Inistiitiyuutiin Leenjii fi Qorannoo Seeraa Oromiyaa(ILQSO)n leenjii hojiirraa yeroo gabaabaa magaalaa Ambootti kennaa jira. ILQSOn leenjii mata duree SDFHH/Seera Deemsa Falmii Hariiro Hawaasaa; Dhimmoota Xiyyeeffannoo barbaadan jedhu irratti kan kennaa jiru yoo ta'u, leenjichi guyyoota sadiif kan turu ta'uun himame.
Daayrekteerri Ol'aanaan Inistiitiyuutii Leenjii fi Qorannoo Seeraa Oromiyaa Obboo Dobee Dhaabaa haasawa baniinsaa irratti akka jedhanitti "leenjiin sakatta'iinsa fedhii irratti hundaa'uun kan sassaabame yoo ta'u, kaayyoon leenjichaa hubannoo walii galaa uumuun rakkoolee hojmaata kessatti muudatan fooyyessuun kallattii fuula duraa akeekuuf akka ta'e ibsuun leenjichichaaf xiyyeeffannoon ol'aanaan kennamuu qaba." jedhan.

Inistitiyuutiin Leenjii fi Qorannoo Seeraa Oromiyaa magaalaa Jimmaatti Abbootii Alangaatiif leenjii hojiirraa yeroo gabaabaa kennaa jira.
Inistiitiyuutichi mata Duree Seera Deemsa Falmii Hariiroo Hawaasaa ;Dhimmoota Xiyyeeffannoo Barbaadan jedhu irratti Abbootii Alangaa Godinaa fi Aanaaletiif leenjii guyyoota sadiif turu kennuu eegalee jira.
Biiroon Abbaa Alangaa Waliigalaa Oromiyaa dhimmoota hariiroo hawaasaa dantaa ummataa fi mootummaa akka hojjatu bu'uura Labsii 2014/2011 tiin aangoon waan kennameef hojii kana karaa bu'aa qabeessa ta'een raawwachuuf gahumsa Abbootiin Alangaa (SDFHH) seera deemsa falmii hariiroo hawaasaa irratti qabu dabaluun murteessaa ta'uu ibsamee jira.
Leenjin kunis fedhii leenjii sassaabame irratti hundaa'uun seera deemsa falmii hariiroo hawaasaa dhimmoota xiyyeeffannoo barbaadan irratti hubannoo Abbootii Alangaa dabaluuf kan kennamaa jiru ta'uu I/A Daarekteera Ol'aanaa ILQSO Obboo Sulxaan Abdoo himanii jiru.

Leenjiin hojiirraa yeroo gabaabaa Inistiitiyuutii Leenjii fi Qorannoo Seeraa Oromiyaa (ILQSO)n magaalaa Amboo fi Jimmaatti Abbootii Seeraa fi Abbootii Alangaa Aanaalee fi Godinaaleetiif mata dureewwan garaagaraa irratti kennuu eegale har'a guyyaa lammaffaaf haala gaariin kennamaa oolee jira.