақ тексерулер жүйесі оңтайландырылды, бұл олардың санын 2019 жылмен салыстырғанда екі есеге қысқартуға мүмкіндік берді. Биыл Кәсіпкерлікті кешенді қолдау бағдарламасы аясында 271,1 млрд теңге бөлу жоспарланып отыр. Оның 12,5 млрд теңгесі Павлодар облысы кәсіпкерлерін қолдауға бағытталады.

✔️ 2025 жылы өңірде өңдеу саласында құны 125,3 млрд теңгеден асатын бес жобаны іске қосып, 1,2 мыңнан астам жұмыс орны ашу жоспарланған.

⏩ «Бәйтерек» холдингінің басқарма төрағасы Рустам Қарағойшин кәсіпкерлікті қолдау бойынша қабылданып жатқан шаралар туралы хабарлады. Мәселен, 2025 жылы кәсіпкерлікті, тұрғын үй құрылысы мен инвестициялық жобаларды қаржыландыру көлемін 2027 жылға қарай 10 трлн теңгеге дейін ұлғайта отырып, 8 трлн теңге бағыттау жоспарлануда. Ірі бизнес үшін – 5 трлн теңгеге дейінгі жобаларды қаржыландыруды көздейтін 1,5 трлн теңгеге дейінгі мемлекеттік кепілдікпен, ал ШОБ үшін – қарыз сомасының 85%-на дейінгі кепілдіктермен қамтамасыз етуге мүмкіндік беретін Кепілдік қорлары құрылады. Сонымен қатар банктермен бірлескен жұмыс қарастырылған.

📱 @KZgovernment

📌 Отырыс барысында металлургия, ауыл шаруашылығы, сауда, қызмет көрсету және басқа да салаларда қызмет ететін кәсіпкерлер өзара іс-қимылды жақсарту бойынша идеялары мен ұсыныстарын бөлісті.

⏩ «АЭМЗ» ЖШС бас директоры Марат Ахметжанов тарифтік саясаттың өңірдің металлургия саласына әсері мәселесін көтерді. Ол ірі жобаларды іске асырудың барлық кезеңіне арналған электр энергиясына жеңілдігі бар инвестициялық тарифті бекітуді жеделдетуді сұрады. Оның пікірінше, бұл әлемдік нарықтарда экспортқа бағдарланған өнімнің бәсекеге қабілеттілігін сақтауға, Қазақстанға жаңа инвесторлар тартуға және металлургия өндірісінің орталығы ретінде еліміздің имиджін нығайтуға мүмкіндік береді.

⏩ «Едіге Шоң» ЖШС бас директоры Тоғжан Мұзапаров АӨК бағдарламаларын мысалға ала отырып, жеңілдігі бар пайыздық мөлшерлемемен тікелей қаржыландыру тетігін енгізуге қатысты ұсынысын айтты. Кәсіпкердің пікірінше, бұл қолдау алуды жеделдетіп, кәсіпкерлердің қаржылық тұрақтылығын күшейтеді әрі бизнесті дамытуға қолайлы жағдай жасайды.

⏩ «Галицкое» ЖШС директоры Александр Касицин пайыздық мөлшерлемелерді тікелей субсидиялауды және жылдық 6%-бен «тазаланған» қарыздар беруді қосқанда, аграрлық секторды мемлекеттік қолдаудың маңыздылығын атап өтті. Сондай-ақ кәсіпкер Президенттің өндіріс көлемін ұлғайтуға, өнім сапасын жақсартуға және еліміздің азық-түлік қауіпсіздігін қамтамасыз етуге мүмкіндік беретін бірыңғай ауыл шаруашылығы салығын енгізу туралы бастамасын қолдады. Сонымен қатар ол диқандар көктемгі дала жұмыстарына тиісті қаражатты толық көлемде ала бастағанын және қажетті ЖЖМ-ның жартысын жеткізгенін атап өтті. Алдын ала егіске қаражат бөлінетін бұл тәжірибені Үкімет былтыр алғаш рет енгізген болатын.

⏩ «ECO CITY PAVLODAR» ЖК басшысы Махаббат Анаева Павлодар облысында 56 мыңнан астам кәсіпкерлік субъектісі барын, олардың жартысы әйелдер екенін атап өтті. Әйелдер кәсіпкерлігін қолдауға бағытталған мемлекеттік бағдарламалардың мүмкіндіктерін кеңейту ұсынылды, бұл қоғамның бірқатар маңызды әлеуметтік мәселелерін шешуге мүмкіндік береді.

⏩ «Fonet Er-Tai AK Mining» ЖШС бас директорының міндетін атқарушы Азамат Әлжапаров Павлодар облысында құны 9,4 млрд теңгені құрайтын катодты мыс өндіретін гидрометаллургиялық зауыттың құрылысы туралы хабарлады. Бүгінгі таңда компания геологиялық барлау жұмыстарын жүргізіп, электр беру желісі салынды. Сонымен қатар кәсіпкер экологиялық құжаттарды келісу бойынша рәсімдердің ұзақтығын атап өтті.

⏩ «ЭкоДом-Павлодар» ЖШС директоры және Павлодар облысы Кәсіпкерлер палатасы әйелдер кәсіпкерлігін дамыту жөніндегі салалық кеңесінің мүшесі Марина Рейдина мемлекеттік қолдаудың, атап айтқанда жеңілдетілген несиелеудің, субсидиялардың және акселерациялық бағдарламаларға қатысудың арқасында төрт жыл ішінде шағын өндіріс сүт өнімдерінің 150-ден астам түрін шығаратын заманауи кәсіпорынға айналғанын айтты.

🔵 Талқылау қорытындысы бойынша Премьер-министр Павлодар облысының әкімдігіне, Ұлттық экономика министрлігіне және басқа да мемлекеттік органдарға «Атамекен» Ұлттық палатасымен бірлесіп айтылған ұсыныстарды пысықтауды тапсырды.

📱 @KZgovernment